ހޯލްސޭލްކޮށް އޮރެންޖް ލިބުން ދަތިވެ، އޮރެންޖެއްގެ އަގު 12 ރުފިޔާއަށް ވުރެ މައްޗަށް
ސަރުކާރުން އަގުހެޔޮކޮށް ފޯރުކޮށްދޭ އަސާސީ ތަކެތީގެ ލިސްޓުގައި އޮރެންޖު ހިމެނުނު ނަމަވެސް، އެސްޓީއޯ އާއި އާންމު ފިހާރަތަކުން މި ބާވަތް ނުލިބޭތީ އާންމުންނާއި ވިޔަފާރިވެރިން ދަނީ ކަންބޮޑުވުން ފާޅުކުރަމުން. އާއްމު ގޮތެއްގައި އޮރެންޖެއްގެ އަގު އުޅެނީ، 3 ރުފިޔާ ނުވަތަ 6 ރުފިޔާ ދޭތެރޭގައި. ވިޔަފާރިވެރިއެއް ބުނީ، ރަމަޟާން މަސް އައުމުގެ 3 ހަފްތާ ކުރިން އޮރެންޖްގެ އަގު އުފުލެން ފަށާފައިވާ ކަމަށާއި، މިހާރު އޮރެންޖެއް ވިއްކަމުންދަނީ 12 ރުފިޔާ އާއި 14 ރުފިއާ ދެމެދުގައި ކަމަށް
މާލޭގެ ލޯކަލް މާރުކޭޓުގެ ގޮޅިއެއްގައި ބަހައްޓާފައި ހުރި އޮރެންޖްތަކެއް. | ރާއްޖެއެމްވީ
އޮރެންޖު ލިބުން ދަތިވެ، މާލޭގެ ބާޒާރުގައި އޮރެންޖުގެ އަގު ވަރަށް ބޮޑަށް އުފުލިއްޖެ އެވެ.
އާއްމު ގޮތެއްގައި އޮރެންޖެއްގެ އަގު އުޅެނީ، 3 ރުފިޔާ ނުވަތަ 6 ރުފިޔާ ދޭތެރޭގަ އެވެ.
ރާއްޖެއެމްވީއަށް މައުލޫމާތު ދިން ވިޔަފާރިވެރިއެއް ބުނީ، ރަމަޟާން މަސް އައުމުގެ 3 ހަފްތާ ކުރިން އޮރެންޖްގެ އަގު އުފުލެން ފަށާފައިވާ ކަމަށާއި، މިހާރު އޮރެންޖެއް ވިއްކަމުންދަނީ 12 ރުފިޔާ އާއި 14 ރުފިއާ ދެމެދުގައި ކަމަށެވެ.
މޭވާ އާއި ތަރުކާރީ އެތެރެކުރާ ފިހާރައެއްގެ މީހެއް ބުނީ، އޮރެންޖުގެ އަގު އުފުލުނީ ބޭރުން މޭވާ ގެންނަ ބޯޓު ފަހަރު އައުން ލަސްވުމާއި ގުޅިގެން ކަމަށާއި، މި ލިބޭނެ އިރެއް ނޭނގޭ ކަމަށެވެ. އަދި އޮރެންޖް ލިބުން ދަތިވާނަމަ ކުރިއަށް އޮތްތަނުގައި ވެސް އަގު އުފުލޭނެ ކަމަށާއި، ހޯލްސޭލަރުން އަތުން ވެސް ބޭނުންވާ ވަރަށް އޮރެންޖް ނުލިބޭ ކަމަށް އެމީހާ ބުންޏެވެ.
މީގެ ކުރިން އޮރެންޖް އަބަދުވެސް ބާޒާރުމަތީގައި ވަރަށް ތިޔާގިކޮށް ލިބެން ހުރެ އެވެ. ނަމަވެސް މިހާރު މާލޭ ލޯކަލް މާރުކޭޓުގައި އޮރެންޖު ހުރީ ނިސްބަތުން ވަރަށް މަދު ގޮޅިއެއްގަ އެވެ.
މީގެ އިތުރުން ކެފޭ ހިންގާ މީހެއް ބުނީ، ކެފޭ/ރެސްޓޯރެންޓްތަކަށް ވެސް އޮރެންޖު ނުލިބޭ ކަމަށާއި، ހޯލްސޭލްކޮށް ދޫނުކުރާ ކަމަށެވެ.
އޮރެންޖު ލިބުން ދަތިވެފައިވާއިރު، އަސާސީ ކާބޯތަކެތީގެ 26 ބާވަތެއް އެސްޓީއޯގެ އައުޓްލެޓްތަކުން މި ރަމަޟާންމަހު ހެޔޮއަގުގައި ލިބޭނެ ކަމަށް ސަރުކާރުން ބުނެފައިވެ އެވެ.
އިގްތިސާދީ ތަރައްގީއާ ވިޔަފާރިއާ ބެހޭ ވުޒާރާ އިން ބުނީ، އަގުހެޔޮކޮށް ދެމެހެއްޓެނިވި ގޮތުގައި ލިބޭނެގޮތް ހަމަޖެއްސުމުގެ ގޮތުން އަސާސީ ކާބޯތަކެތީގެ ލިސްޓަށް ސަރުކާރުން 23 ބާވަތެއް އިތުރުކޮށް، އެބާވަތްތައް ބާޒާރަށް ނެރިފައިވާ ކަމަށެވެ.
އޭގެތެރޭގައި ހިމެނެނީ ރާއްޖޭގައި ޒަމާނުންސުރެ ކަނޑައަޅާފައިވާ ކާޑުގެ ބާވަތްތައްކަމުގައިވާ ހަނޑޫ، ހަކުރު، ފުށުގެ އިތުރުން، ރާއްޖެއަށް އެންމެ ގިނައިން އެތެރެކުރާ 10 ބާވަތުގެ މޭވާ އާއި 10 ބާވަތުގެ ތަރުކާރީ އާއި މުގާއި ބިސް އަދި އަލުވި އެވެ. އަސާސީ ކާބޯތަކެތީގެ ލިސްޓުގައި ހިމެނޭ މޭވާގެ ބާވަތްތަކުގެ ތެރޭގައި އޮރެންޖު ހިމެނުނު ނަމަވެސް އެސްޓީއޯގައި ވެސް އޮރެންޖެއް ނުލިބޭކަމުގެ ޝަކުވާ ވަނީ ބޮޑުވެފަ އެވެ.
