ނިއުކްލިއާ ހަތިޔާރު އުފެއްދުމަށް ބޭނުންވާ މާއްދާ ދުވަހަކު ވެސް ބޭނުން ނުކުރަން އީރާން އިން އެއްބަސްވެއްޖެ

ނިއުކްލިއާ ހަތިޔާރު އުފައްދަން ބޭނުންވާ މާއްދާ، ދުވަހަކު ވެސް ބޭނުން ނުކުރަން އީރާން އިން އެއްބަސްވެފައިވާ ކަމަށް ހާމަ ކޮށްފި އެވެ. 

މިކަން ހާމަ ކޮށްފައި ވަނީ އީރާން އާއި އެމެރިކާއާ ދެމެދު ކުރިއަށް ގެންދާ މަޝްވަރާ ތަކުގައި މެދުވެރިއެއްގެ ދައުރު އަދާ ކުރަމުން އަންނަ، އޮމާންގެ ފޮރިން މިނިސްޓަރު ބަދުރު އަލް ބުސައިދީ އެވެ. އޭނާ މިހެން ވިދާޅުވެފައި މި ވަނީ، އެމެރިކާ އިން އީރާން އަށް ހަމަލާ ތަކެއް ދީފާނެ ކަމުގެ ނުތަނަވަސްކަން ބޮޑުވެފައިވާ ވަގުތެއްގަ އެވެ. 

އެމެރިކާގެ ނައިބު ރައީސް ޖޭޑީ ވޭންސްއާ ބައްދަލު ކުރެއްވުމަށް ފަހު ސީބީއެސް ނޫހަށް ދެއްވި އިންޓަވިޔުއެއްގައި އަލް ބުސައިދީ ވިދާޅުވީ، މިހާރު ކުރިމަތިވެފައި ވަނީ އެމެރިކާގެ ކުރީގެ ރައީސް ބަރަކް އޮބާާމާގެ ވެރިކަމުގައި އެކުލަވާލި އެއްބަސްވުމުގައި ނެތް، މުޅިން އައު ކަމެއް ކަމަށެވެ. އަދި ސުލްޙައިގެ އެއްބަސްވުމަކާ ހަމައަށް ދެވޭނެ ކަމުގެ ފުރިހަމަ އިތުބާރު އޮތް ކަމަށް ވެސް އޭނާ ވަނީ ވިދާޅުވެފަ އެވެ. 

އީރާން އިން ދީފައިވާ ލުއިތަކާ ގުޅޭ ގޮތުން ސުވާލު ކުރުމުން އަލް ބުސައިދީ ވިދާޅުވީ، މިހާރު މަޝްވަރާ ކުރެވެމުން ދަނީ މުއްސަނދި ކޮށްފައިވާ ޔުރޭނިއަމް އެއްވެސް މިންވަަރަކަށް ރައްކާ ނުކުރުމާ ގުޅޭ ގޮތުން ކަމަށެވެ. އަދި މިހާރު ހުރި ޔުރޭނިއަންގެ ސްޓޮކް އެންމެ ދަަށް މިންވަރަކަށް، ނުވަތަ ޤުދުރަތީ މިންވަރަކަށް ބަދަލުކޮށް، އެ ތަކެތި އިންޖީނު ތަކުގައި ބޭނުން ކުރާ ތެލަށް ބަދަލު ކުރުމަށް އެއްބަސްވެފައިވާ ކަމަށް ވެސް އަލް ބުސައިދީ ހާމަ ކުރެއްވި އެވެ. 

އެއާ އެކު އޮމާންގެ ފޮރިން މިނިސްޓަރު އަލް ބުސައިދީ ވިދާޅުވީ، އެގޮތަށް ބަދަލު ކުރާ ތެލަކީ އަލުން އަނބުރާ ހަތިޔާރު އުފެއްދުމަށް ބޭނުން ކުރެވޭނެ އެއްޗެއް ނޫން ކަމަށެވެ. ހަމަ އެހެންމެ، ޑިޕްލޮމެޓިކް މަޝްވަރާ ތަކަށް އިިތުރު ވަގުތު ދެއްވުމަށް އޭނާ ވަނީ، އެމެރިކާގެ ރައީސް ޑޮނަލްޑް ޓްރަމްޕް އަށް ގޮވާލައްވައިފަ އެވެ. ނަމަވެސް، އެކަމާ ގުޅޭ ގޮތުން ފަހުން ޓްރަމްޕް ވިދާޅުވެފައި ވަނީ، އީރާން އާއެކު ކުރިއަށް ގެންދާ މަޝްވަރާތަކާ މެދު ހިތްހަމަ ޖެހިވަޑައި ނުގަންނަވާ ކަމަށެވެ. 

ޓްރަމްޕް ވިދާޅުވީ، އީރާން އިން އެއްވެސް މިންވަރަކަށް ޔުރޭނިއަމް މުއްސަނދި ކުރުމަކީ ތާއީދު ކުރައްވާނެ ކަމެއް ނޫން ކަމަށެވެ، އީރާންގެ ނިއުކްލިއާ މައްސަލައިގައި މަޝްވަރާތައް ކުރިއަށްދާއިރު، އެމެރިކާ އިން ދަނީ އީރާންއާ ދެކޮޅަށް ހަމަލާ ދޭނެ ކަމުގެ އިންޒާރު ތަކުރާރުކޮށް ދެމުންނެވެ. އެމެރިކާ އިން ވަނީ މެދު އިރުމަތީގެ ސަރަހައްދުގައި އެ ޤައުމުގެ އަސްކަރީ ބާރުވެރިކަން ވެސް އިތުރު ކޮށްފަ އެވެ. 

އޮމާން އަކީ، އެމެރިކާ އާއި އީރާންއާ ދެމެދު އާންމު ގޮތެއްގައި މެދުވެރިއެއްގެ ދައުރު އަދާ ކުރަމުން އަންނަ ޤައުމެވެ.