އެމްޑީޕީ އިން ހެންވޭރު އުތުރުގެ ދޮރުން ދޮރަށް ހަރަކާތް ކާމިޔާބު ކަމާއި އެކު ބާއްވައިފި
ކުރިއަށް އޮތް އިންތިޚާބުތަކަށް ތައްޔާރުވުމަށް އެމްޑީޕީން ހެންވޭރު އުތުރުގައި ބޭއްވި ދޮރުން ދޮރަށް ހަރަކާތުގައި، މި ސަރުކާރަކީ ރައްޔިތުންގެ އަޑުނާހާ އަދި އަނިޔާވެރި ސަރުކާރެއްގެ ގޮތުގައި މާލޭގެ މޭޔަރު އާދަމް އާޒިމް ސިފަކުރެއްވި.
މާލޭގެ ދޮރުން ދޮރަށް ހަރަކާތް | ރާއްޖެ އެމްވީ
އިދިކޮޅު އެމްޑީޕީ އިން ކުރިއަށް އޮތް ކައުންސިލް އިންތިޚާބާއި ޑަބްލިއުޑީސީ އިންތިޚާބަށް ތައްޔާރު ވުމަށް ކުރިއަށް ގެންދާ ހަރަކާތްތަކުގެ ތެރެއިން، ހެންވޭރު އުތުރުގެ ދޮރުން ދޮރަށް ހަރަކާތް ކާމިޔާބު ކަމާއި އެކު ބާއްވައިފި އެވެ.
ހޯމަ ދުވަހުގެ ރޭގެ އެ ހަރަކާތުގައި ކެނޑިޑޭޓުންގެ އިތުރުން ރައްޔިތުންގެ މަޖިލީހުގެ ކުރީގެ މެމްބަރުން ވެސް ވަނީ ބައިވެރިވެވަޑައިގަންނަވާފަ އެވެ.
ދޮރުން ދޮރަށް އެ ހަރަކާތުގައި ވާހަކަދައްކަވަމުން މާލޭގެ މޭޔަރ އަދި މޭޔަރ ކަމަށް އެމްޑީޕީގެ ޓިކެޓުގައި ވާދަކުރައްވާ އާދަމް އާޒިމް ވިދާޅުވީ މި ސަރުކާރަކީ ރައްޔިތުންނަށް އަނިޔާ ދޭ ސަރުކާރެއް ކަމަށެވެ. އަދި ރައްޔިތުންގެ އަޑު ނާހާ ބީރު ކަންފަތެއް ދޭ ބަޔަކަށް ރައްޔިތުން ވެސް ބުނަން ވާނީ ނޫނެކޭ ކަމަށް އޭނާ ވިދާޅުވި އެވެ. ސަރުކާރުން ކަންކަން ކުރަމުންދާކަން ރައްޔިތުން މާޔޫސްވެފައިވާ ކަމަށް ވެސް އާޒިމް ވަނީ ވިދާޅުވެފަ އެވެ.
"އަޅުގަނޑުމެންނަކީ، އެމްޑީޕީ އަކީ ރައްޔިތުންގެ އަޑު އަހާނެ މީހުން. އަޅުގަނޑުމެން ރައްޔިތުންނަށް ދެރަ ގޮތަކަށް ކަންތައްތަކެއް ނުކުރާނަން. ސަރުކާރުގެ ޓްރެކް ރެކޯޑުން ފެންނަން އޮތީ އަނިޔާ އާއި އިހުމާލު." އާޒިމް ވިދާޅުވި އެވެ.
އާޒިމްގެ އިތުރުން އެ ދާއިރާ އަށް ވާދަކުރައްވާ އެހެނިހެން ބޭފުޅުން ވިދާޅުވީ ލާމަރުކަޒީ ނިޒާމަކީ އެމްޑީޕީ އިން ގެނައި އެމްޑީޕީގެ ނިޒާމެއް ކަމަށެވެ. އަދި ޕީއެންސީގެ ކައުންސިލަރުން މިހާރު ވެސް މާލޭ ސިޓީ ކައުންސިލްގެ ބައްދަލުވުންތައް ބޭއްވިޔަ ނުދީ ޖެއްސުން ކުރަމުންދާ ކަމަށާއި އެމްޑީޕީގެ ކެނޑިޑޭޓުންނަކީ އެފަދަ ކަންކަން ކުރާނެ ބައެއް ނޫން ކަަމަށް ކެނޑިޑޭޓުން ވަނީ ބުނެފަ އެވެ.
