ރޯދަ މަހާ ދިމާކޮށް ބޭންކުތަކަށް ދޫކުރާ ޑޮލަރު %32 އަށް އެމްއެމްއޭއިން އިތުރުކޮށްފި
މި ފިޔަވަޅުގެ ސަބަބުން އިމްޕޯޓަރުންނަށް ބޭރުގެ ސަޕްލަޔަރުންނަށް ފައިސާ ދެއްކުމުގައި ލުއިތަކެއް ލިބި، ބާޒާރުގައި މުދަލުގެ އަގު ހިފެހެއްޓުމަށް މަގުފަހިވާނެ. މިއީ ރޯދަ މަހު ބޭރު ފައިސާއަށް އޮންނަ މޫސުމީ ޑިމާންޑް މެނޭޖްކޮށް، އަސާސީ މުދާ މެދުނުކެނޑި ލިބޭނެ އިންތިޒާމު ހަމަޖެއްސުމަށް އެޅި ފިޔަވަޅެކެއް.
ބޭރު ފައިސާ މާރު ކުރާތަނެއްގައި ކެޝިއަރަކު އެމެރިކާ ޑޮލަރު ގުނަނީ. | ގެޓީ އިމޭޖަސް
ރޯދަ މަހާ ދިމާކޮށް ކާބޯތަކެތި އެތެރެކުރަން ފަސޭހަ ކުރުމާއި އަގު ހެޔޮކުރަން އެހީތެރިވުމުގެ ގޮތުން ބޭންކުތަކަށް ދޫކުރާ ޑޮލަރުގެ އަދަދު މަރުކަޒީ ބޭންކް، އެމްއެމްއޭން އިތުރުކޮށްފި އެވެ.
އެމްއެމްއޭއިން މައުލޫމާތުދޭ ގޮތުގައި އާންމު އުސޫލުތަކުގެ ދަށުން ވިއްކާ ޑޮލަރަށްވުރެ 32 އިންސައްތަ އިތުރަށް ދޫކުރަން އަންގާރަ ދުވަހުންފެށިގެން ވަނީ ފަށައިފަ އެވެ. އެމްއެމްއޭއިން ނެރުނު ބަޔާނެއްގައި ބުނީ، މިއީ ރޯދަ މަހުގެ ތެރޭގައި އަސާސީ ކާބޯތަކެތި އެތެރެކުރުމަށް ބޭންކުތަކުން ބޭރު ފައިސާ ހޯދުމަށް ކުރާ ޑިމާންޑް ބޮޑުވާތީ، އެކަމަށް ލުޔެއް ހޯދައިދިނުމަށް އެޅި ފިޔަވަޅެއް ކަމަށެވެ.
އެމްއެމްއޭން ބުނީ ބޭރު ފައިސާ އިތުރަށް ދޫކުރުމުގެ ސަބަބުން މުދާ އެތެރެކުރާ ފަރާތްތަކަށް ބޭރުގެ ސަޕްލަޔަރުންނަށް ފައިސާ ދެއްކުމުގައި ބޮޑެތި ފަސޭހަތަކެއް ލިބޭނެ އެވެ. އަދި އާންމުކޮށް ކާބޯތަކެތި ބޭނުންކުރާ މިންވަރު އިތުރުވާ މި ދަނޑިވަޅުގައި އެ ފިޔަވަޅުގެ ސަބަބުން މުދާ އެތެރެ ކުރުމުގެ ނިޒާމަށް ކުރިމަތިވާ ތާށިކަން ކުޑަވެގެންދާނެ ކަމަށާއި ރާއްޖޭގެ ބާޒާރުގައި އަސާސީ މުދާ މެދުނުކެނޑި ލިބެން ހުންނާނެ ކަމަށް އެމްއޭއިން ބުނެ އެވެ.
ރޯދަ މަހަކީ ރާއްޖެއަށް އެންމެ ގިނައިން މުދާ އިމްޕޯޓު ކުރާ މަހެވެ. ހާއްސަކޮށް ކާބޯތަކެތި އިތުރުކުރާ މިންވަރު ކޮންމެ ރޯދަ މަހެއްގައި ވެސް ބޮޑުތަނުން އިތުރުވެ އެވެ. އަދި މިފަދަ ފިޔަވަޅުތަކަކީ ރޯދަ މަހާ ދިމާކޮށް ބޭރު ފައިސާއަށް އަންނަ މޫސުމީ ޑިމާންޑް މެނޭޖްކުރުމަށް އެ އޮތޯރިޓީން ގެންގުޅޭ ހާއްސަ ސިޔާސަތެއް ކަމަށް އެމްއެމްއޭން ބުންޏެވެ.
