އިޒްރޭލާއި އެމެރިކާއިން އީރާނަށް ދިން ހަމަލާގެ ޓާގެޓަކީ އީރާނުގެ ލީޑަރު

އިޒްރޭލާއި އެމެރިކާ ގުޅިގެން ހޮނިހިރު ދުވަހު އީރާނަށް ދިން ހަމަލާތަކުގައި، އެ ގައުމުގެ އެންމެ މަތީ ވެރިޔާ އާޔަތުﷲ އަލީ ޚާމަނާއީއަށް އަމާޒުކޮށްފައިވާ ކަމަށް އިޒްރޭލުގެ ދައުލަތުގެ މީޑިއާއިން ރިޕޯޓުކޮށްފިއެވެ.

އިޒްރޭލުގެ މަސްދަރަކާ ހަވާލާދީ "ކާން" ނިއުސް އިން ރިޕޯޓުކޮށްފައިވާ ގޮތުގައި، މި ހަމަލާތައް އަމާޒުކުރި މައިގަނޑު ފަރާތްތަކުގެ ތެރޭގައި އީރާނުގެ ލީޑަރު އަލީ ޚާމަނާއީގެ އިތުރުން ރައީސް މަސްއޫދު ޕެޒެޝްކިއަން ހިމެނިވަޑައިގަންނަވައެވެ.

މިކަމުގެ މައުލޫމާތު އެނގޭ މަސްދަރަކުން މީގެ ކުރިން ރޮއިޓާސްއަށް މައުލޫމާތު ދެމުން ބުނެފައިވަނީ، ހަމަލާތައް ދިން ވަގުތު ޚާމަނާއީ ތެހެރާންގައި ވަޑައިގެން ނެތް ކަމަށާއި، އޭނާ މިހާރު ހުންނެވީ ރައްކާތެރި ތަނަކަށް ބަދަލުކޮށްފައި ކަމަށެވެ.

އީރާނުގެ ސަރުކާރާ ގާތް ގުޅުމެއް އޮންނަ މަސްދަރަކުން ބުނި ގޮތުގައި، މި ހަމަލާތަކުގައި އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައި.އާރް.ޖީ.ސީ) ގެ އިސް ކޮމާންޑަރުންތަކަކާއި ސިޔާސީ ބައެއް އިސް ވެރިން ވަނީ އަވަހާރަކޮށްލާފައެވެ. ނަމަވެސް، މި ރިޕޯޓުތަކުގެ ސައްހަކަން މިނިވަން މުއައްސަސާއަކުން ރޮއިޓާސްއަށް އަދި ކަށަވަރު ކުރެވިފައެއް ނުވެއެވެ.

އެމެރިކާ އާއި އިޒްރޭލުން އީރާނަށް ދިން ހަމަލާތަކަށްފަހު، ރައީސް މަސްއޫދު ޕެޒެޝްކިއަންގެ ހާލުކޮޅު ރަނގަޅު ކަމަށް އެ ގައުމުގެ ދައުލަތުގެ މީޑިއާއިން ހޮނިހިރު ދުވަހުގެ ކުރީކޮޅު ވަނީ ރިޕޯޓުކޮށްފައެވެ.

އީރާނުގެ އިރްނާ ނިއުސް އެޖެންސީގެ އިތުރުން މެހެރް އަދި އިސްނާ  އެޖެންސީން ރިޕޯޓުކޮށްފައިވާ ގޮތުގައި، ރައީސް މަސްއޫދު ޕެޒެޝްކިއަން ހުންނެވީ ސަލާމަތުންނެވެ. އަދި އޭނާއަށް އެއްވެސް ނުރައްކަލެއް ކުރިމަތިވެފައި ނުވާ ކަމަށްވެސް އެ އެޖެންސީތަކުން ބުނެފައިވެއެވެ.