ބަހުރައިންގައި ހުންނަ އެމެރިކާގެ ފަސްވަނަ ފްލީޓްގެ މައި މަރުކަޒަށް "މިސައިލް ހަމަލާއެއް" އަމާޒުވެފައިވާ ކަމަށް އެ ގައުމުން ބުނެފި

ބަހުރައިންގައި ހުންނަ އެމެރިކާގެ ފަސްވަނަ ފްލީޓްގެ މައި މަރުކަޒަށް "މިސައިލް ހަމަލާއެއް" އަމާޒުވެފައިވާ ކަމަށް އެ ގައުމުން ހޮނިހިރު ދުވަހު ބުނެފިއެވެ. މި ހަމަލާ ދީފައިވަނީ އެމެރިކާ އާއި އިޒްރޭލުން ދިން ހަމަލާތަކުގެ ބަދަލު ހިފާނެ ކަމަށް އީރާނުން ބުނެފައިވާ ދަނޑިވަޅެއްގައެވެ.

ބަހުރައިންގެ ނޭޝަނަލް ކޮމިއުނިކޭޝަން ސެންޓަރުން ނެރުނު ބަޔާނެއްގައި ބުނެފައިވަނީ، އެމެރިކާގެ ފަސްވަނަ ފްލީޓްގެ ސާވިސް ސެންޓަރަށް މިސައިލް ހަމަލާއެއް އަމާޒުވެފައިވާ ކަމަށާއި، މި ހާދިސާއާ ގުޅޭ އިތުރު ތަފްސީލު ފަހުން ހާމަކުރާނެ ކަމަށެވެ.

މި ހާދިސާއާ ގުޅިގެން ހޮނިހިރު ދުވަހުގެ ފަހުގެ ވަގުތެއްގައި ބަހުރައިންގެ ސަރުކާރުން ބުނީ، އީރާނުގެ މިސައިލް ހަމަލާތަކުގެ އަމާޒަކަށް އެމެރިކާގެ ކަނޑުގެ ސިފައިންގެ ފަސްވަނަ ފްލީޓްގެ މައި މަރުކަޒު ހުރި ސަރަހައްދު ވުމާ ގުޅިގެން، އެ ސަރަހައްދުގައި ދިރިއުޅޭ މީހުން ރައްކާތެރި ހިސާބުތަކަށް ބަދަލުކުރުމުގެ މަސައްކަތް ފަށާފައިވާ ކަމަށެވެ.

ބަހުރައިންގެ މިނިސްޓްރީ އޮފް އިންޓީރިއާއިން ނެރުނު ބަޔާނެއްގައި ބުނެފައިވަނީ، ޖުފައިރު ސަރަހައްދުގައި ދިރިއުޅޭ ރައްޔިތުންނާއި ބިދޭސީން އެ ސަރަހައްދުން ހުސްކުރުމުގެ މަސައްކަތް އެ މިނިސްޓްރީން މިހާރު ފަށާފައިވާ ކަމަށެވެ. އަދި މި މަސައްކަތުގައި ކަމާބެހޭ އިދާރާތަކަށް ފުރިހަމަ އެއްބާރުލުން ދިނުމަށް އެ މިނިސްޓްރީން ވަނީ އިލްތިމާސްކޮށްފައެވެ.