އިޒްރޭލް އިން އީރާން އަށް ހަމަލާ ދީފި

އެމެރިކާ އާއި އީރާންއާ ދެމެދު މަޝްވަރާތައް ކުރަމުން އަންނަ ވަގުތެއްގައި، އިޒްރޭލުން އީރާނަށް ހަމަލާ ދީފި އެވެ. 

އިޒްރޭލުން އީރާނަށް ހަމަލާ ދީފައި ވަނީ ހޮނިހިރު ދުވަހު އެވެ. ހަމަލާ ދިނުމަށް ފަހު އިޒްރޭލް އިން ބުނެފައި ވަނީ، މިއީ ރައްކާތެރި ކަމުގެ ފިޔަވަޅެއްގެ ގޮތުގައި ދިން ހަމަލާއެއް ކަމަށެވެ. މި ހަމަލާގެ ސަބަބުން މެދު އިރުމަތީގެ ސަރަހައްދު އަލުން ހަނގުރާމައިގެ ޙާލަތަކަށް ވެއްޓިފައިވާއިރު، އީރާނުގެ ނިއުކްލިއާ މައްސަލަ ހައްލު ކުރުމަށް ކުރިއަށް ގެންދަމުން އައި މަޝްވަރާ ތަކަށް ވެސް ހުރަސް ތަކެއް ކުރިމަތި ވާނެ އެވެ. 

އިޒްރޭލްގެ ޑިފެންސް މިނިސްޓަރު އިޒްރޭލް ކާޓްޒް ވިދާޅުވީ، އިޒްރޭލް އަށް ކުރިމަތިވެފައިވާ ނުރައްކާތައް ނައްތާލުމަށް، ރައްކާތެރި ކަމުގެ ފިޔަވަޅެއްގެ ގޮތުގައި އީރާނަށް ހަމަލާ ދީފައިވާ ކަމަށެވެ. މި ހަމަލާ އިޒްރޭލް އިން ދީފައިވާއިރު، މިދިޔަ އަހަރުގެ ޖޫން މަހުގެ ތެރޭގައި ވެސް އިޒްރޭލް އިން ވަނީ އީރާން އަށް ހަމަލާ ދީފަ އެވެ. 

އީރާންގެ މީޑިއާ ތަކުގައި ބުނެފައިވާ ގޮތުން، ހޮނިހިރު ދުވަހު އެ ޤައުމުގެ ވެރި ރަށް ތެހެރާންގައި ބާރު ގަދަ ގޮވުން ތަކެއްގެ އަޑު އިވުނެވެ. ހަމަލާ ދިނުމަށް ފަހު އިޒްރޭލްގެ ސިފައިންގެ ބާރު ތަކުން މަސައްކަތްތަކާއި، ސްކޫލްތައް ބަންދު ކުރުމަށް އިއުލާން ކޮށް، އަދި ވައިގެ ދަތުރު ތަކަށް އެއާ ސްޕޭސް ވެސް ބަންދު ކުރި އެވެ. 

އިޒްރޭލް އިން އީރާން އަށް ހަމަލާ ދީފައި މި ވަނީ، އީރާން އަށް ހަމަލާ ދޭނެ ކަމުގެ އިންޒާރު އެމެރިކާ އިން ތަކުރާރުކޮށް ދެމުން ގެންދަނިކޮށެވެ. މިދިޔަ އަހަރު ވެސް އިޒްރޭލް އިން އީރާނަށް ހަމަލާ ދިންއިރު، އެމެރިކާ އިން ވެސް ވަނީ އެ ހަމަލާތަކުގެ ތެރެއަށް ވަދެ އީރާން އަށް ހަަމަލާ ދީފަ އެވެ.