އަބޫދާބީ އާއި ދުބާއީ ގައި ވަރުގަދަ ގޮވުންތަކެއް، އެކަކު މަރު!

ހޮނިހިރު ދުވަހު އީރާނުން ފޮނުވާލި ގިނަ އަދަދެއްގެ މިސައިލްތަކެއް ޔުނައިޓެޑް އަރަބް އެމިރޭޓްސް (ޔޫއޭއީ) ގެ ވައިގެ ސަރަހައްދުން ހުއްޓުވާފައިވާ ކަމަށް އެ ގައުމުން ބުނެފައިވާއިރު، މި ހަމަލާތަކާ ގުޅިގެން މަދުވެގެން އެކަކު މަރުވެފައިވާ ކަމަށް ރިޕޯޓްކޮށްފިއެވެ.

އީރާނުން މި ހަމަލާތައް ދީފައިވަނީ، ހޮނިހިރު ދުވަހުގެ ކުރީގެ ވަގުތެއްގައި އިޒްރޭލާއި އެމެރިކާއިން އީރާނަށް ދިން ހަމަލާތަކުގެ ބަދަލުހިފުމުގެ ގޮތުން ކަމަށް ބެލެވެއެވެ.

ޔޫއޭއީގެ ރަސްމީ ނޫސް އެޖެންސީ "ވަމް" އިން ނެރުނު ބަޔާނެއްގައި ބުނެފައިވަނީ، ވައިގެ ތެރޭގައި ގޮއްވާލި މިސައިލްތަކުގެ ބައިތައް މީހުން ދިރިއުޅޭ ސަރަހައްދަކަށް ވެއްޓުމުގެ ސަބަބުން އޭޝިއާގެ ރައްޔިތަކު މަރުވެފައިވާ ކަމަށެވެ. ނަމަވެސް އެއީ ކޮން ގައުމެއް ކަމެއް ކަމާބެހޭ އިދާރާތަކުން ހާމަކޮށްފައެއް ނުވެއެވެ.

އެމިރޭޓްސްގެ ޑިފެންސް މިނިސްޓްރީން ނެރުނު ބަޔާނެއްގައި ބުނެފައިވަނީ، މި ހަމަލާއަކީ ގައުމުގެ އިސްތިގުލާލާއި ބައިނަލްއަގުވާމީ ގާނޫނުތަކާ ކަނޑައެޅިގެން ޚިލާފަށް ދީފައިވާ ހަމަލާއެއް ކަމަށެވެ. އަދި މި ފަދަ ހަމަލާތަކަށް ރައްދު ދިނުމުގެ ފުރިހަމަ ހައްގު ޔޫއޭއީއަށް ލިބިގެންވާ ކަމަށާއި، ގައުމުގެ ސަރަހައްދާއި، ރައްޔިތުންނާއި، އެ ގައުމުގައި ދިރިއުޅޭ މީހުންގެ ރައްކާތެރިކަމުގެ އިތުރުން ގައުމުގެ މިނިވަންކަމާއި ހަމަޖެހުން ދެމެހެއްޓުމަށް އަޅަންޖެހޭ ހުރިހާ ފިޔަވަޅެއް އަޅާނެ ކަމަށްވެސް އެ މިނިސްޓްރީން ބުނެފައިވެއެވެ.

އަބޫދާބީ އާއި ދުބާއީގައި ދިރިއުޅޭ ބައެއް މީހުން "އަލް އަރަބިއްޔާ އިންގްލިޝް" އަށް މައުލޫމާތު ދެމުން ބުނެފައިވަނީ، ވަރަށް ބާރުގަދަ ގޮވުންތަކެއްގެ އަޑު އިވިފައިވާ ކަމަށެވެ.

އަބޫދާބީ އާއި ދުބާއީ އަކީވެސް އެމެރިކާގެ އަސްކަރީ މަރުކަޒުތައް ގާއިމުކޮށްފައިވާ ދެ ސިޓީއެވެ.

މި ހާދިސާއާ ގުޅިގެން ރައްކާތެރިކަމުގެ ފިޔަވަޅެއްގެ ގޮތުން ޔޫއޭއީގެ ވައިގެ ސަރަހައްދު "ވަގުތީ ގޮތުންނާއި ބައެއް ސަރަހައްދުތަކުން" ބަންދުކޮށްފައިވާ ކަމަށް އެ ގައުމުން ކުރިން ވަނީ ބުނެފައެވެ. މީގެ ސަބަބުން އެ ގައުމަށް ކުރާ ބައެއް ފްލައިޓްތަކަށާއި އެ ގައުމުން ފުރާ ބައެއް ފްލައިޓްތަކަށް ވަނީ ބުރޫއަރާފައެވެ.