ހޫޘީ ލީޑަރު އީރާނަށް ދެމުންދާ ހަމަލާތައް ކުށްވެރިކޮށް، އެމެރިކާގެ އަސްކަރީ މަރުކަޒުތަކަށް ހަމަލާދިނުމަކީ އީރާނަށް ލިބިގެންވާ ގާނޫނީ ހައްގެއް ކަމަށް ބުނެފި
އީރާނަށް އަމާޒުކޮށް އެމެރިކާއާއި އިސްރާއީލުން ދެމުންދާ ހަމަލާތަކާ ގުޅިގެން ހޫޘީންގެ ލީޑަރު އަބްދުލް މާލިކް އަލް ހޫޡީ ވަނީ އެ ގައުމަށް ދޭ ކޮންމެ އުދުވާނަކަށް ހަރުކަށި ރައްދެއް ލިބޭނެ ކަމުގެ އިންޒާރު ދީފައި. އީރާނަކީ ސާބިތު ގައުމެއްކަން ފާހަގަކުރަމުން، އެމެރިކާގެ އަސްކަރީ މަރުކަޒުތަކަށް ހަމަލާދިނުމުގެ ގާނޫނީ ހައްގު އީރާނަށް ލިބިގެންވާ ކަމަށްވެސް އޭނާ ހާމަކުރި.
އީރާނުގެ ތެހެރާނުގައި ހުންނަ ޝަހްރާން ތެޔޮ ގުދަނަށް 2025 ވަނަ އަހަރުގެ ޖޫން މަހުގެ 15 ވީ އާދިއްތަ ދުވަހު އިޒްރޭލުން ދިން ހަމަލާއަކާ ގުޅިގެން، އެ ސަރަހައްދުން އަލިފާން ރޯވެ ދުންގަނޑު މައްޗަށް އަރަމުންދަނީ (ފައިލް). | ގެޓީ އިމޭޖަސް
ޔަމަނުގެ ހޫޘީ ހަނގުރާމަވެރި ޖަމާއަތުގެ ލީޑަރު އަބްދުލް މާލިކް އަލް ހޫޘީ، އީރާނަށް އަމާޒުކޮށް އެމެރިކާ އާއި އިޒްރޭލުން ދެމުންދާ ހަމަލާތައް ކުށްވެރިކޮށްފިއެވެ. އޭނާ ވަނީ އެ ހަމަލާތަކަކީ "އަނިޔާވެރި، ފާޅުކަން ބޮޑު، ޖިނާއީ އަދި އަނިޔާވެރި" އަމަލުތަކެއްގެ ގޮތުގައި ސިފަކޮށް، އެއީ އެއްވެސް ހައްގަކާ ނުލައި ދެމުންދާ ހަމަލާތަކެއް ކަމަށް ބުނެފައެވެ.
ހޫޘީންނަކީ އީރާނުން ވާގިވެރިވާ ހަނގުރާމަވެރި ޖަމާއަތްތަކުގެ ތެރެއިން އެއް ޖަމާއަތެވެ.
އަބްދުލް މާލިކް އަލް ހޫޘީ ނެރުނު ބަޔާނުގައި އިތުރަށް ބުނެފައިވަނީ، ކުރިމަތިވެދާނެ ކޮންމެ ހާލަތަކަށްވެސް އެ ޖަމާއަތް އޮތީ ތައްޔާރީ ހާލަތުގައި ކަމަށެވެ. އަދި އީރާނަކީ ބާރުގަދަ، ސާބިތު ގައުމަކަށް ވުމުން، އެ ގައުމަށް ދެމުންދާ އުދުވާނީ ހަމަލާތަކާ މެދު ކަންބޮޑުވުމެއް ނެތް ކަމަށާއި، އީރާނުން ދޭނެ ރައްދު ހަރުކަށިވާނެ ކަމަށްވެސް އެ ބަޔާނުގައިވެއެވެ. ނަމަވެސް، މި ހަމަނުޖެހުމުގެ ތެރެއަށް އީރާނުގެ ފަރާތުން ހޫޘީން އަމަލީ ގޮތުން ވަންނާނެތޯ ނުވަތަ ނޫންތޯ އެ ބަޔާނުގައި ހާމަކޮށްފައެއް ނުވެއެވެ.
މީގެ އިތުރުން، އީރާނާ ދެކޮޅަށް ހިންގާ އުދުވާނުގައި ބައިވެރިވާ އެމެރިކާގެ އަސްކަރީ މަރުކަޒުތަކަށް ހަމަލާދިނުމަކީ އީރާނަށް ލިބިގެންވާ ގާނޫނީ ހައްގެއް ކަމަށްވެސް ހޫޘީންގެ ބަޔާނުގައި ބުނެފައިވެއެވެ.
