މޯލްޑިވް ގޭހުން ކައްކާ ގޭސް މިހާރު ލިބޭނެ ކަމަށް އެސްޓީއޯ އިން ބުނެފި

މޯލްޑިވް ގޭސް އިން ކައްކާ ގޭސް ލިބުން ދަތިވެ، އެކަމުގައި ރައްޔިތުންގެ ޝަކުވާ ބޮޑުވެފައިވީ އިރު ވެސް ވެގެން އުޅޭ ގޮތާ ބެހޭ ގޮތުން އެއްޗެއް ނުބުނެ ތިބުމަށް ފަހު، މިހާރު ދަތިކަމެއް ނެތި ގޭސް ލިބޭނެ ކަމަށް އެސްޓީއޯ އިން ބުނެފި އެވެ.

އެސްޓީއޯ ގެ ސަބްސިޑިއަރީ ކުންފުނި މޯލްޑިވް ގޭސް އިން 10 ކިލޯގެ ގޭސް ފުޅި ނުލިބޭތާ ދުވަސްތަކެއް ވެފައިވާއިރު، އަޑުތައް ފެތުރުފައި އޮތީ އެ ކުންފުނިން ގޭސް ވިއްކަމުން ގެންދަނީ އަމިއްލަ ކުންފުންޏަކުން ގޭސް ގަނެގެން ކަމުގަ އެވެ.

އެސްޓީއޯ އިން ސަރުކާރުގެ މީޑިއާ ޕީއެސްއެމް އަށް ކަށަވަރުކޮށްދީފައިވާ ގޮތުގައި އަންގާރަ ދުވަހުން ފެށިގެން ކުރިއެކޭ އެއްގޮތަށް 10 ކިލޯގެ ގޭސް ފުޅި ވިއްކަން ފަށާފައިވާ ކަމަށެވެ.

އެސްޓީއޯ އާ ހަވާލާދީ ޕީއެސްއެމް އިން ބުނެފައިވަނީ މޯލްޑިވް ގޭސް މެދުވެރިކޮށް 10 ކިލޯގެ ގޭސް ފުޅީގެ ބަދަލުގައި ޑިސްކައުންޓް ރޭޓުތަކެއްގައި ވިއްކަމުން ދިޔައީ 7 ކިލޯގެ ގޭސްފުޅިކަމަށެވެ. އަދި ކުރިއަށް އޮތް ތަނުގައި އެއްވެސް ދަތިކަމެއް ނެތި ގޭސް ލިބޭނެ ކަމަށް ވެސް އެސްޓީއޯ އިން ބުނެފައިވާ ކަމަށް ރިޕޯޓް ކޮށްފައިވެ އެވެ.