ރާއްޖޭގައި އިންފްލުއެންޒާ ފެތުރުން އިތުރުވެފައިވާ ދުވަސް ވަރެއްގައި، އެސްޓީއޯ ފާމަސީ ތަކުން އިންފްލުއެންޒާ ވެކްސިން ހުސްވެއްޖެ
އެސްޓީއޯ ފާމަސީ ތަކަށް މި ވެކްސިން ގެ އާ ސްޓޮކެއް ލިބޭނެ ދުވަހެއް ވެސް ނޭނގޭ އިރު، އިންފްލުއެންޒާ ގަދައަށް ފެތުރެމުންދާ މި ދުވަސްވަރު، އިންފްލެއެންޒާ އިން ރައްކާތެރި ވުމަށްޓަކައި ވެކިސިން ޖެހުމަށް ޑޮކްޓަރުން އިލްތިމާސް ކުރައްވާ. މި ސަރުކާރުން ބޭސް އެތެރެކުރުމަށް ހާއްސަ ކުންފުންޏެއް އުފައްދާ މުވައްޒަފުންނަށް މުސާރަ ދެމުން ދިޔަ ނަމަވެސް އެ ކުންފުންޔަށް އެތެރެ ކުރެވުނު އެންމެ ބޭސް ގުޅައެއް ވެސް އަދި ނެތް.
ހެންވޭރުގައި ހުންނަ އެސްޓީއޯ ގެ ފާމަސީ އެއް
ނޭވާލާ ނިޒާމުގެ ތެރެއިން ފެތުރޭ އިންފްލުއެންޒާ ވައިރަސް އަށް ޕޮޒިޓިވްވާ މީހުންގެ އަދަދު ބޮޑުތަނުން އިތުރުވެފައިވާކަން ހެލްތު ޕްރޮޓެކްޝަން އެޖެންސީ (އެޗްޕީއޭ) ގެ ތަފާސް ހިސާބުތަކުން ދައްކާފައި ވަނިކޮށް، ސަރުކާރުން ރައްޔިތުންނަށް ބޭސް ފޯރުކޮށްދިނުމަށް ގާއިމްކޮށްފައިވާ އެސްޓީއޯ ގެ ފާމަސީ ތަކުން އިންފްލުއެންޒާ ވެކްސިން ހުސްވެއްޖެ އެވެ.
ރާއްޖެ އެމްވީ އަށް މައުލޫމާތު ދެމުން އެސްޓީއޯ ފާމަސީ އެއްގައި މަސައްކަތްކުރާ މުވައްޒަފަކު ބުނީ މާލެ، ހުޅުމާލެ އަދި ވިލިމާލެ ހިމެނޭހެން މާލެ ސަރަހައްދުގެ އެސްޓީއޯގެ ހުރިހާ ފާމަސީ އަކުން އިންފްލުއެންޒާ ވެކްސިން ހުސްވެފައިވާ ކަމަށެވެ. އަދި އެސްޓީއޯ ފާމަސީ ތަކަށް މި ވެކްސިން ގެ އާ ސްޓޮކެއް ލިބޭނެ ދުވަހެއް ވެސް ނޭނގޭ ކަމުގަ އެވެ.
އެޗްޕީއޭ ގެ ތަފާސް ހިސާބުތައް ދައްކާ ގޮތުން 2025 ވަނަ އަހަރުގެ ފަހުކޮޅުން ފެށިގެން އިންފްލުއެންޒާ ގެ އަލާމާތްތައް ހުރެގެން ޓެސްޓު ކުރެވުނު އަދަދާއި ޕޮޒިޓިވްވީ އަދަދު ވެސް ވަނީ އިތުރުވެފަ އެވެ.
މީގެ އިތުރުން މާލެ ސަރަހައްދުގައި އިންފްލުއެންޒާ މިދިޔަ އަހަރު ފަހުކޮޅުން ފެށިގެން ވަރަށް ގަދައަށް ފެތުރެމުންދާ ކަމަށް ކުޑަކުދިންގެ ބަލިތަކުގެ ހާއްސަ ބައެއް ޑޮކްޓަރުން ވެސް ވަނީ ފާހަގަ ކުރައްވާފަ އެވެ. އަދި އިންފްލެއެންޒާ އިން ރައްކާތެރިވުމަށްޓަކައި ވެކިސިން ޖެހުމަށް ވެސް ޑޮކްޓަރުން އިލްތިމާސް ކުރައްވަ އެވެ.
އިންފްލެއެންޒާ ގައި އެންމެ ނުރައްކާތެރި ވަނީ ކުޑަކުދިންނާއި މުސްކުޅިން، އަދި މާބަނޑު އަންހެނުންނެވެ. އިންފްލުއެންޒާ ޖެހިއްޖެ ނަމަ ރޯގާޖެހި، ހުން އައިސް، ކެއްސުމާއި ކަރުގައި ރިއްސުންފަދަ އަލާމާތްތައް އިންސާނާގެ ހަށިގަނޑުން ފެނެ އެވެ.
އެސްޓީއޯ ފާމަސީ ތަކުން އިންފްލުއެންޒާ ވެކްސިން ހުސްވެފައިވާ އިރު، ރައީސް މުއިއްޒު ވަނީ މިދިޔަ ސެޕްޓެމްބަރު މަހު ސްޓޭޓް ފާމަސޫޓިކަލް އެންޑް މެޑިކަލް ސަޕްލައި ކޯޕަރޭޝަން ލިމިޓެޑްގެ ނަމުގައި ރާއްޖެއަށް ބޭސް އެތެރެކުރަން ހާއްސަ ކުންފުންޏެއް އުފައްދަވާ، އެ ކުންފުނީގެ ދަށަށް އެސްޓީއޯ ގެ ހުރިހާ ފާމަސީ އެއް ބަދަލު ކުރަން ނިންމަވާ ފައެވެ.
މި ސަރުކާރު ވެރިކަމާ ހަވާލުވި ފަހުން ބޭސް ލިބުމުގެ މައްސަލަ ބޮޑުވެ، އާންމު ރައްޔިތުންގެ ކަންބޮޑުވުން އިންތިހާއަށް ދިޔުމާ އެކު އުފެއްދި ކުންފުނިން ރާއްޖެ އަށް އެންމެ ބޭސް ގުޅައެއް ވެސް އަދި އެތެރެއެއް ނުކުރެ އެވެ.
ކުންފުންޏަށް ވެރިޔަކު އައްޔަންކޮށް، ވަޒީފާތަކަށް މީހުން ނަގައިގެން، ރައްޔިތުންގެ ޓެކްސް ފައިސާ އިން މުސާރަ ދޭތާ އެތައް މަހެއް މިހާރު ވަނީ ވެފަ އެވެ. ނަމަވެސް ބޭސް ލިބުމުގެ މައްސަލައަށް އެއްވެސް ހައްލެއް ހޯދިފައެއް ނުވެ އެވެ.
