ނިއުކްލިއާ ހަތިޔާރު އުފެއްދުމަކީ އީރާން އިން ކުރާނެ ކަމެއް ނޫން ކަމަށް، އަނެއްކާ ވެސް ޕެޒެޝްކިއާން ވިދާޅުވެއްޖެ

ނިއުކްލިއާ ހަތިޔާރު އުފެއްދުމަކީ އީރާން އިން ކުރާނެ ކަމެއް ނޫން ކަމަށް، އެ ޤައުމުގެ ރައީސް މަސްއޫދު ޕެޒެޝްކިއާން އަނެއްކާ ވެސް ވިދާޅުވެއްޖެ އެވެ. 

ބުރާސްފަތި ދުވަހު ވާހަކަ ދައްކަވަމުން ޕެޒެޝްކިއާން ވިދާޅުވީ، އީރާންގެ ރޫޙާނީ ލީޑަރު އަދި، އެންމެ މަތީ ވެރިޔާ އާޔަތުﷲ އަލީ ޚާމަނައީ ވަނީ ފަނާ ކުރުވަނިވި ހަތިޔާރު، ނުވަތަ "ވެޕަންސް އޮފް މަސް ޑިސްޓްރަކްޝަން" އެފެއްދުން މަނާ ކުރައްވާފައި ކަމަށެވެ. 

އެއާ އެކު ޕެޒެޝްކިއާން ވިދާޅުވޯ ރޫޙާނީ ލީޑަރުގެ ނިންމެވުމުން ދޭހަވަނީ އީރާން އިން ނިއުކްލިއާ ހަތިޔާރު ތަރައްޤީ ނުކުރާނެކަން ކަމަށެވެ. އީރާންގެ ރައީސް ޕެޒެޝްކިއާން މިހެން ވިދާޅުވެފައި މި ވަނީ، އީރާން އާއި އެމެރިކާއާ ދެމެދު ކުރިއަށް ގެންދާ ނިއުކްލިއާ ޕްރޮގްރާމްއާ ގުޅޭ މައްސަލައިގައި ތިން ވަނަ ބައްދަލުވުން ބުރާސްފަތި ދުވަހު ކުރިއަށް ދަނިކޮށެވެ. 

އީރާން އިން ނިއުކްލިއާ ހަތިޔާރު އުފެއްދުމަށް މަސައްކަތް ކުރަމުންދާ ކަމަށް ބުނެ، އެމެރިކާ އިން ދަނީ މެދު ކެނޑުމެއް ނެތި އީރާން އަށް ތުހުމަތުތައް އަމާޒު ކުރަމުންނެވެ. އަދި އެކަމާ ގުޅިގެން އެމެރިކާ އާއި، އެ ޤައުމުގެ ވެރިން ގެންދަވަނީ އީރާން އަށް އިންޒާރު ދެއްވަމުންނެވެ. ނަމަވެސް، އީރާން އިން އަބަދު ވެސް ބުނަމުން ގެންދަނީ އެ ޤައުމުގެ ނިއުކްލިއާ ޕްރޮގްރާމް އަކީ ހަަމައެކަނި ސުލްޙަވެރި ބޭނުން ތަކަށް ކުރިއަށް ގެންދާ މަޝްރޫއެއް ކަމަށެވެ. 

އީރާންގެ ނިއުކްލިއާ ޕްރޮގްރާމްއާ ގުޅޭ އެންމެ ފަހުގެ ނިންމުންތައް ނިންމެވުމުގެ ޞާރު އޮންނަނީ ޚާމަނައީގެ އަތްޕުޅުގަ އެވެ. އެގޮތުން 2000 ވަނަ އަހަރުގެ ކުރީ ކޮޅު ޚާމަނާއީ ވަނީ، އީރާން އިން ނިއުކްލިއާ ހަތިޔާރު އުފެއްދުން މަނާ ކުރައްވައިފަ އެވެ. ޚާމަނާއީގެ އެ ފަތުވާ އަކީ އީރާންގެ ސިޔާސަތުތައް ބައްޓަން ކުރުމުގައި އެންމެ މުހިންމު އަސާސް ކަމަށް، އެ ޤައުމުގެ ސަރުކާރުން ބުނެ އެވެ. 

އީރާން އާއި ހުޅަނގުގެ ބާރުތަކާ ދެމެދު އޮތް ނުތަނަވަސްކަން ޙައްލު ކުރުމަށް ބާއްވާ މި މަޝްވަރާ ތަކަކީ ބައިނަލްއަޤުވާމީ މުޖުތަމައުން ވަރަށް ގާތުން ބަލަމުން ގެންދާ މައްސަލަ އެކެވެ. އީރާންގެ ރައީސް ޕެޒެޝްކިއާންގެ މި ވާހަކައާ އެކު، އީރާން އިން ބޭނުން ވަނީ ދުނިޔޭގެ ޤައުމު ތަކުގެ އިތުބާރު ހޯދައި، އެ ޤައުމަށް ކުރިމަތިވެފައިވާ ދަތި ކުރުމުގެ ފިޔަވަޅު ތަކުން ސަލާމަތްވުމަށް މަގު ފަހި ކުރުން ކަމަށް މަސްރަހު ދިރާސާ ކުރާ ފަރާތްތަކުން ޤަބޫލު ކުރެ އެވެ.