އެމެރިކާގެ ބިރު ދެއްކުން ތަކަށް ސީރިއަސްވުމަށް ގޮވާލައި، އެމެރިކާގެ ނައިބު ރައީސްގެ އިންޒާރު އީރާން އަށް

އެމެރިކާާ އިން އީރާނަށް ދެމުން އަންނަ އިންޒާރު ތަކާއި، ހަނގުރާމައިގެ ބިރު ދެއްކުންތައް ސީރިއަސްކޮށް ނެގުމަށް ގޮވާލައި، އެމެރިކާގެ ނައިބު ރައީސް ޖޭޑީ ވޭންސް އީރާން އަށް އިންޒާރު ދެއްވައިފި އެވެ. 

ވޭންސް މިހެން ވިދާޅުވެފައި ވަނީ، އަންގާރަ ދުވަހުގެ ރޭ އެމެރިކާގެ ރައީސް ޑޮނަލްޑް ޓްރަމްޕް ދެއްވި ސްޓޭޓް އޮފް ޔޫނިއަން ތަޤުރީރަށް ފަހު އެވެ. އެ ތަޤުރީރުގައި ވެސް ޓްރަމްޕް ވަނީ، އީރާނާއި އެމެރިކާ އާ ދެމެދު އޮތް ނުތަނަވަސް ކަމުގެ މައްޗަށް އަލި އަޅުވާލައްވައި ވާހަކަ ދައްކަވައިފަ އެވެ.

މެދު އިރުމަތީގައި އެމެރިކާގެ އަސްކަރީ ބާރުވެރިކަން އިތުރު ކުރަމުން އަންނަ ވަގުތެއްގައި ޓްރަމްޕް ވިދާޅުވެފައި ވަނީ، އެމެރިކާ އަށް ހަމަލާ ދެވޭނެ ފެންވަރުގެ މިސައިލްތައް އީރާން އިން ތައްޔާރު ކުރަމުން އަންނަ ކަމަށެވެ. ނަމަވެސް، އީރާނުން ވަނީ ޓްރަމްޕްގެ މި ވާހަކަތައް ދޮގު ކޮށްފަ އެވެ. 

އެމެރިކާ އާއި އީރާންއާ ދެމެދު ކުރިއަށް ގެންދަމު އަންނަ މަޝްވަރާ ތަކުގެ ތިން ވަނަ ބައްދަލުވުން ބުރާސްފަތި ދުވަހު އޮންނައިރު، ވޭންސް ވިދާޅުވީ، ޑިޕްލޮމެޓިކް ގޮތުން އީރާނާ އެކު އެއްބަސްވުމަކަށް އާދެވުނު ނަމަވެސް، ސިފައިން ބޭނުން ކުރުމުގެ ފުރިހަމަ ހައްގު އެމެރިކާގެ ރައީސްގެ އަތްޕުޅުގައި އޮތް ކަމަށެވެ. 

ފޮކްސް ނިއުސްއާ ވާހަކަ ދައްކަވަމުން ވޭންސް ވިދާޅުވީ، ދުނިޔޭގެ އެންމެ ނުރައްކާތެރި ސަރުކާރަށް ނިއުކްލިއާ ހަތިޔާރު ލިބިގެން ނުވާނެ ކަމަށެވެ. އެމެރިކާ އިން ގެންދަނީ އީރާންގައި އޮތް ވެރިކަން ވެސް ބަދަލު ވާން ޖެހޭ ކަމަށް ތަކުރާރުކޮށް ބުނަމުންނެވެ. އެމެރިކާގެ ވާހަކަތަކާ ގުޅިގެން އީރާނުން ތަކުރާރުކޮށް ބުނަމުން އަންނަނީ، އެ ޤައުމުން ނިއުކްލިއާ ހަތިޔާރު ހޯދަން މަސައްކަތް ނުކުރާ ކަމަށެވެ. އަދި އެ ޤައުމުގެ މިސައިލް ޕްރޮގްރާާމާ ގުޅޭ ގޮތުން އެމެރިކާ އާއި، އެ ޤައުމުގެ ރައީސް ޓްރަމްޕް ދައްކަވަނީ ދޮގު ވާހަކަ ތަކެއް ކަމަށް އީރާން އިން ބުނެފައިވެ އެވެ.

އީރާންގެ ނިއުކްލިއާ ޕްރޮގްރާމް ހުއްޓުވުމަށް އެމެރިކާގެ ރައީސް ޓްރަމްޕް އަށް އެހެނިހެން ގޮތް ގޮތުން ވެސް  ފިޔަވަޅު އެޅިދާނެ ކަމަށް ވޭންސް ވިދާޅުވި އެވެ. އަދި އެ ގޮތްތަކާއި، ވަސީލަތްތައް ބޭނުން ކުރުމަށް ޓްރަމްޕް ހުންނެވީ ތައްޔާރަށް ކަމަށާއި، ބުރާސްފަތި ދުވަހުގެ ބައްދަލުވުމުގައި އެކަން ސީރިއަސްކޮށް ބަލާނެ ކަމަަށް އުންމީދު ކުރައްވާ ކަމަށް ވޭންސް ވިދާޅުވި އެވެ. 

މީގެ އިތުރުން ވޭންސް ވިދާޅުވީ ސިފައިން ބޭނުން ނުކޮށް ވެސް މައްސަލަ ޙައްލު ކުރެވޭނެ ކަމަށް އުންމީދ ކުރައްވާ ކަމަށެވެ. އެއާ އެކު، ސިފައިންނާއި، އަސްކަރީ ބާރު ބޭނުން ކުރަން ޖެހިއްޖެ ނަމަ، އެކަން ވެސް ކުރައްވާނެ ކަމަށާއި، އެ ހައްގު ވެސް އޮތް ކަމަަށް ވޭންސް ވިދާޅުވި އެވެ. އެމެރިކާ އިން އީރާންއާ ދެކޮޅަށް ދަތި ކުރުމުގެ އެތައް ފިޔަވަޅު ތަކެއް އިއުލާން ކޮށްފައިވާއިރު، އީރާން އަށް މެކްސިމަމް ޕްރެޝަރު ކުރުމަށް ވެސް އެމެރިކާ އިން ނިންމާފައިވެ އެވެ. 

ބުރާސްފަތި ދުވަހު ސްވިޒަލެންޑުގެ ޖެނީވާގައި ތިން ވަނަ ބުރުގެ ބައްދަލުވުން އޮންނައިރު، އީރާނުގެ ރައީސް މަސްއޫދު ޕެޒެޝްކިއާން ވިދާޅުވީ، އެ ބައްދަލުވުމަށް އީރާނުގެ ފޮރިން މިނިސްޓަރު އައްބާސް އަރާގްޗީ ވަޑައިގެންނެވުމަކީ ރަނގަޅު ނަތީޖާއެއް ކަމަށެވެ. އީރާނުން އޮތީ ހަމަ ހަމަ ގޮތެއްގައި އެމެރިކާ އާއެކު އެއްބަސްވުމަކަށް އައުމަށް ތައްޔާރަށެވެ.