ޚާމަނައީ އަވަހާރަވެއްޖެ ކަމަށް ޓްރަމްޕް އިއުލާނު ކުރައްވައިފި

އީރާނުގެ ރޫހާނީ ލީޑަރު އާޔަތުﷲ އަލީ ޚާމަނައީ ވައިގެ ހަމަލާތަކެއްގައި އަވަހާރަވެފައިވާ ކަމަށް އެމެރިކާގެ ރައީސް ޑޮނަލްޑް ޓްރަމްޕް ހޮނިހިރު ދުވަހު ވިދާޅުވެއްޖެއެވެ.

ޓްރަމްޕްގެ އަމިއްލަ ސޯޝަލް މީޑިއާ ނެޓްވޯކް ކަމަށްވާ "ޓްރުތް ސޯޝަލް" ގައި ކުރެއްވި ޕޯސްޓެއްގައި ވިދާޅުވީ، ތާރީޚު ދުށް އެންމެ ނުބައި އެކަކު ކަމުގައިވާ ޚާމަނައީ އަވަހާރަވެފައިވާ ކަމަށެވެ.

ޚާމަނައީގެ މަރާ ގުޅޭގޮތުން އީރާނުން ވަގުތުން އެއްވެސް އެއްޗެއް ބުނެފައެއް ނުވެއެވެ. އެމެރިކާ އާއި އިޒްރޭލުން ހޮނިހިރު ދުވަހު އީރާނަށް ދިން އަސްކަރީ ހަމަލާތަކުގައި އަމާޒުކޮށްފައިވަނީ އެ ގައުމުގެ އިސް ލީޑަރުންނަށެވެ. މިއާއެކު މެދުއިރުމަތި ބޮޑު ހަމަނުޖެހުމެއްގެ ތެރެއަށް ވެއްޓިފައިވާއިރު، ޓްރަމްޕް ވިދާޅުވީ މި ހަމަލާތަކުގެ ސަބަބުން އެމެރިކާއަށް އޮތް ސަލާމަތީ ނުރައްކާ ނެތިގޮސް، އީރާނުގެ ވެރިކަން ވައްޓާލުމުގެ ފުރުސަތު އެ ގައުމުގެ ރައްޔިތުންނަށް ލިބިގެންދާނެ ކަމަށެވެ.

"މިއީ ހަމައެކަނި އީރާނުގެ ރައްޔިތުންނަށް ލިބުނު އިންސާފެއް ނޫން. މިއީ ޚާމަނައީ އާއި އޭނާގެ ލޭއޮހޮރުވުމަށް ލޯބިކުރާ ގްރޫޕުގެ ފަރާތުން އަނިޔާ ލިބި، މަރާލެވުނު އެމެރިކާގެ ރައްޔިތުންނާއި ދުނިޔޭގެ އެކި ގައުމުތަކުގެ މީހުންނަށްވެސް ލިބުނު އިންސާފެއް،" ޓްރަމްޕް ލިޔުއްވާފައިވެއެވެ.

ޓްރަމްޕް އިތުރަށް ވިދާޅުވީ، އެމެރިކާގެ އިންޓެލިޖެންސާއި ފެންވަރު މަތީ ޓްރެކިންގ ސިސްޓަމްތަކުން ޚާމަނައީއަށް ސަލާމަތްނުވެވުނު ކަމަށާއި، އިޒްރޭލާ ގުޅިގެން ދިން މި ހަމަލާތަކުން ސަލާމަތްވުމަށް ޚާމަނައީއަށް ވެސް އަދި އޭނާއާއެކު މަރާލެވުނު އެހެން ލީޑަރުންނަށްވެސް ކުރެވޭނެ އެއްވެސް ކަމެއް ނެތް ކަމަށެވެ.

"މިއީ އީރާނުގެ ރައްޔިތުންނަށް އެމީހުންގެ ގައުމު އަނބުރާ ހޯދުމަށް ލިބޭނެ އެންމެ ބޮޑު ފުރުސަތު،" އެމެރިކާގެ ރައީސް ވިދާޅުވިއެވެ.

ޓްރަމްޕް އިތުރަށް ވިދާޅުވީ، އީރާނުގެ ރިވޮލިއުޝަނަރީ ގާޑްސް (އައި.އާރް.ޖީ.ސީ) އާއި، އަސްކަރިއްޔާ އަދި ސަލާމަތީ ބާރުތަކުގެ ގިނަ ބަޔަކު މިހާރު ހަނގުރާމަކުރަން ބޭނުންނުވާ ކަމަށާއި، އެމީހުން އެދެނީ އެމެރިކާގެ ފަރާތުން ރައްކާތެރިކަން ހޯދުމަށް ކަމުގެ މައުލޫމާތު ލިބެމުންދާ ކަމަށެވެ.

"ރޭގައިވެސް އަހަރެން ބުނި ފަދައިން، މިހާރު އެމީހުންނަށް ރައްކާތެރިކަން ލިބިދާނެ، އެކަމަކު ފަހުން ކުރިމަތި ވާނީ މަރު. އުންމީދަކީ އައި.އާރް.ޖީ.ސީ އާއި ފުލުހުން ސުލްހަވެރިކަމާއެކު އީރާނުގެ ގައުމީ ފިކުރުގެ މީހުންނާ ގުޅި، ގައުމަށް ހައްގުވާ މަތިވެރިކަން ހޯދައިދިނުމަށް އެކުގައި މަސައްކަތް ކުރުން،" ޓްރަމްޕް ވިދާޅުވިއެވެ.

ޓްރަމްޕް ވިދާޅުވި ގޮތުގައި، މެދުއިރުމައްޗަށާއި މުޅި ދުނިޔެއަށް ސުލްހަ ގެނައުމަށް އެމެރިކާއިން ކަނޑައަޅާފައިވާ މަގްސަދު ހާސިލްވަންދެން، އަމާޒުތަކަށް ދޭ ވަރުގަދަ ބޮމުގެ ހަމަލާތައް މެދުކެނޑުމެއް ނެތި މި ހަފުތާގެ ނިޔަލަށް ނުވަތަ ބޭނުންވާ މުއްދަތަކަށް ކުރިއަށްދާނެއެވެ.

އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ ހޮނިހިރު ދުވަހުގެ ކުރީކޮޅު ވިދާޅުވީ، އެމެރިކާ އާއި އިޒްރޭލުން ގުޅިގެން ދިން ހަމަލާތަކުގައި ޚާމަނައީ ދިރިއުޅުއްވާ އިމާރާތަށް ދިން ހަމަލާއެއްގައި އޭނާ އަވަހާރަވެފައިވާ ކަމުގެ ނިޝާންތައް ފެންނަން ހުރި ކަމަށެވެ.

"މިއަދު ހެނދުނު ކުއްލި ގޮތަކަށް ދިން ވަރުގަދަ ހަމަލާއެއްގައި، ތެހެރާންގެ މެދުތެރޭގައި ހުރި އަނިޔާވެރި އަލީ ޚާމަނައީގެ އިމާރާތް ވަނީ ސުންނާފަތިކޮށްލާފައި،" ޓީވީ މެދުވެރިކޮށް ދެއްވި ބަޔާނެއްގައި ނަތަންޔާހޫ ވިދާޅުވިއެވެ.

އޭނާ އިތުރަށް ވިދާޅުވީ، ފާއިތުވި 35 އަހަރަށްވުރެ ގިނަ ދުވަހު މި އަނިޔާވެރި ވެރިޔާ ދުނިޔެއަށް ބިރުވެރިކަން ފަތުރައި، އަމިއްލަ ރައްޔިތުންނަށް އަނިޔާކޮށް، އިޒްރޭލު ސުންނާފަތިކޮށްލުމަށް މެދުކެނޑުމެއް ނެތި މަސައްކަތް ކޮށްފައިވާ ކަމަށެވެ.

"އެ ރޭވުން މިހާރު ވަނީ ނިމުމަކަށް އައިސްފައި. އަދި މި އަނިޔާވެރި ވެރިޔާ ދުނިޔޭގައި ނެތް ކަމުގެ ގިނަ ނިޝާންތަކެއް އެބަހުރި،" ނަތަންޔާހޫ ވިދާޅުވިއެވެ.

އިޒްރޭލުގެ ދެ ޓީވީ ނެޓްވޯކަކުންވެސް ވަނީ އެމެރިކާ އާއި އިޒްރޭލުން އީރާނަށް ދިން ހަމަލާތަކުގައި ޚާމަނައީ އަވަހާރަވެފައިވާ ކަމަށް ރިޕޯޓްކޮށްފައެވެ.

އިޒްރޭލުގެ ދައުލަތުގެ މީޑިއާ "ކާން" އިން އެކްސްގައި ކުރި ޕޯސްޓެއްގައި ބުނެފައިވަނީ "އަލީ ޚާމަނައީ އަވަހާރަވެއްޖެ" ކަމަށެވެ. އަދި އިޒްރޭލުގެ ޗެނަލް 12 އިން މަސްދަރަކާ ހަވާލާދީ ބުނެފައިވަނީ ޚާމަނައީ އަވަހާރަވެފައިވާ ކަމަށެވެ.

އުމުރުން 86 އަހަރުގެ ޚާމަނައީ އީރާނުގެ އެންމެ މަތީ ވެރިޔާގެ މަގާމާ ހަވާލުވެވަޑައިގަތީ 1989 ވަނަ އަހަރު، އެ ގައުމުގެ އިސްލާމީ އިންގިލާބުގެ ބާނީ ރޫހުﷲ ޚުމައިނީ އަވަހާރަވުމާ ގުޅިގެންނެވެ. ރޫހާނީ ލީޑަރުގެ ހައިސިއްޔަތުން އޭނާގެ އަތްޕުޅުގައި އީރާނުގެ ސިޔާސީ، އަސްކަރީ އަދި ދީނީ މުއައްސަސާތަކުގެ ފުރިހަމަ ބާރު އޮވެއެވެ.

އީރާނުގެ ރޫހާނީ ލީޑަރުގެ މަގާމަކީ 1979 ވަނަ އަހަރުގެ އިންގިލާބަށްފަހު އުފައްދައި، ގާނޫނުއަސާސީގައި ހިމަނާފައިވާ މަގާމެކެވެ. މި މަގާމުގައި ހުންނަވާ ބޭފުޅަކަށް ރައީސާއި ޕާލަމެންޓަށްވުރެ މަތީ ބާރުތަކެއް ލިބިގެންވެއެވެ. ރޫހާނީ ލީޑަރު ރަސްމީކޮށް އިންތިޚާބު ކުރަނީ 88 މެންބަރުންގެ މައްޗަށް އެކުލެވޭ "އެސެމްބްލީ އޮފް އެކްސްޕާޓްސް" އިންނެވެ.