ކައުންސިލް އިންތިޚާބުގެ ރޫހު އޮތީ އެމްޑީޕީ އާއި އެކުކަން ވަރަށް ސާފު: ރައީސް ސޯލިހު
ސަރުކާރުގެ ސިޔާސަތުތައް ގޯސްވެ ރައްޔިތުންނަށް ދަތިތަކާ ކުރިމަތިވަމުންދާތީ، ކުރިއަށް އޮތް އިންތިޚާބުތަކުގައި ރައްޔިތުން ތިބީ އެމްޑީޕީއާ އެކުގައިކަން، ކެމްޕެއިން ހަރަކާތްތަކުން ސާފުވާކަމަށް ރައީސް ސޯލިހު ވިދާޅުވި.
އެމްޑީޕީ ދޮރުން ދޮރަށް ހަރަކާތުގެ ތެރެއިން ރާއްޖެ އެމްވީ އަށް އިންޓަރވިއު އެއް ދެއްވަނީ | ރާއްޖެ އެމްވީ
ކުރިއަށް އޮތް ކައުންސިލް އިންތިޚާބާއި ޑަބްލިއުޑީސީގެ އިންތިޚާބުގެ ރޫހު އޮތީ މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އާއި އެކުގައިކަން ވަރަށް ސާފު ކަމަށް ކުރީގެ ރައީސް އިބްރާހިމް މުހައްމަދު ސޯލިހު ވިދާޅުވެއްޖެ އެވެ.
އެ މަނިކުފާނު އެފަދައިން ވިދާޅުވީ އެމްޑީޕީ އިން ބުރާސްފަތި ދުވަހުގެ ރޭ ބޭއްވި ދޮރުން ދޮރަށް ހަރަކާތުގެ ތެރެއިން ރާއްޖެ އެމްވީ އަށް ދެއްވި އިންޓަރވިއު އެއްގަ އެވެ. އެ މަނިކުފާނު ވިދާޅުވީ އަތޮޅު ތެރެ އާއި މާލޭގައި ހިންގާ ކެމްޕެއިން ހަރަކާތްތަކުން ރައްޔިތުން ތިބީ އެމްޑީޕީ އާއި އެކުގައި ކަން ސާފުވި ކަމަށެވެ. ރާއްޖޭގެ ކަންކަން ރަނގަޅުކޮށް ހަމަމަގަށް އަޅުވަން އާއްމުން ތިބީ ބޭނުން ވެފައި ކަަމަށް ވެސް ރައީސް ސޯލިހު ވިދާޅުވި އެވެ.
"ހަމަ ހަގީގަތުގައި ވެސް ސިޔާސަތުތައް ގޯސްވެ، ރައްޔިތުންނަށް އެތައް އުނދަނގޫތަކަކާއި މި ދެ އަހަރުގެ ތެރޭގައި ކުރިމަތިލާން ޖެހިފައި ތިބި ކަމަށް ހުރިހާ ބޭފުޅުން ވެސް ވިދާޅުވޭ. އަދި ހާއްސަކޮށް އަވަސް އަރުވާލައިގެން ރެފަރެންޑަމްގެ މަސައްކަތް ކުރިއަށް ގެންދާތީ އާއްމުން ކަންބޮޑުވޭ. އާއްމުން ތިބީ ނޫނެކޭ ބުނަން ތައްޔާރަށް." އެ މަނިކުފާނު ވިދާޅުވި އެވެ.
ރައީސް ސޯލިހު އިތުރަށް ވިދާޅުވީ ރިޔާސީ އިންތިޚާބާއި މަޖިލިސް އިންތިޚާބު އެއްކޮށްލުމާއި މެދު ފެންނަ ނުފެންނަ ވޯޓެއް ނަގަން މަޖިލީހުން ފާސްކުރީ ވަރަށް ކުއްލި ގޮތަކަށް ކަަމަށެވެ. މި ރެފަރެންޑަމްގެ ފަހަތުގައި ފޮރުވިފައިވާ ކަންތައްތަކެއް ހުންނާނެ ކަމަށް ރައީސް ސޯލިހު ވަނީ ވިދާޅުވެފަ އެވެ.
މީގެ އިތުރުން ރައީސް ސޯލިހު ވިދާޅުވީ މި ސަރުކާރުން ދަނީ ރައްޔިތުންގެ ވޯޓުލުމުގެ ހައްގުތައް ގެއްލޭ ގޮތަށް އަމަލުކުރަމުން ކަމަށެވެ. އެގޮތުން ވަޒީފާ ބަދަލުކުރުމާއި، ވަޒީފާ އިން ކަނޑާލުން ފަދަ ކަންކަން ވެސް ކުރަމުން ދަނީ އާއްމުންނަށް ފިއްތުންތައް ކުރިމަތި ކުރުވުމަށް ކަމަށް އެ މަނިކުފާނު ވިދާޅުވި އެވެ. ކޮންމެ މީހަކަށް ވެސް، އެ މީހަކު ބޭނުންވާ ސިޔާސީ ހަރަކާތްތަކުގައި ބައިވެރިވުމުގެ ފުރުސަތު އޮންނަން ވާނެ ކަމަށް އެ މަނިކުފާނު ވިދާޅުވި އެވެ.
