މި ސަރުކާރުން ގެނެސްފައިވާ ޑޮލަރު މާރު ކުރުމުގެ ސިޔާސަތާއެކު ޑޮލަރުގެ އަގާއި، ތަކެތީގެ އަގު ދަނީ އެއްދުވަހުން އަނެއް ދުވަހަށް މައްޗަށް: އަމްރު

މި ސަރުކާރުން ގެނެސްފައިވާ ޑޮލަރު މާރު ކުރުމުގެ ސިޔާސަތާއެކު، ޑޮލަރުގެ އަގާއި، ތަކެތީގެ އަގު ދަނީ އެއްދުވަހުން އަނެއް ދުވަހަށް މައްޗަށް ކަަމަށް އެސްޓީއޯގެ ކުރީގެ މެނޭޖިންގ ޑިރެކްޓަރު ހުސައިން އަމްރު ވިދާޅުވެއްޖެ އެވެ.

ރައީސް ޑރ.މުހައްމަދު މުއިއްޒުގެ ސަރުކާރުން ވަނީ ޑޮލަރު މާރުކުރުން ގާނޫނުން މަޖުބޫރު ކޮށްފަ އެވެ. އެގޮތުން  ކޮންމެ ރިސޯޓަކުން ވެސް ފަތުރުވެރިއަކަށް 500 ޑޮލަރު މާރުކުރަން ޖެހެ އެވެ. އަދި މީހުން ދިރިއުޅޭ ރަށްރަށުގައި ހިންގާ ހޮޓާތަކާއި ގެސްޓްހައުސްތަކާއި ޓޫރިސްޓު އުޅަނދުތަކުން 25 ޑޮލަރު މާރުކުރަން ޖެހެ އެވެ. 14 ޑިސެންބަރު 2024 ގައި ރައީސް މުއިއްޒު ތަސްތީގު ކުރެއްވި މި ބިލާއެކު، މި ގޮތަށް ޑޮލަރު މާރު ކުރަން ފެށުމުން ތަކެތީގެ އަގު ހެޔޮވެ، ޑޮލަރުގެ ކަޅު ބާޒާރު އުވިގެންދާނެ ކަމަށް ސަރުކާރުން ބުނެފައިވެ އެވެ.

މިކަމާ ގުޅޭގޮތުން ރާއްޖެޓީވީގައި ވާހަކަ ދައްކަވަމުން އަމްރު ވިދާޅުވީ، ރާއްޖޭގެ ފަތުރުވެރިކަމުގެ ސިނާއަތް ވަރަށް ރަނގަޅު ކަމަށާއި، ކޮންމެ ދުވަހަކު ވެސް ގާތްގަނޑަކަށް 4000ށް ވުރެ ގިނަ ފަތުރުވެރިން ރާއްޖެއަށް އަންނަ ކަމަށެވެ. އަދި ވިދާޅުވީ ސީޒަންތެރެ ކަމަށްވާ މިދިޔަ ޑިސެންބަރު މަހާއި، ޖެނުވަރީ މަހު ވަރަށް ގިނަ އަދަދެއްގެ ފަތުރުވެރިން ރާއްޖެއަށް ޒިޔާރާތް ކޮށްފައިވާ ކަމަށެވެ. 

އެހެންކަމުން ސަރުކާރަށް ގިނަ އަދަދެއްގެ ޑޮލަރު މާރު ކުރާނެ ކަމަށާއި، ނަމަވެސް މިއިން އެއްވެސް ޑޮލަރެއް ރައްޔިތުންނާއި ވިޔަފާރިވެރިންނާ ހިސާބަށް އައިތަން ނުފެންނަ ކަމަށް އަމްރު ވިދާޅުވި އެވެ.

އަމްރު ވިދާޅުވީ ޑޮލަރު މާރުކުރުމުގެ ސިޔާސަތާއެކު އުއްމީދެއް ކުރެވުނު ނަމަވެސް އެއީ އޮޅުވާލުމެއްކަން މިއަދު ހާމަވާ ކަމަށާއި، ޑޮލަރު މާރުކުރުމުގެ ސިޔާސަތަކީ ކޮބައިކަން ނުވަތަ ކީއްކުރަން ކުރާ ކަމެއްކަން ނޭނގޭ ކަމަށެވެ. އަދި މިސިޔާސަތާއެކު، ރައްޔިތުންނަށާއި، ވިޔަފާރިވެރިންނަށް އަދި ރިސޯޓުތަކަށް މަންފާއެއް ނުލިބޭ ކަމަށާއި، ތަކެތީގެ އަގު ހެޔޮ ނުވެ އެއްދުވަހުން އަނެއް ދުވަހަށް އަގުތައް ވެސް އުފުލެމުންދާ ކަމަށް އޭނާ ވިދާޅުވި އެވެ.   

ރޯދަ މަސް ފެށުމުގެ ކުރިން ވެސް ތަކެތީގެ އަގު އުފުލެމުން އައީ. އެމްއެމްއޭގެ ރިޕޯޓުތަކުން ދައްކަނީ 2025 ނިމުނުއިރު ވެސް 4 ޕަސެންޓްގައި އިންފްލޭޝަން ހުރީ. އޭގެ މާނައަކީ އާއިލާއަކުން މަހަކު 10،000 ރުފިޔާ މިސާލަކަށް ގްރޯސަރީއާއި ކާބޯތަކެއްޗަށް ހަރަދު ކުރާއިރު، މިހާރު އެ ގެއަކުން އެ އެއްޗެހި ގަންނަން މިހާރު ހަރަދު ކުރަން އެބަ ޖެހޭ 10،500 ރުފިޔާ. ވާހަކައަކީ އިތުރަށް އެއްވެސް އެއްޗެއް އިތުރު ނުކޮށް 2024 ވަނަ އަހަރު ގަންނަމުން އައި ތަކެތި 2025 ވަނަ އަހަރު ނިމުނުއިރު ގަންނަން މި ލިބެނީ 10،000 ރުފިޔާގެ އެއްޗެހި މަހަކު ގަނެފިއްޔާ 10،500 ރުފިޔާ އެބަ ހަރަދު ކުރަން ޖެހޭ. އެ 500 އިތުރުވީމަ ދެން ކޮންތާކުންތޯ އެބަޔަކު ހަރަދު ކުރާނީ. އެއީ ސޭވިންއިން ފޮރުވާފައި ހުންނަ ފައިސާއިން. ނޫނިއްޔާ އެހެން ދިމާލަކުން ކޮންމެވެސް ހަރަދެއް ކުޑަކޮށްގެން އެކަން ވާން އޮތީ. 

އެސްޓީއޯގެ ކުރީގެ މެނޭޖިންގ ޑިރެކްޓަރު ހުސައިން އަމްރު

މި ސަރުކާރުގައި ޑޮލަރުގެ އަގު ތިރިނުވާނެކަން ފާހަގަކުރައްވައި އަމްރު ވިދާޅުވީ 20 ރުފިޔާއަށްވުރެ މަތީގައި ޑޮލަރުގެ ރޭޓް ހުންނަތާ ގާތްގަނޑަކަށް 2 އަހަރުވެފައިވާ ކަމަށެވެ. އަދި މިސަރުކާރާއެކު އިގްތިސާދަށް ހެޔޮ ބަދަލެއް ނާންނާނެ ކަމަށާއި، މިކަން ބަދަލު ކުރުމަށް ރައްޔިތުން ނުކުންނަން ޖެހޭ ކަމަށް އޭނާ ވިދާޅުވި އެވެ.