އީރާން އިން ސައުދީ އަަށް ހަމަލާ އަމާޒު ކުރި ކަމަށް އެ ޤައުމުން ބުނެފި

އީރާން އިން ސައުދީ އަރަބިއްޔާ އާއި، އެ ޤައުމުގެ ވެރި ރަށް ރިޔާޟް އަށް އަމާޒުކޮށް ހަމަލާ ތަކެއް ދީފައިވާ ކަމަށް ސައުދީ އިން ބުނެފި އެވެ.

ސައުދީގެ ފޮރިން މިނިސްޓްރީ އިން ބުނީ އީރާން އިން ފޮނުވާލި ހަމަލާތައް ސައުދީގެ ދިފާއީ ބާރު ތަކުން ހުއްޓުވައި ނާކާމިޔާބު ކޮށްްލާފައިވާ ކަމަށެވެ. 

އެ ބަޔާނުގައި ވަނީ މި ހަމަަލާތައް ވަރަށް ބޮޑަށް ކުށްވެރި ކޮށްފަ އެވެ. އެ މިނިސްޓްރީ އިން ބުނި ގޮތުގައި އެއްވެސް ބަހަނާއެއްގެ ދަށުން، ނުވަތަ އެއްވެސް ގޮތަކަށް މި ފަދަ ހަމަލާތައް ދިނުމަކީ ބަލައިގަނެވޭނެ ކަމެއް ނޫން ކަމަށެވެ. އަދި މިއީ އެއްވެސް އިންސާފެއް ނެތް، އަދި ދިފާއު ކުރެވޭނެ ފަދަ އަމަލެއް ނޫން ކަމަށް ވެސް ސައުދީ އިން ބުނެފައިވެ އެވެ.

މީގެ އިތުރުން ސައުދީ ސަރުކާރުން ބުނީ، އީރާން އަށް އަމާޒުކޮށް ދޭ އެއްވެސް ހަމަލާއެއްގައި ސައުދީގެ ވައިގެ ސަރަހައްދު އަދި ބިން ބޭނުން ކުރުމުގެ ފުރުސަތު ނުދޭނެ ކަމުގެ ޔަގީންކަން އެ ޤައުމުން ކުރިން ވެސް އީރާން އަަށް ދީފައި ވާނެ ކަމަށެވެ. 

އީރާންގެ ކަމާ ބެހޭ ފަރާތްތަކުން އެކަން އެނގި ތިބެ، ސައުދީ އަަށް އަމާޒުކޮށް މިފަދަ ހަމަލާ ތަކެއް ދިނުމަކީ ބޮޑު ކަންބޮޑުވުމެއް ކަމަށް އެ ޤައުމުން ފާހަގަ ކޮށްފައިވެ އެވެ.

މި ހަމަލާތަކާ ގުޅިގެން ސަރަހައްދީ މަސްރަހު އިތުރަށް ނުތަނަވަސްވެފައިވާއިރު، ސައުދީ އިން ބުނަމުން ދަނީ އެ ޤައުމުގެ ސިޔާދަތާއި ރައްކާތެރިކަން ދެމެހެއްޓުމަށް އަޅަން ޖެހޭ ފިޔަވަޅުތައްް އަޅާނެ ކަމަށެވެ.