ޑިޕްލޮމަސީ އަށް އިސްކަން ދޭނަން، އެކަމަކު ނިއުކްލިއަރ ހަތިޔާރުގެ ފުރުސަތު އީރާން އަށް ނުދޭނަން: ޓްރަމްޕް

އީރާން އާއި އެމެރިކާއާ ދެމެދު ކުރިއަށް ގެންދަމުން އަންނަ ނިއުކްލިއަރ މަޝްވަރާ ތަކުގައި ޑިޕްލޮމަސީ އަށް އިސްކަން ދެއްވާނެ ކަމަށާއި، އެހެން ނަމަވެސް ނިއުކްލިއަރ ހަތިޔާރުގެ ފުރުސަތު އީރާން އަށް ނުދޭނެ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ. 

ރިޔާސީ ދެ ވަނަ ދައުރުގެ ފުރަތަމަ ސްޓޭޓް އޮފް ޔޫނިއަންގެ ތަޤުރީރުގައި ޓްރަމްޕް ވިދާޅުވީ، އީރާން އާއި އެމެރިކާއާ ދެމެދު އޮތް މައްސަލަ ޑިޕްލޮމެޓިކް ގޮތެއްގައި ޙައްލު ކުރުމަށް އިސްކަން ދެއްވާނެ ކަމަށެވެ. ނަމަވެސް، އީރާން އަކީ ދުނިޔޭގައި އޮތް ޓެރަރިޒަމްގެ އެންމެ ބޮޑު ސްޕޮންސަރ ޤައުމު ކަމަށް ފާހަގަ ކުރައްވައި ޓްރަމްޕް ވިދާޅުވީ، ނިއުކްލިއަރ ހަތިޔާރު ހޯދުމުގެ ފުރުސަތު އެ ޤައުމަށް ނުދޭނެ ކަމަށެވެ. 

އީރާން އާއި އެމެރިކާއާ ދެމެދު މަޝްވަރާތައް ކުރިއަށް ގެންދަމުން އަންނައިރު، އެ މަޝްވަރާތައް އުންމީދީ ގޮތެއްގައި ކުރިއަށްދާ ކަމަށް ޓްރަމްޕް ވިދާޅުވި އެވެ. އެއާ އެކު، އީރާން އިން އެއްބަސްވުމަކަށް އެދޭކަން ފާހަގަ ކުރައްވައި ޓްރަމްޕް ވިދާޅުވީ، ނިއުކްލިއަރ ހަތިޔާރު އުފެއްދުން ދޫކޮށްލާނެ ކަމުގެ ޔަޤީންކަން އީރާން އިން ދީފައި ނުވާ ކަމަށެވެ. 

ޓްރަމްޕްގެ ރިޔާސީ ފުރަތަމަ ދައުރުގެ ތެރޭގައި ވަނީ، އެމެރިކާ އިން އީރާން އާއެކު ހަދާފައި އޮތް ނިއުކްލިއަރ އެއްބަސްވުމުން ވަކިވެފަ އެވެ. އެއީ ޓްރަމްޕްގެ ކުރިން ވެރިކަމުގައި ހުންނެވި ބަރަކް އޮބާމާގެ ވެރިކަމުގައި އެމެރިކާ އިން އީރާން އާއެކު ހަދާފައިވާ އެއްބަސްވުމެކެވެ. 2017 އިން 2020 އަށް ޓްރަމްޕް ރިޔާސީ ފުރަތަމަ ދައުރު އޮތްއިރު، އީރާން އާއެކު އޮތް އެއްބަސްވުން އުވާލައި އެ ޤައުމަށް ވަނީ ދަތި ކުރުމުގެ ފިޔަވަޅުތައް އަޅައިފަ އެވެ. 

މިދިޔަ އަހަރުގެ ތެރޭގައި ވެސް ވަނީ އީރާން އާއި އެމެރިކާއާ ދެމެދު ނިއުކްލިއަރ މަޝްވަރާތައް ކުރިއަށް ގެންގޮސްފަ އެވެ. ނަމަވެސް، ވަކި ހިސާބަކުން މަޝްވަރާތައް މެދު ކެނޑުނީ، އިޒްރޭލްއާ އެއްބައިވެ އެމެެރިކާ އިން އީރާން އަށް ހަމަލާ ދިނުމާ ގުޅިގެންނެވެ. އޭގެ ފަހުން މެދު ކެނޑުމަކަށް ފަހު އަނެއްކާ ވެސް ދެ ޤައުމުގެ ދެ މެދުގައި ވަނީ ނިއުކްލިއާ މަޝްވަރާތައް ފަށައިފަ އެވެ.