މެދުއިރުމައްޗަށް ދަތުރުކުރާ ދިވެހިން ފްލައިޓުތަކުގެ އެންމެ ފަހުގެ މައުލޫމާތު ހޯދުމަށް އިލްތިމާސްކޮށްފި

އިޒްރޭލް އާއި އެމެރިކާ ގުޅިގެން އީރާނަށް ދެމުންދާ ހަމަލާތަކުގެ ސަބަބުން މެދުއިރުމަތީގެ ވައިގެ ސަރަހައްދު ނުރައްކަލަށް ވެއްޓިފައި ވާތީ، ރާއްޖެއަށް ދަތުރުކުރާ ބައެއް ބޮޑެތި އެއާލައިންތަކުގެ ފްލައިޓްތައް ކެންސަލްވަމުންދާތީ  މެދުއިރުމައްޗަށް ދަތުރުކުރާ ދިވެހީން  ފްލައިޓުތަކުގެ އެންމެ ފަހުގެ މައުލޫމާތު ހޯދުމަށް ސަމާލުވުމަށް އިލްތިމާސްކޮށްފި އެވެ.

މޯލްޑިވްސް އެއާޕޯޓްސް ކޮމްޕެނީ ޕްރައިވެޓް ލިމިޓެޑް (އެމްއޭސީއެލް) އިން ނެރެފައިވާ ޓްރެވަލް އެޑްވައިޒަރީގައި ބުނެފައި ވަނީ މެދުއިރުމަތީގެ ވައިގެ ސަރަހައްދު ވަގުތީގޮތުން ބަންދުކުރުމާއި ގުޅިގެން އެ ސަރަހައްދުގެ ޤައުމުތަކަށް ދަތުރުކުރައްވާ އެންމެހާ ފަރާތްތަކުން ވެސް އެއާޕޯޓަށް ވަޑައިގެންނެވުމުގެ ކުރިން އެ ފަސިންޖަރުން ފުރުމަށް ހަމަޖެހިފައިވާ ފްލައިޓުގެ މައުލޫމާތު އެއަރލައިންގެ ވެބްސައިޓާއި ޓުއަރ އޮޕަރޭޓަރުން މެދުވެރިކޮށް ހޯދުމަށް އެދޭ ކަމަށެވެ.

އެގޮތުން ދަތުރު ކުރާ އެއާލައިންގެ ވެބްސައިޓާއި މޮބައިލް އެޕްލިކޭޝަން މެދުވެރިކޮށް ދަތުރުގެ އެންމެ ފަހުގެ މައުލޫމާތު ހޯދުމަށް ވަނީ އެދިފަ އެވެ. އަދި ޓުއަރ އޮޕަރޭޓަރ މެދުވެރިކޮށް ފްލައިޓުގެ އެންމެ ފަހުގެ މައުލޫމާތު ހޯދުމާއި ދޭ އިރުޝާދަށް ތަބާވުމަށް ވެސް އެދިފައިވެ އެވެ. އަދި ދުރާލާ ދަތުރުގެ ކަންކަން ރޭވުމަށް ވެސް ވަނީ އިލްތިމާސްކޮށްފަ އެވެ. 

މީގެ އިތުރުން fs.com.mv އިން ފްލައިޓްތަކުގެ އެންމެ ފަހުގެ މައުލޫމާތު ލިބޭނެ ކަމަށް ވެސް ވަނީ ބުނެފަ އެވެ.