ބައިޑަން އާންމު ފްލައިޓެއްގައި ދަތުރު ކުރައްވައި، އާންމުންނާ އެކު ފޮޓޯ ނެންގެވުމުގައި

އެމެރިކާގެ ކުރީގެ ރައީސް ޖޯ ބައިޑަން، އާންމު ފްލައިޓެއްގައި ދަތުރު ކުރައްވައި، އާންމުންގެ ގިނަ ބަޔަކާ އެކު ފޮޓޯ ނެންގެވި ވީޑިއޯ އަށް ގިނަ ބައެއްގެ ސަމާލުކަން ލިބިއްޖެ އެވެ. 

އެމެރިކާގެ ވެރި ރަށް ވޮޝިންޓަން ޑީސީގައި ހުންނަ ރޮނާލްޑް ރޭގަން އިންޓަނޭޝަނަލް އެއާޕޯޓް އިން ބައިޑަން ދަތުރު ކުރައްވާފައި ވަނީ ހުކުރު ދުވަހުގެ ހެނދުނު އެވެ. މިއީ އާންމު ފްލައިޓަކަށް ވާއިރު، ފްލައިޓަށް އަރާވަޑައިގެންނެވުމަށް ބައިޑަން ކިއޫގައި ހުންނެވި މަންޒަރު ވެސް ގިނަ ބަޔަކަށް ފެނިފައިވެ އެވެ. 

އެގޮތުން އެ ފްލައިޓުގައި ބައިޑަން ދަތުރު ކުރެއްވީ ސައުތު ކެރޮލައިނާގެ ކޮލަމްބިއާ އަށެވެ. އެއީ އެ ސްޓޭޓްގެ ޑިމޮކްރަޓިކް ޕާޓީ އިން ހުކުރު ދުވަހުގެ ހަވީރު ބޭއްވި އިވެންޓެއްގައި ބައިވެރިވެ ވަޑައިގެންނެވުމަށެވެ. ބައިޑަންގެ ރިޔާސީ ދައުރު ނިމުނުތާ އަހަރަޖަށް ވުރެ ގިނަ ދުވަސް ވެފައިވާއިރު، ބައިޑަން އުޅުއްވަނީ ސިޔާސީ ކަންކަމާ ވަރަށް ބޮޑަށް ދުރުގަ އެވެ. 

އާންމު ގޮތެއްގައި އެމެރިކާގެ ކުރީގެ ރައީސުން ވެސް ދަތުރު ކުރައްވަނީ ވަކި ފްލައިޓެއްގަ އެވެ. ނަމަވެސް، ގިނަ އާންމުންތަކަކާ އެކު، އާންމު ފްލައިޓެއްގައި ބައިޑަން ދަތުރު ކުރެއްވުމުން، ގިނަ ބައެއްގެ ސަމާލުކަން ވަނީ އެކަމަށް ލިބިފަ އެވެ. ފްލައިޓުގައި ބައިޑަން އިންނެވިއިރު، އާންމުން ބައިޑަންއާ ވާހަކަ ދައްކަވައި، ފޮޓޯ ނަގާ މަންޒަރު ވެސް ފެނިފައިވެ އެވެ،

އެ ފްލައިޓުގައި ބައިޑަން ދަތުރު ކުރެއްވިއިރު، ވައިގެ ނުސާފު ކަމުގެ ސަބަބުން ފްލައިޓުގައި ގިނަ އިރު ތަކެއް މަޑު ކުރައްވަން ޖެހުނެވެ. އެގޮތުން ފްލައިޓު ނައްޓާލަން ގާތް ގަނޑަކަށް އެއް ގަޑިއިރު ހޭދަވި ކަމަށާއި، އެއީ އެ ސަރަހައްދުގެ ވައި ވަރަށް ބޮޑަށް ނުސާފުވެފައި ވުމުން ކަމަށް ރިޕޯޓު ތަކުގައި ފާހަގަ ކޮށްފައިވެ އެވެ. 

ފްލައިޓުގައި ބައިޑަން އިންނެވިއިރު، އޭނާގެ އަރިހުގައި ސީކްރެޓް ސާވިސްގެ އޮފިސަރުން ތިއްބެވެ. އަދި ސަރަހައްދީ ފުލުހުންގެ ބާރު ތަކުގެ އޮފިސަރުން ވެސް ބައިޑަންގެ ސެކިއުރިޓީގެ ކަންކަން ބެލުމަށް އެއާޕޯޓުގައި ތިބިކަން ފާހަގަވެފައިވެ އެވެ. 

ބައިޑަންގެ މި ވީޑިއޯ ސޯޝަލް މީޑިއާގައި ހިއްސާކޮށް، ބައެއް މީހުން އޭނާ އަށް ތައުރީފު ކޮށްފައިވެ އެވެ. އެގޮތުން ކުރީގެ ރައީސުންގެ ދަތުރުފަތުރުގެ ކަންކަމަށް ދައުލަތުން އިންތިޒާމުތައް ހަމަޖައްސައި ދެމުން އަންނައިރު، އާންމު ރައްޔިތުންނާ އެއް ފްލައިޓެއްގައި ބައިޑަން ދަތުރު ކުރެއްވިކަން ގިނަ ބަޔަކު ފާހަގަ ކޮށްފައިވެ އެވެ.

މީގެ އިތުރުން އެ ފްލައިޓުން ދަތުރު ކުރި މީހަކު ވަނީ ޣައްޒާ ހަނގުރާމައާ ގުޅޭ ގޮތުން ބައިޑަންއާ ސުވާލު ކޮށްފަ އެވެ. އެގޮތުން އިޒްރޭލް އިން ޣައްޒާގައި ހަނގުރާމަ ކުރިއަށް ގެންގޮސް، އެތައް މައުސޫމު ކުޑަ ކުދިން ތަކެއް ޝަހީދު ކުރުމުގައި ބައިޑަން އާއި، އެމެރިކާ ބައިވެރިވެފައިވާ ކަމަށް އޭނާ ބުނެފައިވެ އެވެ.

ބައިޑަންގެ މި ދަތުރުގައި ޑިމޮކްރަޓިކް ޕާޓީގެ ޙަރަކާތެއްގައި އޭނާ ބައިވެރިވެ ވަޑައިގެންނެވިއިރު، ކުރިއަށް އޮތް ތަނުގައި އެ ޕާޓީގެ ޙަރަކާތް ތަކުން ބައިޑަން ފެންނާނެ ކަމަށް ގިނަ ބަޔަކު ފާހަގަ ކޮށްފައިވެ އެވެ.