ކޮންގްރެސްގެ މުސްލިމް ދެ މެމްބަރަކު އެމެރިކާ އިން ބޭރު ކުރުމަށް ޓްރަމްޕް ގޮވާލައްވައިފި

އެމެރިކާާގެ ރައީސް ޑޮނަލްޑް ޓްރަމްޕް ދެއްވި ސްޓޭޓް އޮފް ޔޫނިއަންގެ ތަޤުރީރާ ދެކޮޅަށް، ކޮންގްރަސްގައި އަޑު އުފުލި މުސްލިމް ދެ މެމްބަރުން އެމެެރިކާ އިން ބޭރު ކޮށްލަން ޖެހޭ ކަމަށް އޭނާ ވިދާޅުވެއްޖެ އެވެ.

އަންގާރަ ދުވަހުގެ ރޭ ޓްރަމްޕް ދެއްވި ސްޓޭޓް އޮފް ޔޫނިއަންގައި އޭނާއާ ދެކޮޅަށް އަަޑު އުފުލި މުސްލިމް ދެ މެމްބަރުންނަކީ، އިލްހާމް އުމަރު އާއި، ރަޝީދާ ތަލައިބު އެވެ. ޓްރަމްޕްގެ ތަޤުރީރުގެ ތެރެއިން އިމިގްރޭޝަން ޤަވާއިދުތައް ހަރުކަށި ކުރުމުގެ ވާހަކަ އޭނާ ދެއްކެވުމުން، ފަލަސްޠީނުގެ ދަރިކޮޅަށް ނިސްބަތްވާ ރަޝީދާ ތަލައިބު އާއި، ސޯމާލިއާ ދަރިކޮޅަށް ނިސްބަތްވާ އިލްހާމް އުމަރު ވަނީ އެކަމަށް ފާޑު ވިދާޅުވެ، އަޑު ގަދަ ކުރައްވައިފަ އެވެ. 

ބުދަ ދުވަހުގެ ރޭ ޓްރުތު ސޯޝަލް މީޑިއާގައި ކުރެއްވި ޕޯސްޓެއްގައި ޓްރަމްޕް ވިދާޅުވީ، މުސްލިމް ދެ މެމްބަރުން އަމަލު ކުރެއްވީ ކޮަރަޕްޓްވެފައިވާ ސިޔާސީ ވެރިން ތަކެއް ފަދައިން ކަމަށާއި، އެ ދެ މެމްބަރުން އެމެރިކާ އިން ބޭރުކޮށްލަން ޖެހޭ ކަމަށެވެ. އެ ދެ މެމްބަރުންނަށް ވަރަށް ބޮޑަށް ފާޑު ވިދާޅުވެ ޓްރަމްޕް ވަނީ، އެ ދެ މެމްބަރުންނަކީ ސިކުނޑީގެ އުނި ކަމެއް ހުރި، އަދި މޮޔަވެފައިވާ ބައެއްގެ ގޮތުގައި ސިފަ ކުރައްވައިފަ އެވެ. 

މީގެ އިތުރުން އެ ދެ މެމްބަރުންނަކީ އެމެރިކާ އަށް އެއްވެސް ފައިދާއެއް ކުރާ ބައެއް ނޫން ކަމަށާއި، އެ މެމްބަރުންގެ ސަބަބުން ޤައުމަށް ލިބެނީ ގެއްލުން ކަމަށް ވެސް ޓްރަމްޕް ވިދާޅުވި އެވެ. އެއާ އެކު، ވީހާ ވެސް އަވަހަކަށް، އެ މެމްބަރުން "އެމީހުން އައި ތަނަކަށް" ފޮނުވާލަން ޖެހޭ ކަމަށް ޓްރަމްޕް ވަނީ ވިދާޅުވެފަ އެވެ. 

 ޓްރަމްޕްގެ ތަޤުރީރުގައި އޭނާ ވަނީ، ފެޑަރަލް ސަރުކާާރު އަދި އިދާރާ ތަކަށް އެއްބާރުލުން ނުދޭ ސިޓީތައް އުވާލަން ޖެހޭ ކަމަށް ވިދާޅުވެފަ އެވެ. އެއާ އެކު، އިލްހާމް އުމަރު އާއި ރަޝީދާ ތަލައިބު ވަނީ ޓްރަމްޕް އަށް ނުރުހުން އަމާޒުކޮށްފަ އެވެ. އެގޮތުން އެއީ އެމެރިކާގެ ރައްޔިތުން މެރުން ކަމަށް އެ ދެ މެމްބަރުން ސިފަ ކޮށްފައިވެ އެވެ. އެ ބައްދަލުވުމުގެ ފަހުން ސޯޝަލް މީޑިއާގައި ކުރެއްވި ޕޯސްޓެއްގައި އިލްހާމް އުމަރު ވަނީ، ޓްރަމްޕްގެ ސަރުކާރުން އޭނާ ނިސްބަތްވާ ދާއިރާގެ ދެ ރައްޔިތުން މަރާލާފައިވާކަން ޓްރަމްޕް އަށް ހަނދާން ކޮށްދެއްވައިފަ އެވެ. 

ޓްރަމްޕްގެ ޕޯސްޓުގައި މި ދެ މެމްބަރުންގެ ވާހަކަ އެކަނި ފާހަގަ ކޮށްފައި ވީ ނަމަވެސް، ސްޓޭޓް އޮފް ޔޫނިއަންގައި އެހެން މެމްބަރުން ވެސް ވަނީ ޓްރަމްޕް އަށް ފާޑު ވިދާޅުވެ ހަޅޭލަވައިފަ އެވެ.