އިރާނުގެ ހަމަލާތަކަށް ސައުދީން ބަދަލު ހިފުމުގެ އިންޒާރު ދީފި

އިރާނުން ސައުދީ އަރަބިއްޔާގެ ވެރިރަށް ރިޔާޒަށާއި އެ ގައުމުގެ އިރުމަތީ ސަރަހައްދުތަކަށް ހަމަލާތަކެއް ދީފައިވާކަން ސައުދީ ސަރުކާރުން ހޮނިހިރު ދުވަހު ކަށަވަރުކޮށްދީފިއެވެ. އަދި މި ހަމަލާތަކާ ގުޅިގެން އަމިއްލަ ގައުމުގެ ދިފާއުގައި ބަދަލުހިފުމުގެ ހައްގު ސައުދީއަށް ލިބިގެންވާކަމަށް އެ ގައުމުން ވަނީ އިންޒާރު ދީފައެވެ.

ސައުދީ އަރަބިއްޔާގެ ފޮރިން މިނިސްޓްރީން ނެރުނު ބަޔާނެއްގައި ބުނެފައިވަނީ، ރިޔާޒަށާއި އިރުމަތީ ޕްރޮވިންސްގެ ސަރަހައްދުތަކަށް އަމާޒުކޮށް އިރާނުން ދިން ފިނޑި އަދި ފާޅުކަން ބޮޑު ހަމަލާތައް އެންމެ ހަރުކަށި އިބާރާތުން ކުށްވެރިކުރާ ކަމަށެވެ. އަދި އެ ހަމަލާތައް ސައުދީގެ ދިފާއީ ބާރުތަކުން ނާކާމިޔާބު ކޮށްލާފައިވާ ކަމަށްވެސް އެ މިނިސްޓްރީން ބުނެފައިވެއެވެ.

އެއްވެސް އަސާސެއް ނެތި އިރާނުން ދިން މި އުދުވާނީ ހަމަލާތަކާ ގުޅިގެން، ސައުދީ އަރަބިއްޔާގެ ސަލާމަތާއި ރައްކާތެރިކަން ދަމަހައްޓައި، އެ ގައުމުގެ ބިމާއި ރައްޔިތުންނާއި އެ ގައުމުގައި ދިރިއުޅޭ ބޭރު މީހުން ހިމާޔަތް ކުރުމަށް އަޅަންޖެހޭ ހުރިހާ ފިޔަވަޅެއް އަޅާނެ ކަމުގެ ޔަގީންކަން ސައުދީ ސަރުކާރުން ވަނީ ދީފައެވެ. މީގެ ތެރޭގައި އެ ހަމަލާތަކަށް ރައްދު ދިނުމުގެ އިޚުތިޔާރު ބޭނުންކުރުންވެސް ހިމެނޭ ކަމަށް އެ ގައުމުން ބުނެފައިވެއެވެ.

އެމެރިކާއާއި އިޒްރޭލުން ގުޅިގެން ހޮނިހިރު ދުވަހު އިރާނުގެ އިސް ލީޑަރުންނަށް އަމާޒުކޮށް އަސްކަރީ ހަމަލާތަކެއް ދީފައިވާއިރު، މިއާއެކު މުޅި މެދުއިރުމަތި ވަނީ ބޮޑު ހަނގުރާމައެއްގެ ތެރެއަށް ވެއްޓިފައެވެ. މި ހަމަލާތަކާ ގުޅޭގޮތުން އެމެރިކާގެ ރައީސް ޑޮނަލްޑް ޓްރަމްޕް ވިދާޅުވީ، މިއީ އެމެރިކާއަށް އޮތް ސަލާމަތީ ނުރައްކާތައް ނައްތާލައި، އިރާނުގެ ވެރިން ވައްޓާލުމަށް އެ ގައުމުގެ ރައްޔިތުންނަށް ލިބުނު ފުރުސަތެއް ކަމަށެވެ.

އިރާނުގެ ވެރިރަށް ތެހެރާނުން ވަނީ އެމެރިކާއާއި އިޒްރޭލުގެ ހަމަލާތަކަކީ އެއްވެސް އުސޫލެއް ނެތް، ޣައިރު ގާނޫނީ ހަމަލާތަކެއްގެ ގޮތުގައި ސިފަކޮށްފައެވެ. އަދި އެ ހަމަލާތަކުގެ ރައްދުގައި އިރާނުން ވަނީ އިޒްރޭލަށާއި، އެމެރިކާގެ އަސްކަރީ މަރުކަޒުތައް ގާއިމުކޮށްފައިވާ ގަލްފުގެ ބައެއް ގައުމުތަކަށް މިސައިލް ހަމަލާތަކެއް ދީފައެވެ.