ރަޝިޔާ އާއި ކުވެއިތުން އީރާން އަށް ކުރާ ދަތުރުތައް މެދު ކަނޑާލައިފި

އިޒްރޭލް އާއި އެމެރިކާ އިން އީރާން އަށް އަމާޒުކޮށް ހަމަލާ ދިނުމާ ގުޅިގެން މެދު އިރުމަތީގެ މަސްރަހު ނުތަނަވަސްވެފައިވާތީ، ރަޝިޔާ އާއި ކުވެއިތުން އީރާން އަށް ކުރާ ދަތުރުތައް މެދު ކަނޑާލައިފި އެވެ. 

ހޮނިހިރު ދުވަހުގެ ހަމަލާތަކާ ގުޅިގެން ރަޝިޔާ އާއި ކުވެއިތުގެ ދަތުރުތައް މެދު ކަނޑާލާފައިވާއިރު، މިކަމުގެ ސަބަބުން ފްލައި ދުބާއީގެ ދަތުރު ތަކަށް ވެސް ބޮޑެތި ބަދަލު ތަކެއް ވަނީ އައިސްފަ އެވެ. 

ރަޝިޔާގެ މިނިސްޓްރީ އޮފް ޓްރާންސްޕޯޓް އިން ހޮނހިރު ދުވަހު ހާމަ ކޮށްފައިވާ ގޮތުގައި، އެ ޤައުމުގެ އެއާލައިން ތަކުން އީރާން އާއި، އިޒްރޭލް އަށް ކުރަމުން ދިޔަ ހުރިހާ ދަތުރުތަކެއް މިހާރު ވަނީ ހުއްޓާލައިފަ އެވެ.

ހަމަލާތަކާ އެކު މެދު އިރުމަތީގައި އަސްކަރީ ކުރިމަތިލުންތައް ގިނަވެ، އީރާންގެ ނިއުކްލިއާ މައްސަލައިގައި ހުޅަނގުގެ ޤައުމުތަކާ އެކު ޑިޕްލޮމެޓިކް ޙައްލެއް ހޯދުމަށް ކުރަމުން ދިޔަ އުންމީދު ތަކަށް ވެސް ވަނީ ހުރަސް ތަކެއް ކުރިމަތިވެފަ އެވެ.

ރަޝިޔާގެ މިނިސްޓްރީ އިން ބުނި ގޮތުގައި، އީރާން އާއި އިޒްރޭލްގެ ވައިގެ ސަރަހައްދު ބަންދު ކުރުމާ ގުޅިގެން އެ ޤައުމުގެ އެއާލައިން ތަކުން ވަނީ މިނިސްޓްރީ އާއި ރޮސާވިއޭޝަން އޭވިއޭޝަން ވޮޗްޑޮގްއާ ގުޅިގެން ކުރިއާލައި ތައްޔާރު ކޮށްފައިވާ ބަދަލު މަގު ތަކެއް ބޭނުން ކުރަމުންނެވެ. 

މިއީ ޢަރަބި ޤަލްފުގެ ޤައުމު ތަކަށް ކުރާ ދަތުރު ތަކުގެ ސަލާމަތާއި ރައްކާތެރިކަން ކަށަވަރު ކުރުމަށްޓަކައި އެޅި މުހިންމު ފިޔަވަޅެއް ކަމަށް ވެސް އެ މިނިސްޓްރީ އިން ބުނެފައިވެ އެވެ.

މި ބަދަލުތަކާ ގުޅިގެން ދަތުރު ކުރަން ޖެހޭ ރާސްތާ ދިގުވުމުގެ ސަބަބުން، ފްލައިޓުތައް މަންޒިލަށް ފޯރުވުމަށް ހޭދަވާ ވަގުތު އިތުރުވާނެ ކަމަށް ވެސް ރަޝިޔާގެ ކަމާ ގުޅުން ހުރި އިދާރާ ތަކުން ވަނީ ބުނެފަ އެވެ. މަސްރަހު ދިރާސާ ކުރާ ފަރާތް ތަކުން ބުނާ ގޮތުގައި، ވައިގެ ސަރަހައްދުތައް ބަންދު ކުރުމުގެ ސަބަބުން ބައިނަލްއަޤުވާމީ ވައިގެ ދަތުރު ފަތުރަށް ބޮޑެތި ގޮންޖެހުން ތަކެއް ކުރިމަތިވެ، ގިނަ އެއާލައިން ތަކަކުން ދަނީ އެ ފަރާތްތަކުގެ ދަތުރު ތަކުގެ ރޫޓު ތަކަށް ބަދަލު ގެންނަމުންނެވެ.