ރިޔާސީ ބަޔާނުގައި ރައީސް ފާހަގަކުރެއްވި ގޮތަށް، އެސް.ޓީ.އޯ މެދުވެރިކޮށް އަގުހެޔޮކޮށް ވިއްކާ 23 ބާވަތް އައްޑޫ ސިޓީއިން ލިބެން ނެތް: ނިޒާރު
އެސް.ޓީ.އޯ މެދުވެރިކޮށް އައްޑޫ ސިޓީއަށް އަސާސީ 23 ބާވަތެއް ހެޔޮއަގުގައި ފޯރުކޮށްދޭން ފަށާފައިވާ ކަމަށް ރައީސުލްޖުމްހޫރިއްޔާ ވިދާޅުވި ނަމަވެސް، އެކަން އެގޮތަށް ހިނގަމުން ނުދާ ކަމަށް އައްޑޫގެ މޭޔަރު އަލީ ނިޒާރު ވިދާޅުވި. މޭޔަރު ފާހަގަކުރެއްވި ގޮތުގައި އައްޑޫގައި ތަކެތީގެ އަގުތައް އަދިވެސް ހުރީ ބޮޑުކޮށް.
ރައީސް ޑރ. މުހައްމަދު މުއިއްޒު އައްޑުއަށް ކުރެއްވި ދަތުރުފުޅެއްގައި އައްޑޫ ސިޓީ ކައުންސިލުގެ މޭޔަރު އަލީ ނިޒާރުއާ އެމަނިކުފާނު ވާހަކަދައްކަވަނީ | ރައީސް އޮފީސް
ރިޔާސީ ބަޔާނުގައި ރައީސް ޑރ.މުހައްމަދު މުއިއްޒު ވިދާޅުވި ގޮތަށް އައްޑޫ އިން އެސް.ޓީ.އޯ. އިން އަގުހެޔޮކޮށް 23 ބާވަތް ލިބެމުން ނުދާ ކަމަށް އައްޑޫގެ މޭޔަރ އަލީ ނިޒާރު ވިދާޅުވެއްޖެ އެވެ.
ރައީސުލްޖުމްހޫރިއްޔާ ވިދާޅުވީ، ޤައުމުގެ އިޤްތިޞާދުގެ ހަރުދަނާކަން ދޭހަކޮށްދޭ މައިގަނޑު އެއްކަމަކީ ރައްޔިތުންގެ ދިރިއުޅުމަށް ބޭނުންވާ އަސާސީ ބާވަތްތަކުގެ އަގުތައް، އެއްހަމައެއްގައި ހިފެހެއްޓޭ މިންވަރު ކަމަށެވެ. އެކަމަށް ބަލައިލާއިރު، ފާއިތުވެދިޔަ އަހަރު މުހިންމު މަސައްކަތްތަކެއް ކުރައްވާފައިވާނެ ކަމަށް ވެސް ރައީސް ވަނީ ވިދާޅުވެފަ އެވެ.
އަސާސީ ކާބޯތަކެތީގެ އަދަދު، 23 ބާވަތަށް އިތުރުކޮށް، މާލޭގެ ބާޒާރުގައި ހެޔޮއަގުގައި ލިބެން ހުންނާނެކަން ޔަޤީންކުރައްވާފައިވާނެ ކަމަށް ރައީސް ވިދާޅުވި ނަމަވެސް އޭގެ އިތުރު ތަފްސީލެއް އެ މަނިކުފާނުގެ ރިޔާސީ ބަޔާނުގައި ހިއްސާކުރައްވާފަ އެއް ނުވެ އެވެ.
" އާބާދީގައި 3,000 ހަމަވާ މީހުން ރަށްރަށަށް، މި 23 ބާވަތް ފޯރުކޮށްދިނުމަށް، އެސް.ޓީ.އޯ.ގެ އޭޖެންޓުން ހޯދުމަށް އިޢުލާނުކޮށް، އެސް.ޓީ.އޯ.ގެ ރޭޓުގައި މި 23 ބާވަތް ފޯރުކޮށްދިނުމުގެ އިންތިޒާމުތައް މިހާރު ދަނީ ހަމަޖައްސަމުން. މީގެ އިތުރުން، އެސް.ޓީ.އޯ.އިން އައްޑޫ ސިޓީ އަދި ކުޅުދުއްފުށި ސިޓީއަށް މި 23 ބާވަތުގެ އަސާސީ ކާބޯތަކެތި، ރާއްޖެއިން ބޭރުން އެތެރެކުރަން ވަނީ ފަށާފައި. ނަތީޖާއެއްގެ ގޮތުން، މާލެއެކޭ އެއް އަގެއްގައި، އަސާސީ ބާވަތްތަކުގެ 23 ބާވަތް އެ ސިޓީތަކުން ލިބެން ހުންނާނެ." ރައީސް ވިދާޅުވި އެވެ.
ރައީސްގެ މި ވާހަކަތަކާއި ގުޅިގެން ސުވާލުކުރުމުން ނިޒާރު ވިދާޅުވީ އެސްޓީއޯ އިން އައްޑޫގައި ވިއްކާ ތަކެތި ވިއްކަނީ ބޮޑުތަނުން އަގު ބޮޑުކޮށް ކަމަށެވެ. ނޫޑްލްސް ކަހަލަ މަދު އެއްޗެއް އަގު ހެޔޮކޮށް ލިބިދާނެ ކަަމަށާއި އެއީ އިޚުލާސްތެރި ނިޔަތެއްގައި ކޮށްފައިވާ ކަމެއް ނޫން ކަަމަށް ނިޒާރު ވިދާޅުވި އެވެ. ރައްޔިތުންނަށް ފައިދާ ވާނެ ފަދަ ގޮތަކަށް ތަކެތީގެ އަގު ދަށްކޮށްފައިވާ ކަމަށް ފާހަގަ ނުކުރެވޭ ކަމަށް ނިޒާރު ވިދާޅުވި އެވެ.
"އަޑު އެހިތާ މިހުރީ. ރައީސް ވިދާޅުވާ ގިނަ ވާހަކަތައް ދިމަ އެއް ނުވޭ. ތިވަރުގެ އެއްޗެއް ބަދަލުވި ކަމަށް. ނުވިތާކަށް އައްޑޫ އިން އިމާރާތްކުރުމުގެ ސިނާއަތަށް ބޭނުންވާ ސިމެންތި ނުލިބި ސިމެންތި އަށް ވެސް ޖެހިފައި 4 މަސް ވަރު ވެއްޖެ އައްޑޫގައި." ނިޒާރު ވިދާޅުވި އެވެ.
މި އަަހަރުގެ ރިޔާސީ ބަޔާނުގައި ރއީށް ވަނީ ކުޅުދުއްފުށީ ޕޯޓުގައި ޑިއުޓީ ފްރީކޮށް މުދާ ބަހައްޓާ ޒޯނެއް، މިދިޔަ އަހަރުގެ އޮގަސްޓު މަހުގެ 26 ވަނަ ދުވަހު ވާނީ ޤާއިމުކޮށްފައިވާ ކަމަށް ވެސް ވިދާޅުވެފަ އެވެ. އަދި އެފަދަ ޑިއުޓީ ފްރީ ޒޯނެއް އައްޑޫ ޕޯޓުގައި މި މަހުގެ ތެރޭގައި ޤާއިމުކޮށް، ޚިދުމަތް ދޭން ފަށާނެ ކަމަށް ވެސް ވިދާޅުވި އެވެ.
އެކަމާއި ގުޅޭގޮތުން ސުވާލުކުރުމުން ނިޒާރު ވިދާޅުވީ އެފަދަ ކަންކަމަކީ ރައީސް ވިދާޅުވީމަ، ވިދާޅުވިހާ ގޮތަކަށް ވާ ކަންކަން ނޫން ކަމަށެވެ. އެފަދަ ޒޯނެއް އެކުލަވާލާ، ޓެކްސް އާއި ގުޅުން ހުރި ބަދަލުތައް ގެނެވޭނީ ރައްޔިތުންގެ މަޖިލީހުގެ ތެރެއިން ކަމަށް ނިޒާރު ވިދާޅުވި އެވެ. އަދި އެފަދައިން ކަނޑައަޅާ ޒޯނެއްގެ ތަފްސީލާއި އެކަމުގެ ތަފްސީލް ވެސް ހާމަކުރަން ވާނެ ކަމަށް ނިޒާރު ވިދާޅުވި އެވެ.
ނިޒާރު ވަނީ އެފަދަ ވާހަކަތަކައް ތަފްސީލަކާއި ނުލާ ދެއްކެވުމަކީ ކަންބޮޑުވުމެއް ކަމަށް ވިދާޅުވެފަ އެވެ. ސަބަބަކީ ތަފްސީލެއް ނެތި ދައްކާ އެފަދަ ވާހަކަތަކަށް ޖަވާބުދާރީކުރުވަން އުނދަނގޫވުން ކަމަށް ނިޒާރު ވަނީ ވިދާޅުވެފަ އެވެ. އެފަދަ މަސައްކަތެއް ކުރަނީ އިޚްލާސްތެރި ނިޔަތެއްގައި ކަމަށް ވާނަމަ އެ ފަދަ ޒޯނެއް އެކުލަވާލަން ވާނީ އައްޑޫ އަށް އެންމެ ފައިދާ ހުރި ގޮތަށް ކަމަށް ވެސް އޭނާ ވިދާޅުވި އެވެ. އަދި ކައުންސިލާއި މަޝްވަރާ ނުކޮށް އެފަދަ ކަންކަން ނިންމުމަކީ ސަރުކާރުގެ އިޚުލާސްތެރިކަމާއި މެދު ސުވާލު އުފެދޭ ކަމެއް ކަމަށް ވެސް ނިޒާރު ވަނީ ވިދާޅުވެފަ އެވެ.
