އިޒްރޭލުގެ ހަމަލާގައި އީރާނުގެ ޑިފެންސް މިނިސްޓަރު އަވަހާރަވެއްޖެ ކަމަށް ބުނެފި

އިޒްރޭލުން ދިން ހަމަލާތަކުގައި އީރާނުގެ ޑިފެންސް މިނިސްޓަރު އާމިރު ނާސިރުޒާދާ އާއި އިސްލާމިކް ރިވަލޫޝަނަރީ ގާޑް ކޯޕްސް (އައިއާރުޖީސީ) ގެ ކޮމާންޑަރު މުހައްމަދު ޕަކްޕޫރު އަވަހާރަވެފައިވާ ކަމަށް ބެލެވޭ ކަމަށް، އިޒްރޭލުގެ އަސްކަރީ އޮޕަރޭޝަންތަކުގެ މައުލޫމާތު އެނގޭ ދެ މަސްދަރަކުންނާއި ސަރަހައްދީ މަސްދަރަކުން ބުނެފި ކަމަށް ރޮއިޓާސް އިން ރިޕޯޓު ކޮށްފި އެވެ.

އިޒްރޭލާއި އެމެރިކާ ގުޅިގެން ދިން މި ހަމަލާތަކަކީ މަސްތަކެއް ވަންދެން ރޭވުމަށްފަހު ދީފައިވާ ހަމަލާތަކެއް ކަމަށާއި، މި ހަމަލާތަކުގައި އީރާނުގެ އިސް އޮފިޝަލުން ބައްދަލުކުރައްވަމުން ގެންދެވި ތަންތަނަށް އަމާޒުކޮށްފައިވާ ކަމަށް އިޒްރޭލުގެ އަސްކަރީ އޮފިޝަލަކު ބުނެފައިވެ އެވެ. އަދި މި ހަމަލާތަކުގެ ނަތީޖާއެއްގެ ގޮތުން އީރާނުގެ އިސް ބައެއް ބޭފުޅުން އަވަހާރަކޮށްލެވިފައިވާ ކަމަށްވެސް އެ އޮފިޝަލު މައުލޫމާތު ދެއްވިއެވެ.

އިޒްރޭލުގެ އޮފިޝަލު އިތުރަށް ބުނީ، އީރާނުގެ ޓެރަރިސްޓް ސަރުކާރުގެ އިސްވެރިން އެއްވެ ތިބި ތިން ތަނަކަށް އެއްވަގުތެއްގައި ހަމަލާދީފައިވާ ކަމަށެވެ. އަދި މި ހަމަލާތަކުގައި، އީރާނުގެ އަސްކަރީ ކަންކަން މެނޭޖުކުރުމާއި ސަރުކާރު ހިންގުމުގައި މުހިންމު ދައުރެއް އަދާކުރައްވާ އިސް ބައެއް ބޭފުޅުން ނައްތާލެވިފައިވާ ކަމަށްވެސް އޭނާ ބުންޏެވެ.