އީރާންގެ ރައީސް ޕެޒެޝްކިއާން ހުންނެވީ ސަލާމަތުކަން ކަށަވަރު ކޮށްދީފި

އިޒްރޭލް އާއި އެމެރިކާ އިން އީރާން އަށް އަމާޒުކޮށް ހަމަލާ ތަކެއް ދޭން ފަށާފައިވާއިރު، އީރާާންގެ ރައީސް މަސްއޫދު ޕެޒެޝްކިއާން ހުންނެވީ ސަލާމަތުން ކަމަށް އެ ޤައުމުގެ ދައުލަތުގެ މީޑިއާ ތަކުން ރިޕޯޓު ކޮށްފި އެވެ.

އީރާންގެ ރަސްމީ ނިއުސް އެޖެންސީ ކަމަށްވާ، އިރްނާ އިން ހޮނިހިރު ދުވަހު ބުނެފައި ވަނީ އެ ޤައުމުގެ ރައީސް ޕެޒެޝްކިއާން ހުންްނެވީ ވަރަށް ބޮޑަށް ރައްކާތެރިކަމާއި، ސަލާމަތްތެރިކަމާ އެކު ކަމަށެވެ. އަދި އެމަނިކުފާނަށް އެއްވެސް ނުރައްކާތެރި ކަމެއް ނެތް ކަމަށް ބުނެފައިވެ އެވެ. އިރްނާގެ އިތުރުން މެހެރު ނިއުސް އެޖެންސީ އާއި، އިސްނާ އިން ވެސް ވަނީ ރައީސް ޕެޒެޝްކިއާންގެ ޙާލު ކޮޅު ރަނގަޅު ކަމަށް ކަށަވަރު ކޮށްދީފަ އެވެ. 

މި މައުލޫމާތުތައް އީރާންގެ މީޑިއާ ތަކުން ހާމަ ކޮށްފައި މި ވަނީ، އިޒްރޭލުން އީރާންގެ އެކި ސަރަަހައްދު ތަކަށް އަމާޒުކޮށް ވަރުގަދަ ވައިގެ ހަމަލާތަކެއް ދީފައި ވަނިކޮށެވެ. ހަމަލާ ތަކުގެ ސަބަބުން އީރާނުގައި ނުތަނަވަސްކަން އުފެދިފައިވާއިރު، އީރާނުން މިހާރު ވަނީ ރައްދުގައި ހަމަލާ ދޭން ފަށައިފަ އެވެ. އީރާންގެ ވެރި ރަށް ތެހެރާން އާއި، އެ ސަރަހައްދު ވަށައިގެންވާ ތަން ތަނުން ބާރު ގަދަ ގޮވުން ތަކުގެ އަޑު އިވިފައިވެ އެވެ.

އީރާންގެ ދައުލަތުގެ މީޑިއާ ތަކުން ބުނާ ގޮތުގައި، ރައީސް ޕެޒެޝްކިއާންގެ ސަލާމަތީ ކަންކަން މިހާރު ވަނީ ވަރަށް ބޮޑަށް ވަރުގަދަ ކޮށްފަ އެވެ. އަދި ޤައުމަށް ދިމާވެފައިވާ މި ޙާލަތާ ގުޅިގެން ސަރުކާރުގެ އިސްވެރިންނާ އެކު އެމަނިކުފާނު ގެންދަވަނީ މަޝްވަރާ ކުރައްވަމުން ކަމަށް ވެސް ރިޕޯޓު ތަކުގައި ބުނެފައިވެ އެވެ.