"އެމެރިކާ އަށް ހަމަލާ ދިނުމަށް، އީރާން އިން އަންނަނީ މިސައިލް ތައްޔާރު ކުރަމުން!"

އެމެރިކާ އަށް ހަމަލާ ދިނުމަށްޓަކައި، އީރާން އިން އަންނަނީ މިސައިލް ތައްޔާރު ކުރަމުން ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ.

ރިޔާސީ ދެ ވަނަ ދައުުރުގެ ފުރަތަމަ ސްޓޭޓް އޮފް ޔޫނިއަންގައި ޓްރަމްޕް ވިދާޅުވެފައި ވަނީ، މިދިޔަ އަހަރުގެ ތެރޭގައި އެމެރިކާ އިން ހަމަލާ ދީފައިވާ އީރާންގެ ނިއުކްލިއާ ޕްރޮގްރާމް އަލުން ބިނާ ކުރުމަށް ވެސް އީރާން އިން އަންނަނީ މަސައްކަތް ކުރަމުންނެވެ. މިދިޔަ އަހަރުގެ ހަމަލާ ތަކަށް ފަހު ޓްރަމްޕް ވިދާޅުވެފައި ވަނީ، އީރާންގެ ނިއުކްލިއާ ޕްރޮގްރާމް އެއްކޮށް ސުންނާފަތި ކޮށްލެވިފައިވާ ކަމަށެވެ. 

ޓްރަމްޕް މިހެން ވިދާޅުވެފައިވާއިރު، އީރާނުގެ ނިއުކްލިއާ ޕްރޮގްރާމްއާ ގުޅޭ ގޮތުން އެމެރިކާ އާއި އީރާންއާ ދެމެދު އަންނަނީ މަޝްވަރާތައް ކުރިއަށް ގެންދަމުންނެވެ. އެގޮތުން އަލުން މަޝްވަރާތައް ފެށުމަށް ފަހު މިހާތަނަށް ދެ ބައްދަލުވުމެއް ބާއްވާފައިވާއިރު، ބުރާސްފަތި ދުވަހު ތިން ވަނަ ބައްދަލުވުމެއް ވެސް ބޭއްވުމަށް ހަމަޖެހިފައިވެ އެވެ. 

މީގެ އިތުރުން ޓްރަމްޕް ވިދާޅުވެފައި ވަނީ، އޭނާ ބޭނުން ވަނީ ސިޔާސީ ގޮތުން މައްސަލަ ޙައްލު ކުރަން ކަމަށެވެ. ނަމަވެސް، މިހާރު ކުރިއަށް ގެންދާ މަޝްވަރާތައް ފެއިލް ވެއްޖެ ނަމަ، ބާރުގެ ބޭނުން ކުރަން އެމެރިކާ އޮތީ ތައްޔާރަށް ކަމަށް ޓްރަމްޕް ވިދާޅުވި އެވެ. މިހާތަނަށް ޓްރަމްޕް ގެންދަވަނީ، ބާރުގެ ބޭނުން ކުރަން ޖެހިދާނެ ކަމަށް ވިދާޅުވެ އީރާން އަށް އިންޒާރު ދެމުންނެވެ. 

މީގެ އިތުރުން ސްޓޭޓް އޮފް ޔޫނިއަންގައި ވާހަކަ ދައްކަވަމުން ޓްރަމްޕް ވިދާޅުވީ، ޔޫރަޕާއި، އެހެން ސަރަހައްދު ތަކުގައި ހުރި އެމެރިކާގެ ބޭސް ތަަކަށް ހަމަލާ ދިނުމަށް މީގެ ކުރިންވެސް އީރާން އިން މިސައިލް ތައްޔާރު ކޮށްފައިވާ ކަމަށެވެ. އަދި އެމެރިކާ އަށް ހަމަލާ ދޭނެ މިސައިލް ތައްޔާރު ކުރަން އީރާން އިން މަސައްކަތް ކުރަމުން އަންނަ ކަމަށް ޓްރަމްޕް ވިދާޅުވި އެވެ. 

މިދިޔަ އަހަރުގެ ތެރޭގައި އެމެރިކާގެ ޑިފެންސް އިންޓެލިޖެންސް އެޖެންސީ އިން ބުނެފައި ވަނީ، 2035 ވަނަ އަހަރާ ހަމައަށް، އީރާން އަށް އިންޓަކޮންޓިނެންޓަލް ބެލިސްޓިކް މިސައިލް ތައްޔާރު ކުރެވިދާނެ ކަމަށެވެ. ނަމަވެސް، އީރާން އިން އެފަދަ ނިންމުމެއް ނިންމާފައިވާ ކަމެއް އެ އެޖެންސީ އިން ބުނެފައި ނުވެ އެވެ. 

އެމެރިކާގެ ކޮންގްރެސް ރިސާޗް ސާވިސްގެ މައުލޫމާތުގައިވާ ގޮތުން، މިހާރު އީރާނުގައި ހުންނަނީ ކުރު އަދި މެދު ދުރުމިނުގެ ބެލިސްޓިލް މިސައިލް އެވެ. އެ މިސައިލް ތަކުން ހަމަލާ ދެވޭނީ 1850 މޭލު، ނުވަތަ 3000 ކިލޯ މީޓަރު ދުރު މިނަކަށެވެ. އީރާންގެ ހުޅަނގުގެ ކަނޑު އަޑިން އެމެރިކާގެ މައި ބިމާ ހަމައަށް 6000 މޭލަށް ވުރެ ދުރެއެވެ. 

މިދިޔަ އަހަރުގެ ތެރޭގައި އިޒްރޭލް އިން އީރާން އަށް ދިން ހަމަލާ ތަކުގެ ތެރެއަށް ވަދެ، އެމެރިކާ އިން އީރާން އަށް ހަމަލާ ދިނުމާ ގުޅިގެން، އީރާން އިން ވަނީ ޤަތަރުގައި ހުންނަ އެމެރިކާގެ ބޭސް އަކަަށް ހަމަލާ ދީފަ އެވެ.