ދުނިޔޭގައި ތެޔޮ އެކްސްޕޯޓްކުރާ އެންމެ މުހިންމު މަގު - ހޮރްމޫޒް ކަނޑުއޮޅި އީރާނުން ބަންދު ކުރި ކަމުގެ މެސެޖުތައް ބޯޓުފަހަރަށް ފޮނުވަން ފަށައިފި

ޔޫރަޕިއަން ޔޫނިއަން (އީޔޫ) ގެ ކަނޑުގެ ސަލާމަތާ ބެހޭ މިޝަން، "އެސްޕައިޑްސް" ގެ އޮފިޝަލަކު ހޮނިހިރު ދުވަހު ވިދާޅުވީ، ހޮރްމޫޒް ކަނޑުއޮޅިން އެއްވެސް އުޅަނދަކަށް ދަތުރުނުކުރެވޭނެ ކަމަށް ބުނެ އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައިއާރުޖީސީ) އިން ވީއެޗްއެފް ރޭޑިއޯ މެދުވެރިކޮށް އުޅަނދުފަހަރަށް މެސެޖު ފޮނުވަމުންދާ ކަމަށެވެ.

ހޮރްމޫޒް ކަނޑުއޮޅިއަކީ ދުނިޔޭގައި ތެޔޮ އެކްސްޕޯޓްކުރާ އެންމެ މުހިންމު މަގެވެ. މި ކަނޑުއޮޅިން ސައުދީ އަރަބިއްޔާ، އީރާން، އިރާގު އަދި ޔުނައިޓެޑް އަރަބް އެމިރޭޓްސް (ޔޫއޭއީ) ފަދަ ގަލްފުގެ އެންމެ ބޮޑެތި ތެޔޮ އުފައްދާ ގައުމުތައް، އޮމާން ކަނޑާއި އަރަބި ކަނޑާ ގުޅުވައިދެއެވެ.

ނަން ހާމަނުކުރުމަށް ޝަރުތުކޮށް ރޮއިޓާސް ނިއުސް އެޖެންސީއަށް މައުލޫމާތު ދެއްވަމުން އެ އޮފިޝަލް ވިދާޅުވީ، ހޮރްމޫޒް ކަނޑުއޮޅި ބަންދުކުރުމާ ގުޅޭ އެފަދަ އެއްވެސް އަމުރެއް އީރާނު ސަރުކާރުން ރަސްމީކޮށް އަދި ކަށަވަރުކޮށްދީފައި ނުވާ ކަމަށެވެ.

ޔޫކޭ މެރިޓައިމް ޓްރޭޑް އޮޕަރޭޝަންސް (ޔޫކޭއެމްޓީއޯ) އިން ހޮނިހިރު ދުވަހު ބުނި ގޮތުގައި، ގަލްފު ސަރަހައްދުގައި ދަތުރުކުރަމުންދާ އުޅަނދުފަހަރަށް ހޮރްމޫޒް ކަނޑުއޮޅި ބަންދުކޮށްފައިވާ ކަމުގެ މެސެޖުތައް ލިބެމުންދާ ކަމުގެ ގިނަ ރިޕޯޓުތަކެއް އެ އެޖެންސީއަށް ވަނީ ލިބިފައެވެ.

އީރާނަށް ދޭ ކޮންމެ ހަމަލާއެއްގެ ބަދަލުހިފުމުގެ ގޮތުން، އެ ގައުމުގެ ހަނި ކަނޑުގެ ސަރަހައްދު ބަންދުކުރާނެ ކަމުގެ އިންޒާރު ތެހެރާނުން ދެމުން އަންނަތާ މިހާރު އަހަރުތަކެއް ވެއްޖެއެވެ.

އެމެރިކާ އާއި އިޒްރޭލުން ހޮނިހިރު ދުވަހު އީރާނަށް އަސްކަރީ ހަމަލާތަކެއް ދީފައިވަނީ އެ ގައުމުގެ އިސް ލީޑަރުންނަށް އަމާޒުކޮށެވެ. މިއާއެކު މެދުއިރުމަތި ބޮޑު ހަނގުރާމައެއްގެ ތެރެއަށް ވެއްޓިފައިވާއިރު، ރައީސް ޑޮނަލްޑް ޓްރަމްޕް ވިދާޅުވީ މި ހަމަލާތަކުގެ ސަބަބުން އެމެރިކާއަށް އޮތް ސަލާމަތީ ނުރައްކާ ނިމުމަކަށް އަންނާނެ ކަމަށާއި، އީރާނުގެ ރައްޔިތުންނަށް އެ ގައުމުގެ ވެރިކަން ވައްޓާލުމުގެ ފުރުސަތު ލިބިގެންދާނެ ކަމަށެވެ.

ތެހެރާނުން ވަނީ އެމެރިކާ އާއި އިޒްރޭލުގެ މި ހަމަލާތަކަކީ އެއްވެސް އުސޫލެއް ނެތް، ޣައިރު ގާނޫނީ ހަމަލާތަކެއްގެ ގޮތުގައި ސިފަކޮށްފައެވެ. އަދި އޭގެ ރައްދުގައި އީރާނުން ވަނީ އިޒްރޭލަށާއި، އެމެރިކާގެ އަސްކަރީ މަރުކަޒުތައް ހުންނަ ގަލްފުގެ ބައެއް ގައުމުތަކަށް އަމާޒުކޮށް މިސައިލް ހަމަލާތަކެއް ދީފައެވެ.