ދަމަނަވެށިން ވެކްސިން ހުސްވެ، އުމްރާ ވެރިންނަށް ބައެއްކަހަލަ ވެކްސިން ދިނުން މެދުކަނޑާލައިފި
ހުސްވެފައިވަނީ ސައުދީ އަށް އެތެރެވުމުގެ ކުރިން ހުރިހާ ގައުމެއްގެ މީހުން ވެސް ޖަހަން މަޖުބޫރުވާ އިންފްލުއެންޒާ ވެކްސިން އާއި މެނިންޖައިޓިސް ވެކްސިން ކަމަށް ބައެއް އުމްރާ ގްރޫޕްތަކުން ރާއްޖެ އެމްވީ އަށް ވަނީ މައުލޫމާތު ދީފަ. ނަން ނުޖަހަން ޝަރުތުކޮށް ރާއްޖެ އެމްވީ އަށް މައުލޫމާތު ދެއްވި ދަމަނަވެށީގެ އޮފިޝަލަކު ވަނީ މި ވެކްސިން ހުސްވެގެން ހައްޖަށް އަދި އުމްރާ އަށް ފުރާ މީހުންނަށް ވެކްސިން ދިނުން މެދުކަނޑާލާފައި ވާކަން ކަށަވަރު ކޮށްދީ.
ކޮންމެ އަހަރެއްގެ ރަމަޟާން މަހު ރާއްޖެ އިން ގިނަ އަދަދެއްގެ ބަޔަކު އުމްރާ ގެ އަޅުކަން އަދާކުރުމަށް ސައުދީ އަރަބިއްޔާ އަށް ދަތުރުކުރޭ | ސޯޝަލް މީޑިއާ
ދަމަނަވެށިން ބައެއް ކަހަލަ ވެކްސިން ހުސްވުމުގެ ސަބަބުން މި ރަމަޟާން މަހު ރާއްޖެއިން އުމްރާގެ އަޅުކަން އަދާކުރަން ސައުދީ އަރަބިއްޔާ އަށް ފުރާ މީހުންނަށް ދޭން ޖެހޭ ބައެއް ކަހަލަ ވެކްސިން ދިނުން މެދުކަނޑާލައިފި އެވެ.
ހުސްވެފައިވަނީ ސައުދީ އަށް އެތެރެވުމުގެ ކުރިން ހުރިހާ ގައުމެއްގެ މީހުން ވެސް ޖަހަން މަޖުބޫރުވާ އިންފްލުއެންޒާ ވެކްސިން އާއި މެނިންޖައިޓިސް ވެކްސިން ކަމަށް ބައެއް އުމްރާ ގްރޫޕްތަކުން ރާއްޖެ އެމްވީ އަށް ވަނީ މައުލޫމާތު ދީފަ އެވެ.
އުމްރާ ގްރޫޕްތަކުން ބުނި ގޮތުގައި ރާއްޖެއިން އުމްރާއަށް އަދި ހައްޖު އަޅުކަން އަދާކުރުމަށް ފުރާ މީހުން އާންމުކޮށް ސައުދީ އަށް ފުރުމުގެ އެންމެ މަދުވެގެން 15 ދުވަސް ކުރިން މި ވެކްސިންތައް ޖަހަ އެވެ. ނަމަވެސް ދަމަނަވެށިން ވެކްސިން ހުސްވުމުގެ ސަބަބުން މި އަހަރުގެ ރޯދަ މަހު އުމްރާގެ އަޅުކަން އަދާކުރަން ސައުދީއަށް ފުރަން ހަމަޖެހިފައިވާ މީހުންނަށް ވެކްސިން ދިނުމުގައި ބޮޑެތި ދަތިތަކެއް ކުރިމަތިވެފައިވާކަން އެ ފަރާތްތަކުން ފާހަގަކުރއެވެ.
ހުސްވެފައިވާ ވެކްސިންތަކަކީ އެކި ކަހަލަ ވައިރަލް ރޯގާތަކުން ރައްކާތެރިކަން ހޯދުމަށް ޖަހާ އިންފްލުއެންޒާ ވެކްސިން އާއި ނުރައްކާތެރި ލޭގެ އިންފެކްޝަންތަކާއި މެނިންޖައިޓިސް ފަދަ ނުރައްކާތެރި ބަލިތައް ޖެހުމަށް މެދުވެރިވާ ބެކްޓީރިއާ އިން ރައްކާތެރިކޮށްދޭ މެނިންޖައިޓިސް ވެކްސިން އެވެ.
ނަން ނުޖަހަން ޝަރުތުކޮށް ރާއްޖެ އެމްވީ އަށް މައުލޫމާތު ދެއްވި ދަމަނަވެށީގެ އޮފިޝަލަކު ވަނީ މި ވެކްސިން ހުސްވެގެން ހައްޖަށް އަދި އުމްރާއަށް ފުރާ މީހުންނަށް ވެކްސިން ދިނުން މެދުކަނޑާލާފައިވާކަން ކަށަވަރުކޮށްދީ ފައެވެ. އަދި އެސްޓީއޯ އިން ވެސް އިންފްލުއެންޒާ ވެކްސިން ހުސްވެފައިހުރިކަން ފާހަގަކޮށް އެ އޮފިޝަލް ވިދާޅުވީ ބަލި ޖެހުމުގެ ކުރިން ރައްކާތެރިކަން ހޯދުމުގެ ގޮތުން ޖަހާ މިފަދަ ވެކްސިން ހުސްވުމަކީ ވަރަށް ބޮޑު ކަންބޮޑުވުމެއް ކަމަށެވެ.
އެސްޓީއޯ ފާމަސީތަކުން އިންފްލުއެންޒާ ވެކްސިން ހުސްވެ ދަމަނަވެށިން އުމްރާ ވެރިންނަށް ވެކްސިން ދިނުން މެދުކަނޑާލާފައި ވާއިރު، ރައީސް ޑރ. މުޙައްމަދު މުޢިއްޒު ވަނީ މިދިޔަ 2025 ވަނަ އަހަރު ސްޓޭޓް ފާމަސޫޓިކަލް އެންޑް މެޑިކަލް ސަޕްލައި ކޯޕަރޭޝަން ލިމިޓެޑްގެ ނަމުގައި ރާއްޖެއަށް ބޭސް އެތެރެކުރަން ހާއްސަ ކުންފުންޏެއް އުފައްދަވާ، އެ ކުންފުނީގެ ދަށަށް އެސްޓީއޯގެ ހުރިހާ ފާމަސީއެއް ބަދަލުކުރަން ނިންމަވާފަ އެވެ.
މި ސަރުކާރު ވެރިކަމާ ހަވާލުވި ފަހުން ބޭސް ލިބުމުގެ މައްސަލަ ބޮޑުވެ، އާންމު ރައްޔިތުންގެ ކަންބޮޑުވުން އިންތިހާއަށް ދިޔުމާ އެކު އުފެއްދި ކުންފުނިން ރާއްޖެއަށް އެންމެ ބޭސް ގުޅައެއް ވެސް އަދި އެތެރެއެއް ނުކުރެ އެވެ. ކުންފުންޏަށް ވެރިޔަކު އައްޔަންކޮށް، ވަޒީފާތަކަށް މީހުން ނަގައިގެން، ރައްޔިތުންގެ ޓެކްސް ފައިސާ އިން މުސާރަ ދޭތާ އެތައް މަހެއް މިހާރު ވަނީ ވެފައެވެ. ނަމަވެސް ބޭސް ލިބުމުގެ މައްސަލައަށް އެއްވެސް ހައްލެއް ހޯދިފައެއް ނުވެ އެވެ.
