މިއީ އެމެރިކާ އިން ވަންނަން ނުވެސް ޖެހޭ ހަނގުރާމަ އެއް: އޮމާން
އީރާނަށް އެމެރިކާ އާއި އިޒްރޭލުން ދިން ހަމަލާތަކާ ގުޅިގެން އޮމާންގެ ފޮރިން މިނިސްޓަރު ބަދުރު އަލްބުސައިދީ ވަނީ ވަރަށް ބޮޑަށް ކަންބޮޑުވުން ފާޅުކުރައްވައި، މިއީ އެމެރިކާގެ ހަނގުރާމައެއް ނޫން ކަމަށް ވިދާޅުވެފައި. މި ހަމަލާތަކުގެ ސަބަބުން ދެ ގައުމުގެ ދެމެދުގައި ކުރިއަށްދިޔަ މުހިންމު މަޝްވަރާތަކަށް ހުރަސްއެޅިފައިވާތީ، މި މައްސަލައިގެ ތެރެއަށް އިތުރަށް ނުވަނުމަށް އޭނާ ވަނީ އެމެރިކާއަށް ގޮވާލައްވާފައި.
އީރާނުގެ ވެރިރަށް ތެހެރާނުގައި 2024 ޑިސެމްބަރު 30 ވީ ހޯމަ ދުވަހު ބޭއްވި ނޫސްވެރިންގެ ބައްދަލުވުމެއްގައި، އޮމާންގެ ފޮރިން މިނިސްޓަރު ބަދުރު އަލްބުސައިދީ ބައިވެރިވެވަޑައިގަންނަވަނީ. | ރޮއިޓާސް
އެމެރިކާ އާއި އީރާނާ ދެމެދު ކުރިއަށްދާ މަޝްވަރާތަކުގައި މެދުވެރިއެއްގެ ދައުރު އަދާކުރައްވާ އޮމާންގެ ފޮރިން މިނިސްޓަރު، އެމެރިކާއާއި އިޒްރޭލުން އީރާނަށް ދެމުންދާ ހަމަލާތަކާ ގުޅިގެން ހޮނިހިރު ދުވަހު ކަންބޮޑުވުން ފާޅުކުރައްވައިފިއެވެ. އަދި އެމެރިކާއާ އެއްވެސް ގުޅުމެއް ނެތް މި ހަނގުރާމައިގެ ތެރެއަށް ވޮޝިންޓަނުން އިތުރަށް "ވަދެގަތުން" ހުއްޓާލުމަށް އޭނާ ވަނީ ގޮވާލައްވާފައެވެ.
އޮމާންގެ ފޮރިން މިނިސްޓަރު ބަދުރު އަލްބުސައިދީ އެކްސްގައި އާންމުކުރެއްވި ބަޔާނެއްގައި ވިދާޅުވީ، މި ހަމަލާތަކުގެ ސަބަބުން އޭނާ ވަރަށް ބޮޑަށް މާޔޫސްވެފައިވާ ކަމަށާއި، ދެ ގައުމުގެ ދެމެދުގައި ވަރަށް ސީރިއަސްކޮށް ކުރިއަށްދިޔަ މަޝްވަރާތަކަށް މިކަމުގެ ސަބަބުން އަނެއްކާވެސް ހުރަސް އެޅިފައިވާ ކަމަށެވެ.
މީގެ އިތުރުން، މި ހަނގުރާމައިގެ ތެރެއަށް އިތުރަށް ނުވަނުމަށް އެމެރިކާއަށް އިލްތިމާސްކުރައްވަމުން، މިއީ އެމެރިކާގެ ހަނގުރާމައެއް ނޫން ކަމަށްވެސް ބަދުރު އަލްބުސައިދީ ވިދާޅުވިއެވެ.
