ޕީއެންސީގެ ކައުންސިލަރުން ޖަލްސާއަށް ހާޒިރު ނުވެ ރައްޔިތުންގެ ހައްގުގައި މަސައްކަތެއް ނުކޮށް ދެވަނަ ދައުރަކަށް ކުރިމަތިލާނަމަ ރައްޔިތުން ވިސްނަންޖެހޭ: އާޒިމް
ހުޅުމާލެއަކީ މާލެ ސިޓީގެ ބައެއް ކަމަށްވީ ނަމަވެސް، އެޗްޑީސީން އެ ސަރަހައްދު ހިސޯރުކޮށްގެން އުޅުމަކީ ގާނޫނާ ޚިލާފު ކަމެއް ކަމަށް މޭޔަރު އާދަމް އާޒިމް ވިދާޅުވި. ކައުންސިލްގެ ޖަލްސާތަކަށް ހާޒިރުނުވާ ފެއިލްވެފައިވާ ކެންޑިޑޭޓުން ހޮވުމުގެ ބަދަލުގައި، ރައްޔިތުންގެ ހައްގުގައި ވަކާލާތުކުރާނެ އެމްޑީޕީގެ ކެންޑިޑޭޓުންނަށް ވޯޓު ދިނުމަށް މޭޔަރު ވަނީ އިލްތިމާސްކުރައްވާފައި. އެޗްޑީސީން ރައްޔިތުންގެ ލާބައަށް މަސައްކަތް ނުކުރާކަން ފާހަގަކުރައްވައި، ހުޅުމާލޭގެ ކަންކަން ސިޓީ ކައުންސިލާ ހަވާލުކުރަން ޖެހޭ ކަމަށްވެސް އޭނާ ވިދާޅުވި.
މާލެ ސިޓީގެ މޭޔަރު އާދަމް އާޒިމް ހުޅުމާލެ އުތުރުގައި ބޭއްވި ޕިކަޕް ޖަލްސާގައި ވާހަކަ ދައްކަވަނީ. | ރާއްޖެ އެމްވީ
ޕީއެންސީގެ ކެންޑިޑޭޓުންގެ ތެރެއިން މިހާރުވެސް ކައުންސިލް މެންބަރުކަމުގައި ތިބި ކައުންސިލަރުން ކައުންސިލް ޖަލްސާއަށް ހާޒިރު ނުވެ ރައްޔިތުންގެ ހައްގުގައި މަސައްކަތެއް ނުކޮށް ދެވަނަ ދައުރަކަށް ކުރިމަތިލާނަމަ ރައްޔިތުން ވިސްނަންޖެހޭ ކަމަށް މާލެ ސިޓީގެ މޭޔަރު އާދަމް އާޒިމް ވިދާޅުވެއްޖެ އެވެ.
ހުޅުމާލެ އުތުރުގައި ބޭއްވި އެމްޑީޕީގެ ޕިކަޕް ޖަލްސާގައި ވާހަކަދައްކަވަމުން މޭޔަރު އާޒިމް ވިދާޅުވީ ހުޅުމާލެ އުތުރުގައި ހުއްޓި ތިބޭއިރު ފެންނަނީ މުޅިން ވެސް "ގޮނޑު" ކަމަށާއި އެޗްޑީސީއަށް މިކަން ނުވާކަން ފެންނަ ކަމަށެވެ. އެޗްޑީސީ އަކީ ފައިދާއަށް މަސައްކަތްކުރާ ބައެއް ކަމަށާއި ރައްޔިތުންގެ ހެވާލާބައަށް މަސައްކަތްކުރާ ބައެއް ނޫން ކަމަށް އޭނާ ވިދާޅުވި އެވެ.
މޭޔަރު ވިދާޅުވީ ގާނޫނުއަސާސީ ބުނާ ގޮތަށް ހުޅުމާލެއަކީ މާލެ ސިޓީގެ ބައެއް ކަމުގައި ވާތީވެ މާލެ ސިޓީ ކައުންސިލަށް ހަވާލުކުރަން ޖެހޭ ކަމަށާއި އެހެންނަމަވެސް ހަވާލުނުކޮށް ތިބެ ގާނޫނާ ޚިލާފަށް އެތައް ކަމެއް ކުރަމުންދާ ކަމަށެވެ. މިސާލަކަށް އެމްޑީޕީ އިން ވާދަކުރާ މެންބަރު ޒާޔާގެ ޕޯސްޓަރުތަކަށް ހުއްދަ ދޭން ބުނެގެން ނުދޭ ކަމަށް އޭނާ ވިދާޅުވިއެވެ.
މި ދާއިރާގެ ކެންޑިޑޭޓް ޒާޔާގެ ބޯޑުތަކަށް ހުއްދަދޭން ބުނެގެން ނުދީ ތިބީ. އަޅުގަނޑު ބުނަން އޮތް ވާހަކައަކީ، ޒާޔާގެ ބޯޑު މިތާ ޖެހޭނޭ. ޒާޔާގެ (އިޝްތިހާރު) ބޯޑު ޖަހާށޭ، ނުވެސް ނެގޭނޭ، ޖަހަމުންދާށޭ. އެއީ މާލެ ސިޓީ ކައުންސިލުން ދޭންޖެހޭ ހުއްދައެކޭ. އެ ހުއްދަ މާލެ ސިޓީ ކައުންސިލުން ދޭނީ. އެ ހުއްދަ ދޭންޖެހޭނީ މާލެ ސިޓީ ކައުންސިލުން. މި ތަނުގެ ދުއްވާ އެއްޗެއްސާއި، މި ތަނުގައި އުޅެންޖެހޭ ގޮތާއި، މި ތަނުގެ ކަންތައްތަކުގެ ހުއްދަތައް ދޭންޖެހޭނީ މާލެ ސިޓީ ކައުންސިލުން. ހުޅުމާލެއަކީ މާލެ ސިޓީގެ ބައެއް. މާލެ ސިޓީގެ އަވަށެއް. އެހެންވީމާ، މިތާ ކަންތައްތަކުގައި ގާނޫނާ ޚިލާފަށް އެ ބޭފުޅުން މިތަން ހިފަހައްޓައި، ހިސޯރުކޮށްގެން އުޅުމަކީ ސީދާ ޤާނޫނުއަސާސީ ޚިލާފަށް ކުރަމުންދާ ކަމެއް.މާލެ ސިޓީގެ މޭޔަރު އާދަމް އާޒިމް
އެމްޑީޕީގެ ކެންޑިޑޭޓު ހޮވައިފި ނަމަ މި ހުރިހާ ކަންތައްތަކަށް ވަކާލާތުކުރާނެ ކަމަށާއި އެހެންނަމަވެސް އަނެއް ޕާޓީން ކުރިމަތިލާ ބޭފުޅާއަކީ ކައުންސިލުގެ ޖަލްސާއަށް ނާދެވޭ ބޭފުޅެއް ކަމަށް މޭޔަރު ވިދާޅުވިއެވެ. ޖަލްސާއެއް ނާދެވޭ ބޭފުޅެއް ކީއްކުރަން ކައުންސިލަށް ހޮވަންވީ ކަމަށް އޭނާ ސުވާލު ކުރެއްވިއެވެ.
މޭޔަރު ވިދާޅުވީ މާލޭގެ އަވަށެއް ކަމުގައިވާ ހެންވޭރުގެ ދާއިރާއަކަށް ކުރިމަތިލައިގެން ހޮވިފައި ހުރީމާ ދެން އެތަނުން ނުހޮވޭނެތީވެ މިހާރު ހުޅުމާލެ އުތުރަށް އައި ކަމަށާއި އެތަނުގެ ރައްޔިތުންނަށް ނުފެނޭ ކަމަށެވެ. ސީދާ ފެއިލްވެފައި ތިބޭ ކައުންސިލަރުން ހޮވުމަކީ ރައްޔިތުންނަށް ނުހަނު ގެއްލުންވާނެ ކަންތައްތައް ކަމަށް އޭނާ ވިދާޅުވިއެވެ.
ޖަލްސާއަށް ނާދެވޭ ބޭފުޅެއް ކީއްކުރަން މި ތަނަށް ހޮވަންވީ. ކީއްކުރަން ކައުންސިލަށް ހޮވަންވީ. މާލޭގެ އަވަށެއް ކަމަށްވާ ހެންވޭރުގެ ދާއިރާއަކަށް ކުރިމަތިލައިގެން ހޮވިފައި ހުރީމާ އެތަނުން ދެން ނުހޮވޭނެތީވެ، މިހާރު މި ތަނަށް އައިސް އުޅެނީ. އެތަނުގެ ރައްޔިތުންނަށް ނުފެނޭ. ނުފެނިފައި މިއަދު މި ތަނަށް އައިސް، މި ތަނުގެ ރައްޔިތަކަށް އޭނަ ފެންނަނީކީ ނޫން. އެހެންވީމާ، ކީއްކުރަންތޯއޭ މި ވަގުތު ވެސް ރައްޔިތުންގެ ކަންތައްތަކުގެ ނޫޅޭ މީހަކު ހޮވަންވީ. އެހެންވީމާ، ސީދާ ފެއިލްވެފައި ތިބޭ ކައުންސިލަރުން ހޮވުމަކީ ރައްޔިތުންނަށް ނުހަނު ގެއްލުންވާނެ ކަންތައްތައް.މާލެ ސިޓީގެ މޭޔަރު އާދަމް އާޒިމް
މޭޔަރު ވިދާޅުވީ މިހާރު ކުރަމުންދާ ހުރި މެންބަރުން ބާރަ ޖަލްސާތަކެއް އާދެވުނީ ދެ ޖަލްސާއަށް ކަމަށާއި އޭގެތެރެއިން އެއް ޖަލްސާއަށް ބޯ ދިއްކޮށްލި ކަމަށެވެ. މިކަހަލަ ބޭފުޅުން ހޮވައިގެން ގައުމެއް ކުރިއަރުވާނީ ކިހިނެއްތޯ ސުވާލު ކުރެއްވި އެވެ.
މޭޔަރު އެދިވަޑައިގަތީ ހުޅުމާލެ އުތުރު ދާއިރާގެ ޒާޔާއާއި ހުޅުމާލެ މެދު ދާއިރާގެ ސަފާތާއި ހުޅުމާލެ ދެކުނު ދާއިރާގެ ގާލިބު ހޮވައިދިނުމަށެވެ. އެ ބޭފުޅުން ހޮވައިދީފި ނަމަ ހުޅުމާލޭގައި ހިރަ މައްސަލަތައް ހައްލުކުރުމަށްޓަކައި ކެނޑިނޭޅި ވަކާލާތުކުރަމުންދާނެ ކަމަށް އޭނާ ވިދާޅުވި އެވެ.
