އީރާނުގެ ފަރާތުން ވަގުތުން ކުރިމަތިވެދާނެ ނުރައްކަލެއް އޮތްކަމުގެ އެއްވެސް ހެއްކެއް ނެތި ބާރުގެ ބޭނުންކުރުމަކީ ބައިނަލްއަގުވާމީ ގާނޫނުތަކާ ޚިލާފު ކަމެއް: އަލްބަރާދައީ

އީރާނާ ދެކޮޅަށް އެމެރިކާއިން އިތުރު ހަނގުރާމައެއް ފަށައިފިނަމަ، އޭގެ ސަބަބުން ކުރިމަތިވާނެ ނަތީޖާތައް އިންތިހާއަށް ބިރުވެރިވާނެ ކަމުގެ އިންޒާރު، އދ. ގެ ނިއުކްލިއާ ވޮޗްޑޮގްގެ ކުރީގެ ވެރިޔާ މުޙައްމަދު އަލްބަރާދައީ ދެއްވައިފިއެވެ. އަދި މިފަދަ އައު އުދުވާނެއް ހިންގުމަށްޓަކައި، އެއީ ކުރަންޖެހޭ ކަމެއްކަން ދެއްކުމުގެ ގޮތުން ވޮޝިންޓަނުން ދައްކަމުންދާ ބަހަނާތަކަށް އޭނާ ވަނީ ރައްދު ދެއްވާފައެވެ.

ބުދަ ދުވަހު އެކްސްގައި ކުރެއްވި ޕޯސްޓެއްގައި އަލްބަރާދައީ ވިދާޅުވީ، އެމެރިކާއިން ދަނީ އީރާނާ ދެކޮޅަށް ހަނގުރާމައިގެ ބަސްމަގު ވަރުގަދަކޮށް، ހަނގުރާމައަކަށް ތައްޔާރުވަމުންދާކަމުގެ އިޝާރާތްތައް އިތުރުކުރަމުން ކަމަށެވެ.

އޭނާ އިތުރަށް ވިދާޅުވީ، އަމިއްލައަށް އިޚްތިޔާރުކޮށްގެން ކުރާ ހަނގުރާމަތައް ހިމެނޭހެން، ކޮންމެ ހަނގުރާމައަކީވެސް އޭގެ ސަބަބުން ބޮޑެތި ގެއްލުންތަކެއް ކުރިމަތިވާނެ ކަމެއް ކަމަށެވެ. އަދި ބައިނަލްއަގުވާމީ އުސޫލުތަކުގެ ދަށުން ހަނގުރާމަ ކުރުމުގައި ހުރަސްތަކާއި ހިފެހެއްޓުންތަކެއް ކަނޑައަޅާފައިވަނީ އެ ސަބަބަށްޓަކައި ކަމަށްވެސް އޭނާ ވިދާޅުވިއެވެ.

އިންޓަނޭޝަނަލް އެޓޮމިކް އެނާޖީ އެޖެންސީ (އައި.އޭ.އީ.އޭ) ގެ ކުރީގެ ޑިރެކްޓަރ ޖެނެރަލް ވިދާޅުވި ގޮތުގައި، ބާރުގެ ބޭނުން ކުރުމަށް ގާނޫނީ އެއްވެސް ބުރަދަނެއް ނެތްއިރު، އެކަމާ ގުޅޭ އެއްވެސް ތަފްސީލެއް ވޮޝިންޓަނަށް ދެއްކިފައެއް ނުވެއެވެ. އަދި ކުރިމަގުގައި ކޮށްފާނެ ކަމަށް ބެލެވޭ ކަންތައްތަކެއްގެ މައްޗަށް ބިނާކޮށް އުފައްދާފައިވާ ޚިޔާލީ ސިނާރިއޯތަކެއް ފިޔަވައި، އީރާނުގެ ފަރާތުން "ވަގުތުން ކުރިމަތިވެދާނެ ނުރައްކަލެއް" އޮތް ކަމުގެ އެއްވެސް ހެއްކެއް އެމެރިކާއަށް ދެއްކިފައި ނުވާކަމަށް އޭނާ ވިދާޅުވިއެވެ.

އެމެރިކާގެ ރައީސް ޑޮނަލްޑް ޓްރަމްޕް ވަނީ އީރާނާ މެދު ގެންގުޅުއްވާ ހަނގުރާމަވެރި ބަސްމަގު ވަރަށް ބޮޑަށް ވަރުގަދަކުރައްވާފައެވެ. މީގެ އިތުރުން، ހުޅަނގު އޭޝިއާ ސަރަހައްދާއި އިސްލާމީ ޖުމްހޫރިއްޔާ (އީރާން) ވަށައިގެންވާ ސަރަހައްދުތަކުގައި އެމެރިކާގެ އަސްކަރީ ބާރުތައް ވަނީ ވަރަށް ބޮޑަށް އިތުރުކޮށްފައެވެ.

މި ހަރުކަށި ފިޔަވަޅުތަކުގެ ތެރެއިން ވޮޝިންޓަނުން ވަނީ އެ ސަރަހައްދަށް ދެ އެއަރކްރާފްޓް ކެރިއަރާއި، ގިނަ އަދަދެއްގެ ހަނގުރާމަމަތީ ބޯޓުފަހަރާއި މިސައިލް ސިސްޓަމްތައް ފޮނުވާފައެވެ.

އެމެރިކާއިން އަސްކަރީ ބާރު ދައްކައި ބިރުދައްކަމުން މިދަނީ، ނިއުކްލިއާ މައްސަލައިގައި ޖެނީވާގައި ބާއްވާ ނުސީދާ މަޝްވަރާތަކުގެ ތިންވަނަ ބުރަކަށް ދެ ފަރާތުން ތައްޔާރުވަމުންދާ ދަނޑިވަޅެއްގައެވެ.

މީގެ ކުރިން އީރާނުގެ ފޮރިން މިނިސްޓަރު އައްބާސް އަރާގްޗީ ވިދާޅުވީ، ހައްލުނުވެ ހުރި މައްސަލަތަކުގައި އެއްބަސްވުމަކަށް އާދެވިދާނެ ކަމަށެވެ. ނަމަވެސް އެ ގައުމުގެ ހަތިޔާރު އެޅި ބާރުތައް އޮތީ ތައްޔާރަށް ކަމަށް ފާހަގަކުރައްވައި އޭނާ ވިދާޅުވީ، "މަގްސަދަކީ ހަނގުރާމައެއް ހުއްޓުވުން ކަމަށާއި، ހަނގުރާމައަކަށް ތައްޔާރުވެގެން ހުރެގެން ނޫނީ ހަނގުރާމަ ނުހުއްޓުވޭނެ" ކަމަށެވެ.

ނޯބެލް ސުލްހައިގެ އިނާމު ހާސިލްކުރައްވާފައިވާ އަލްބަރާދައީ ވަނީ މިދިޔަ މަހުވެސް އީރާނާ ދެކޮޅަށް އެމެރިކާއިން ދެމުންދާ އަސްކަރީ ހަމަލާގެ އިންޒާރުތައް ކުށްވެރިކުރައްވާފައެވެ.

އޭނާ ވިދާޅުވީ، ފެންނަން އޮތް ސާފު ނުރައްކަލެއް ނެތް ހާލަތެއްގައި އަދި ބައިނަލްއަގުވާމީ ގާނޫނުތަކާ ޚިލާފަށް އީރާނަށް އަސްކަރީ ހަމަލާއެއް ދޭނެ ކަމަށް ބުނެ އެއްފަރާތުން ދެމުންދާ އިންޒާރުތަކަކީ، އިރާގާ ދެކޮޅަށް ކުރި ޣައިރު ގާނޫނީ ހަނގުރާމައިގެ ކުރިން ފެނުނު ބިރުވެރި މަންޒަރުތައް ހަނދާންކޮށްދޭ ކަމެއް ކަމަށެވެ. އަދި އެ ހަނގުރާމަ ކުރީ ދޮގުތަކެއްގެ މައްޗަށް ބިނާކޮށް ކަމަށާއި އޭގެ ނަތީޖާ ވަރަށް ހިތްދަތި ކަމަށްވެސް އޭނާ ވިދާޅުވިއެވެ.

އަލްބަރާދައީ އެ އިޝާރާތް ކުރެއްވީ، އެމެރިކާ އިސްވެ އޮވެ އިރާގަށް އެރި އެރުން ދިފާއުކުރުމުގެ ގޮތުން، ބަޣުދާދުގެ އަތުގައި "ގިނަ އަދަދެއްގެ މީހުން މަރާލެވޭ ފަދަ ނުރައްކާތެރި ހަތިޔާރު" (ވެޕަންސް އޮފް މާސް ޑިސްޓްރަކްޝަން) ހުރި ކަމަށް އޭރު ހުޅަނގުގެ ބާރުތަކުން ކުރި ދައުވާއަށެވެ.

އިރާގަށް އެރި އެރުމުގެ ސަބަބުން އެތައް ހާސް ބައެއްގެ ފުރާނަ ގެއްލިގެންދިޔައިރު، ހަތިޔާރު ހުރި ކަމަށް ކުރި ދައުވާއަކީ ފަހުން ދޮގު ދައުވާއެއްކަން ވަނީ ހާމަވެފައެވެ.