އީރާން އާއި، އެމެރިކާގެ ތިން ވަނަ ބުރުގެ މަޝްވަރާތައް ޖެނީވާގައި ފަށައިފި

އީރާންގެ ނިއުކްލިއާ މައްސަލައިގައި އެފެދިފައިވާ ނުތަނަވަސް ކަމަށް ސުލްޙަވެރި ޙައްލެއް ހޯދުމަށާއި، އެމެރިކާ އިން އީރާން އަށް ދީފާނެ އަސްކަރީ ހަމަލާ ތަކަކުން ސަލާމަތްވުމަށް އަމާޒުކޮށްގެން ސްވިޒަލެންޑުގެ ޖެނީވާގައި މަޝްވަރާތައް ފަށައިފި އެވެ.

ބުރާސްފަތި ދުވަހު ޖެނީވާގައި މަޝްވަރާތައް ފަށާފައިވާއިރު، މިއީ ތިން ވަނަ ބުރުގެ މަޝްވަރާ ބައްދަލުވުމެވެ. މި ދަނޑިވަޅަކީ މެދު އިރުމަތީގައި އެމެރިކާގެ އަސްކަރީ ބާރުވެރިކަން އިތުރުކޮށް، އެމެރިކާ އިން އީރާން އަށް އިންޒާރު ދެމުން އަންނަ ދަނޑިވަޅެކެވެ.

މަޝްވަރާ ތަކުގައި އެމެރިކާގެ ފަރާތުން ބައިވެރި ވަނީ އެ ޤައުމުގެ ރައީސް ޑޮނަލްޑް ޓްރަމްޕްގެ ޚާއްސަ މަންދޫބު ސްޓީވް ވިޓްކޮފް އާއި، ޓްރަމްޕްގެ ދަރިކަލުން ޖެރާޑް ކުޝްނާ އެވެ. އީރާންގެ ފަރާތުން މަޝްވަރާ ތަކުގައި އިސްކޮށް ބައިވެރިވެ ވަޑައިގަންނަވަނީ އެ ޤައުމުގެ ފޮރިން މިނިސްޓަރު އައްބާސް އަރާގްޗީ އެވެ. 

އޮމާންގެ ފޮރިން މިނިސްޓަރު ބަދުރު އަލް ބުސައިދީ މެދުވެރިއެއްގެ ދައުރު އަދާ ކުރައްވާ މި މަޝްވަރާ ތަކަކީ ނުސީދާ ގޮތެއްގައި ކުރިއަށް ގެންދާ މަޝްވަރާ ތަކެކެވެ. އެގޮތުން ބުރާސްފަތި ދުވަހު އޮމާންގެ ފޮރިން މިނިސްޓަރު އެމެރިކާގެ ވަފުދާ ބައްދަލު ކުރައްވައި، އީރާންގެ ހުށަހެޅުންތައް ހިއްސާ ކުރެއްވުމަށް ހަމަޖެހިފައިވެ އެވެ.

މި މަޝްވަރާ ތަކުގެ ކުރިން، އެމެރިކާގެ ކޮންގްރެސްގައި ދެއްވި ތަޤުރީރުގައި ވެސް ޓްރަމްޕް ވަނީ އީރާން އަށް ނިއުކްލިއާ ހަތިޔާރު އުފެއްދުމުގެ ފުރުސަތު ނުދޭނެ ކަމަށެވެ. ޑިޕްލޮމަސީގެ މަގުން މައްސަލަ ހައްލު ކުރުމަށް އިސްކަން ދެއްވި ނަމަވެސް، އީރާން އިން 10 ދުވަސް، ނުވަތަ 15 ދުވަހުގެ ތެރޭގައި އެއްބަސްވުމަކަށް އަންނަން ޖެހޭނެ ކަަމަށާއި، އެހެން ނޫން ނަމަ ވަރަށް ނުރައްކާތެރި ކަންތައްތަކާ ކުރިމަތި ވެދާނެ ކަމުގެ އިންޒާރު ޓްރަމްޕް ދެއްވާފައިވެ އެވެ. 

އީރާންގައި މި ފަހުން ސަރުކާރާ ދެކޮޅަށް ކުރިއަށް ގެންދިޔަ މުޒާހަރާ ތަކާ ގުޅިގެން އެ ޤައުމުގެ ސަރުކާރަށް ވަނީ ޕްރެޝަރު ބޮޑުވެފަ އެވެ. އެގޮތުން މިއީ އީރާންގެ ރޫޙާނީ ލީޑަރު އާޔަތުﷲ އަލީ ޚާމަނާއީގެ 36 އަހަރުވީ ވެރިކަމުގައި މިހާތަނަށް އެ ޤައުމުގެ ސަރުކާރަށް ކުރިމަތިވެފައިވާ އެންމެ ބޮޑު ގޮން ޖެހުން ކަމަށް ފާހަގަވެފައިވެ އެވެ. އެމެރިކާ އިން އީރާންއާ ދެކޮޅަށް އަޅާފައިވާ ދަތި ކުރުމުގެ ފިޔަވަޅު ތަކުގެ ސަބަބުން، އީރާން އަށް ވަނީ އިޤްތިޞާދީ ގޮތުން ބޮޑު ގޮންޖެހުން ތަކެއް ކުރިމަތިވެފަ އެވެ.