ސިވިލް ސަރވިސް މުވައްޒަފުންގެ މުސާރަ ވީ ކުޑަ، ބާވީސް ހާސް ލިބުނު މީހާ އަށް ލިބެނީ ސާދަހާސް ރުފިޔާ: އާޒިމް
ސިވިލް ސަރވިސް މުވައްޒަފުންގެ މުސާރަ ބޮޑުކުރި ކަމަށް ބުނެ ސަރުކާރުން ރައްޔިތުންނަށް އޮޅުވާލަމުންދާ ކަމަށް މާލޭގެ މޭޔަރު އާދަމް އާޒިމް ތުހުމަތު ކުރެއްވި. މީގެ އިތުރުން މާލޭގެ ރައްޔިތުންގެ ބޯހިޔާވަހިކަމުގެ މައްސަލަތަކަށް ހައްލު ހޯދައިދިނުމުގެ ބަދަލުގައި، ސަރުކާރުން އިސްކަންދެނީ އަމިއްލަ މަސްލަހަތާއި ސިޔާސީ ލެގަސީއަށް ކަމަށް ވިދާޅުވެ އާޒިމް ވަނީ ފާޑުވިދާޅުވެފަ.
މާލޭގެ މޭޔަރ އާދަމް އާޒިމް ރާއްޖެ ޓީވީ އަށް އިންޓަރވިއު ދެއްވަނީ. | ރާއްޖެ އެމްވީ
މި ސަރުކާރުން ސިވިލް ސަރވިސް މުވައްޒަފުންގެ މުސާރަ އިންތިހާ އަށް ކުޑަކޮށްފި، ބާވީސް ހާސް ލިބުނު މީހާ އަށް ލިބެނީ ސާދަހާސް ރުފިޔާ ކަމަށް މާލޭގެ މޭޔަރ އަދި އެމްޑީޕީގެ ޓިކެޓުގައި މާލޭގެ މޭޔަރ ކަމަށް ވާދަކުރައްވާ އާދަމް އާޒިމް ވިދާޅުވެއްޖެ އެވެ.
އާޒިމް އެފަދައިން ވިދާޅުވީ އާދިއްތަ ދުވަހުގެ ރޭ އެމްޑީޕީ ދޮރުން ދޮރަށް ހަރަކާތުގެ ތެރެއިން ރާއްޖެޓީވީ އަށް ދެއްވި ބަސްތީގަތުމެއްގަ އެވެ.
އާޒިމް ވިދާޅުވީ ކައުންސިލްގެ ސިވިލް މުވައްޒަފުންނަށް ވެސް މުސާރަ ބޮޑުކޮށްދީފައިވާ ކަމަށް ދާދި ފަހުން ސަރުކާރުން ބުނެފައިވާ ކަމަށެވެ. ނަމަވެސް ހަގީގަތަކީ އެއީ ނޫން ކަމަށް އާޒިމް ވިދާޅުވި އެވެ. އާޒިމް ވިދާޅުވީ ކައުންސިލް މުވައްޒަފުންގެ މުސާރަ ބޮޑުކޮށްދިން ކަމަށް ބުނެ ސަރުކާރުން ދައްކަނީ ރައްޔިތުންނަށް އޮޅުވާލުމަށް ދައްކާ ދޮގު ވާހަކަތައް ކަމަށެވެ. އެތައް ބައިވަރު ސިވިލް ސަރވިސް މުވައްޒަފުންނަށް މުސާރަ ކުޑަ ވުމުން އެ ޝަކުވާ ކުރަމުންދާ ކަމަށް އާޒިމް ވިދާޅުވި އެވެ.
"މިއަދު މި ލިބެނީ ދޮގުހަދާ އޮޅުވާލާ މީހުންނަށް ނޫނެކޭ ބުނަން ރަނުގެ ފުރުސަތެއް އެ ފުރުސަތުގެ ބޭނުން ހިއްޕަވަންވީ. ރައްޔިތުންނަށް އޮޅުވާލާ މީހުންނަށް ފުރުސަތު ދީގެން ނުވާނެ." އޭނާ ވިދާޅުވި އެވެ.
މި ސަރުކާރުން ހުރިހާ ކަމެއް ވެސް ކުރަނީ އަމިއްލަ އެދުން އިސްކުރާ އުސޫލުން ކަމަށް އާޒިމް ވަނީ ވިދާޅުވެފަ އެވެ. މާލޭގެ ރަށްވެހިންނަށް ގޯތި ދިނުމާއި ، ބޯހިޔާވަހިކަމުގެ އެހެނިހެން ޕްރޮޖެކްޓްތައް ނިންމުމުގައި ވެސް ސަރުކާރުން ގެންގުޅެނީ ސަރުކާރުގެ މަސްލަހަތު އިސްކުރުމުގެ އުސޫލު ކަމަށް އޭނާ ވިދާޅުވި އެވެ. 10 ފޫޓު 10 ފޫޓު ކޮޓަރީގައި ރައްޔިތުން ހާލުގައި ތިއްބާ، އަމިއްލަ ލެގަސީ އަށް ރަސްމާލެ އަށް ޚަރަދު ކުރުމަކީ ރައްޔިތުން އިސްނުކުރުން ކަމަށް އާޒިމް ވިދާޅުވި އެވެ.
"ރައްޔިތުން އެހާ ހާލުގައި ތިއްބާ އެ ކަންބޮޑުވުންތައް ހައްލު ނުކޮށްދީ ދެން މި ކުރާ ކަންކަމަކީ މިއީ ސަރުކާރުގެ މަސްލަހަތު އިސްކުރުން. ރައްޔިތުންގެ ކަންބޮޑުވުންތައް މުހިންމު ނުވާ ބަޔަކަށް ރައްޔިތުންނަށްޓަކާ ކޮށްދެވޭނެ ކަމެއް ނޮ އޮންނާނެ." އޭނާ ވިދާޅުވި އެވެ.
