ރާއްޖެ އަށް ދަތުރުކުރަމުންދާ މެދުއިރުމަތީގެ ގިނަ ފްލައިޓްތައް ކެންސަލްވެ އޮޕަރޭޝަނަށް ބުރޫ އަރައިފި، ވީއައިއޭ އިން ބުނީ ތާށިވި ފަތުރުވެރިންގެ އަދަދު ބަލަމުންދާ ކަމަށް
28 ފެބުރުއަރީ 2026 | ހޮނިހިރު 19:02މެދުއިރުމަތީގެ މަސްރަހު ގޯސްވެ ވައިގެ މަގު ބަންދުކުރުމާ ގުޅިގެން، ގަތަރު އެއާވޭސް އާއި އެމިރޭޓްސް ފަދަ ބޮޑެތި އެއާލައިންތަކުގެ ދަތުރުތައް މެދުކަނޑާލުމުން ވެލާނާ އިންޓަނޭޝަނަލް އެއާޕޯޓުގެ އޮޕަރޭޝަންތަކަށް ބޮޑެތި ބުރޫތަކެއް ވަނީ އަރާފައި.
އެއާޕޯޓުގެ ބައެއް މަންޒަރުތައް | ސޯޝަލް މީޑިއާ
އިޒްރޭލް އާއި އެމެރިކާ ގުޅިގެން އީރާނަށް ދެމުންދާ ހަމަލާތަކުގެ ސަބަބުން މެދުއިރުމަތީގެ ވައިގެ ސަރަހައްދު ނުރައްކަލަށް ވެއްޓިފައި ވާތީ، ރާއްޖެއަށް ދަތުރުކުރާ ބައެއް ބޮޑެތި އެއާލައިންތަކުގެ ފްލައިޓްތައް ކެންސަލްވެ، ވެލާނާ އިންޓަނޭޝަނަލް އެއާޕޯޓް (ވީއައިއޭ)ގެ އޮޕަރޭޝަންތަކަށް ބުރޫ އަރައިފި އެވެ.
އިތުބާރު ހުރި މަސްދަރަކުން ރާއްޖެ އެމްވީ އަށް މައުލޫމާތު ދެމުން ބުނީ ހޮނިހިރު ދުވަހުގެ މެންދުރު، ރާއްޖެ އަށް ޖައްސަން ހަމަޖެހިފައި އޮތް މެދުއިރުމަތީގެ ފްލައިޓްތައް ކެންސަލްވި ހިސާބުން ފެށިގެން ވީއައިއޭގެ އޮޮޕަރޭޝަނަށް ބުރޫ އަރާފައިވާ ކަމަށެވެ. މި މައްސަލަ ދިމާވެފައި ވަނީ އީރާނުން މެދުއިރުމަތީގައި ހުންނަ އެމެރިކާގެ އަސްކަރީ މަރުކަޒުތަކަށް އަމާޒުކޮށް ދިން ހަމަލާތަކާއި ގުޅިގެން އެ ސަރަހައްދުގެ ވައިގެ މަގު ބަންދުކުރުމުންނެވެ.
މިކަމާއި ގުޅިގެން ވީއައިއޭގެ އޮޕަރޭޝަން ޝެޑިއުލް އާއި އެއްގޮތަށް ކުރިއަށް ނުގެންދެވި އެތައް ފަތުރުވެރިންނެއް އެއާޕޯޓުގައި ވަނީ ތާށިވެފަ އެވެ. ވީއައިއޭގެ މީޑިއާ އިން ރާއްޖެއެމްވީ އަށް ބުނީ މެދުއިރުމަތިގެ ގިނަ ފްލައިޓްތައް ކެންސަލް ވަމުންދާ ކަމަށެވެ. ކެންސަލްވި ފްލައިޓްތަކާއި އެކަމުގެ ސަބަބުން އެއާޕޯޓުގައި ނުފުރި ތާށިވި ފަތުރުވެރިންގެ ތަފްސީލް ބަލަމުންދާ ކަމަށާއި އެ މައުލޫމާތު ލިބުނުހާ އަވަހަކަށް ހާމަކުރާނެ ކަމަށް ވެސް އެ ފަރާތުން ވަނީ ބުނެފަ އެވެ.
ކެންސަލްވި ފްލައިޓްތަކުގެ ތެރޭގައި ރާއްޖެ އަށް އެންމެ ގިނައިން ފަތުރުވެރިން ދަތުރުކުރާ ގަތަރު އެއާވެސް އާއި އެމިރޭޓްސް އެއާލައިން ހިމެނެ އެވެ. އެ އެއާލައިންތަކުން ދަތުރުތައް މެދުކަނޑާލީ ސަލާމަތީ ސަބަބުތަކަށްޓަކާ ކަމަށް އެއާލައިންތަކުން އިއުލާންކޮށްފައިވެ އެވެ. ހޮނިހިރު ދުވަހު މާލެ އިން ދުބާއި އަށް ދަތުރުކުރި ފްލައިޓް ދުބާއީގައި ނުޖެއްސުމުން އަނބުރާ ރާއްޖެ އައިސްފައި ވެ އެވެ.
ބައެއް ނުރަސްމީ މަސްދަރުތަކުން ފެންނަ ގޮތުގައި އެއާޕޯޓުގައި އެތައް ސަތޭކަ ފަތުރުވެރިންނެއް ވަނީ ނުފުރި ތާށީވެފަ އެވެ. އެ ފަތުރުވެރިންނަށް ބޭނުންވާ އެހީތެރިކަން ޓްރެވެލް އެޖެންސީތަކާއި ރިސޯޓްތަކުން ވެސް ދަނީ ފޯރުކޮށްދެމުންނެވެ.
