ފެނަކަ މުވައްޒަފުންނަށް ރަމަޟާން މަހު ދޭން ނިންމި ހަދިޔާ ނުދޭން ނިންމައިފި
މި އަހަރުގެ ރަމަޟާން މަހުގެ ހަދިޔާގެ ގޮތުގައި ފެނަކައިގެ ކޮންމެ މުވައްޒަފަކަށް އެސްޓީއޯގެ ވައުޗަރެއް ދިނުމަށް މެނޭޖްމަންޓުން ކުރިން ނިންމި. އެސްޓީއޯގެ ވައުޗަރަށް މުދާ ނެގޭނެ ކަމަށާއި، މިމަހުގެ 11 ވަނަ ދުވަހު ވައުޗަރުތައް ދޫ ކުރާނެ ކަމަށް ވެސް އެންގި ކަމަށް މުވައްޒަފުން ބުނޭ. ނަމަވެސް އެ ނިންމުން ބާތިލްކޮށް މިމަހުގެ 10 ވަނަ ދުވަހު ވަނީ މެމޯ ނެރިފައި. ފެނަކަ މުވައްޒަފުންނަށް ރަމަޟާން މަހު ދޭން ނިންމި ހަދިޔާ ނުދޭން ނިންމި ސަބަބެއް ހާމަ ކޮށްފައިނުވޭ.
ފެނަކަ މުވައްޒަފުންތަކެއް މަސައްކަތުގައި. | މުހައްމަދު ޝިފާއު
ފެނަކަ ކޯޕްރޭޝަން ލިމިޓެޑްގެ މުވައްޒަފުންނަށް ރަމަޟާން މަހު ދޭން ނިންމި ހަދިޔާ ނުދޭން ނިންމައިފި އެވެ.
މިމަހުގެ 10 ވަނަ ދުވަހު ފެނަކައިން ވަނީ އިންޓަރނަލް މެމޯއެއް ނެރި އެކަން މުވައްޒަފުންނަށް އަންގާފަ އެވެ. ރާއްޖެއެމްވީ އަށް ވަނީ މި މެމޯ ލިބިފަ އެވެ.
މެމޯގައި ބުނެފައިވަނީ މި އަހަރުގެ ރަމަޟާން މަހަށް ހަދިޔާގެ ގޮތުގައި ކުންފުނީގެ ކޮންމެ މުވައްޒަފަކަށް އެސްޓީއޯގެ ވައުޗަރއެއް ދިނުމަށް މެނޭޖްމަންޓުން ނިންމި ކަމަށެވެ. ނަމަވެސް މިހާރު އެ ނިންމުން ބާތިލް ކޮށްފައިވާ ކަމަށެވެ.
ފެނަކައިގެ މުވައްޒަފެއް ބުނީ ރަމަޟާން މަހާ ދިމާކޮށް ވަކި ޚާއްސަ ހަދިޔާއެއް އެހެން އަހަރުތަކުގައި ނުދޭ ކަމަށާއި، މިއަހަރު މި ހަދިޔާ ދޭން ނިންމި ސަބަބެއް ނޭނގޭ ކަމަށެވެ. އަދި އެސްޓީއޯގެ ވައުޗަރަށް މުދާ ނެގޭނެ ކަމަށާއި، މިމަހުގެ 11 ވަނަ ދުވަހު ވައުޗަރުތައް ދޫ ކުރާނެ ކަމަށް ވެސް އެންގި ކަމަށް އޭނާ ބުންޏެވެ.
މީގެ އިތުރުން އޭނާ ބުނީ، މި ނިންމުން ބާތިލް ކުރިކަން އެންގީ ވެސް ވައުޗަރުތަކާ ގުޅޭގޮތުން މުވައްޒަފުން ސުވާލު ކުރާތީ ކަމަށް މައުލޫމާތު ލިބޭ ކަމަށެވެ.
ފެނަކަ މުވައްޒަފުންނަށް ރަމަޟާން މަހު ދޭން ނިންމި ހަދިޔާ ނުދޭން ނިންމި ސަބަބެއް ހާމަ ކޮށްފައިނުވެ އެވެ. އަދި މި މައްސަލައާ ގުޅޭގޮތުން ފެނަކައިގެ ފަރާތުން ރަސްމީ ކޮންމެންޓެއް ވަނީ ލިބޭގޮތް ނުވެފަ އެވެ.
