ރައްދުގައި އީރާން އިން އެމެރިކާ އާއި، އިޒްރޭލްގެ ބޭސް ތަކަށް ހަމަލާ ދޭން ފަށައިފި

އެމެރިކާ އާއި އިޒްރޭލް އިން އީރާނަށް ފިން ހަމަލާ ތަކުގެ ރައްދުގައި، އީރާން އިން ހަމަލާ ދޭން ފަށައިފި އެވެ.

އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައިއާރްޖީސީ) އިން ބުނެފައި ވަނީ، އީރާން އިން އެމެރިކާ އާއި އިޒްރޭލްއާ ދެކޮޅަށް ޑްރޯން ހަމަލާތައް ފަށާފައިވަ ކަމަށެވެ. 

އައިއާރުޖީސީ އިން ބުނެފައި ވަނީ، އިސްލާމިކް ރިޕަބްލިކް އޮފް އީރާން އަށް ދުޝްމަނުން ދީފައިވާ ހަމަލާ ތަކަށް ރައްދު ދިނުމުގެ ގޮތުން އިޒްރޭލްގެ ސަރަހައްދު ތަކަށް މިސައިލް އާއި ޑްރޯން ތަކުން ފުރަތަމަ ހަމަލާ ދީފައިވާ ކަމަށެވެ. 

އެމެރިކާގެ އަސްކަރީ ބޭސް ތަކަށް އަމާޒުކޮށް އީރާން އިން ހަމަލާ ދޭން ފަށާފައިވާއިރު، ޤަތަރުން ބުނެފައި ވަނީ އީރާން އިން ފޮނުވާލި މިސައިލް ތަކެއް ޤަތަރުގެ ޕެޓްރިއޮޓް ދިފާއީ ނިޒާމުން ހުއްޓުވާފައިވާ ކަމަށެވެ. މިދިޔަ އަހަރުގެ ހަމަލާތަކާ ގުޅިގެން ވެސް އީރާން އިން ވަނީ ޤަތަރުގައި ހުރި އެމެރިކާގެ ބޭސް އަށް ހަމަލާ ދީފަ އެވެ. 

މީގެ އިތުރުން ބަހްރެއިން އިން ވަނީ، ގުގުމާލުންތައް ރިޕޯޓު ކޮށްފަ އެވެ. ރޮއިޓާސް އިން ބުނެފައި ވަނީ، އެމެެރިކާގެ ނޭވީ ބޭހެއް ހުންނަ ބަހްރެއިންގެ ޖުފައިރު ސަރަހައްދުން ދުން ތަކެއް އަރަމުން އަންނަ ކަމަށެވެ. ބަހްރެއިންގެ އިންޓީރިއާ މިނިސްޓްރީ އިން ވަނީ ކުރީބައިގައި އިންޒާރެއް ވެސް ނެރެފަ އެވެ. އަދި އެންމެ ކަައިރީގައި ހުރި ރައްކާތެރި ތަނަކަށް ދިޔުމަށް ރައްޔިތުންނަށް އިލްތިމާސް ކޮށްފައިވެ އެވެ. 

ބަހްރެއިން އިން ކަށަވަރު ކޮށްދީފައިވާ ގޮތުގައި، އެމެރިކާގެ ނޭވީގެ ފަސް ވަނަ ފްލީޓުގެ ހެޑް ކުއާޓަރަކަށް މިސައިލް ހަމަލާ ވަނީ ދީފަ އެވެ. 

އަލް ޖަޒީރާގެ އަރަބިކްގެ ނޫސްވެރިން ރިޕޯޓު ކުރި ގޮތުގައި ކުވެއިތުގައި ވެސް ގުގުމާލުންތައް އިވިފައިވާއިރު، ސައިރަންތައް އެކްޓިވް ކޮށްފައިވާ ކަމަށް ރިޕޯޓުތައް ބުނެ އެވެ. ރޮއިޓާސް އިން ވަނީ އަބޫދާބީގައި ވެސް ބާރު ގަދަ ގުގުމާލުން ތަކެއް ހިނގާފައިވާ ކަމަށް ރިޕޯޓު ކޮށްފަ އެވެ. 

އީރާން އިން ރައްދުގައި ހަމަލާ ދޭން ފަށާފައިވާއިރު، މިކަމުގެ ސަބަބުން މެދު އިރުމަތީގެ މަސްރަހު ވަނީ ވަރަށް ބޮޑަށް ހޫނުވެފަ އެވެ.