އީރާންގެ މަޝްވަރާތަކާ މެދު ޓްރަމްޕް ހިތްހަމަ ނުޖެހޭ، ހަމަލާ ދިނުމާ މެދު އަދި ގޮތެއް ނުނިންމާ

އެމެރިކާ އާއި އީރާންއާ ދެމެދު ކުރިއަށް ގެންދާ މަޝްވަރާތަކާ މެދު ހިތްހަމަ ޖެހި ވަޑައިނުގަންނަވާ ކަމަށާއި، އީރާން އަށް ހަމަލާ ދިނުމާ މެދު ވަކި ގޮތެއް ނިންމަވާފައި ނުވާ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ. 

ބުރާސްފަތި ދުވަހު ވަނީ އެމެރިކާ އާއި، އީރާންއާ ދެމެދު ތިން ވަނަ ބުރުގެ މަޝްވަރާ ބައްދަލުވުމެއް ސްވިޒަލެންޑުގެ ޖެނީވާގައި ކުރިއަށް ގެންގޮސްފަ އެވެ. އޭގެ ފަހުން ހުކުރު ދުވަހު ނޫސްވެރިންނާ ވާހަކަ ދައްކަވަމުން ޓްރަމްޕް ވިދާޅުވީ، ދީނީ އިލްމުވެރިންގެ ބާރު އޮންނަ އީރާން އިން އެމެރިކާ ބޭނުންވާ ކަންކަން ފުރިހަމަ ކޮށްދޭން ބޭނުން ނުވާ ކަމަށެވެ. 

އެއާ އެކު ނޫސްވެރިން ވަނީ އީރާންއާ ދެކޮޅަށް ބާރުގެ ބޭނުންކޮށް، އެ ޤައުމަށް ހަމަލާ ދިނުމާ ގުޅޭ ގޮތުން ޓްރަމްޕްއާ ސުވާލު ކުރައްވައިފަ އެވެ. އެ ސުވާލަށް ޖަވާބު ދެއްވަމުން ޓްރަމްޕް ވިދާޅުވީ، އެކަމުގައި އެންމެ ފަހުގެ ނިންމުމެއް ނިންމަވާފައި ނެތް ކަމަށެވެ. ނަމަވެސް، ފާއިތުވި ދުވަސް ތަކުގައި ޓްރަމްޕް ވަނީ ތަކުރާރުކޮށް އީރާން އަށް ހަމަލާ ދޭނެ ކަމުގެ އިންޒާރު ދެއްވައިފަ އެވެ.

އީރާން އިން މަޝްވަރާ ކުރަމުންދާ ގޮތާ މެދު މާ ބޮޑަށް ހިތްހަމަ ޖެހިވަޑައި ނުގަންނަވާކަން ފާހަގަ ކުރައްވަމުން ޓްރަމްޕް ވިދާޅުވީ، އީރާން އިން ނިއުކްލިއާ ހަތިޔާރު އުފެއްދިގެން ނުވާނެ ކަމަށެވެ. އަދި ނިއުކްލިއާ ހަތިޔާރު ބޭނުން ނުވާ ކަމަށް ބުނަން ޖެހޭ "ރަސް ބަސްތައް" އީރާން އިން ބުނަމުން ނުދާ ކަމަށް ވެސް ޓްރަމްޕް ވިދާޅުވި އެވެ. 

ނަމަވެސް، ތަކުރާރުކޮށް އީރާން އިން ބުނަމުން ދަނީ އެ ޤައުމުން ނިއުކްލިއާ ހަތިޔާރު އުފެއްދުމަށް މަސައްކަތް ނުކުރާނެ ކަމަށެވެ. އަދި އެމެރިކާގެ އިންޓެލިޖެންސް ރިޕޯޓު ތަކުން ވެސް، އީރާން އިން އެފަދަ ނިންމުމެއް ނިންމާފައިވާ ކަމުގެ އެއްވެސް ހެއްކެއް ފެންނާކަށް ނެތެވެ. ނަމަވެސް، އީރާން އަކީ ފަލަސްޠީނުގެ ހަމާސް ޖަމާއަތަށް ތާއީދު ކުރާ ޤައުމެއް ކަމަށް ބުނެ، އެމެރިކާ އާއި އިޒްރޭލް އިން ވަނީ އީރާންގެ ވާހަކަތައް ޤަބޫލު ނުކުރާނެ ކަމަށް ބުނެފަ އެވެ. 

އެމެރިކާ އިން އީރާން އަށް ހަމަލާ ދީފި ނަމަ، މެދު އިރުމަތީގެ ސަރަހައްދުގައި ބޮޑު ހަނގުރާމައެއް ފެށިދާނެތޯ ނޫސްވެރިން ސުވާލު ކުރުމުން ޓްރަމްޕް ވިދާޅުވީ، ކޮންމެ ކަމެއްގައި ވެސް ނުރައްކަލެއް އޮންނާނެ ކަމަށެވެ. އަދި ހަނގުރާމައެއް ކުރިއަށްދާ ނަމަ، ނުވަތަ ހަނގުރާމައެއް ފެށިއްޖެ ނަމަ، އޭގައި ރަނގަޅު އަދި ނުބައި ނަތީޖާއެއް ނިކުމެދާނެ ކަމުގެ ނުރައްކާ އޮންނާނެ ކަމަށް ވެސް ޓްރަމްޕް ވިދާޅުވި އެވެ.

އެމެރިކާ އާއި އިޒްރޭލް އިން ވެސް މިހާރު ބޭނުން ވަނީ އީރާންގައި އޮތް ވެެރިކަން ބަދަލު ކުރުމަށެވެ. މީގެ ކުރިން އެކަމާ ގުޅޭ ވާހަކަތައް ވަރަށް ފާޅުގައި ޓްރަމްޕް ދެއްކެވި ނަމަވެސް، މިފަހަރު އޭނާ އެ ވާހަކަ ދެއްކެވީ ވަރަށް ބޮޑަށް ސަމާލުވެ ހުންނަވައިގެންނެވެ. އެގޮތުން ޓްރަމްޕް ވިދާޅުވީ، ވެރިކަން ބަދަލުވާނެތޯ، ނުވަތަ ނޫންތޯ އެއްވެސް މީހަކަށް ނޭނގޭނެ ކަމަށެވެ. ނަމަވެސް މީގެ ކުރިން ޓްރަމްޕް ވިދާޅުވެފައި ވަނީ، އީރާންގެ ވެރިކަން ބަދަލުވުމަކީ އެންމެ ރަނގަޅު ގޮތް ކަމަށް ދެކެވަޑައިގަންނަވާ ކަމަށެވެ.