ލުއި ގޭސް ހުސްވެފައިވާކަން އެނގޭ، ހުސްވި ސަބަބު ނޭނގޭ: އެމްޑީ އަބްދުﷲ
މީގެ ކުރިން ގޭސް ޝިޕްމަންޓަކަށް ދެއްކި 2 ލައްކަ ޑޮލަރު ގެއްލިފައިވާއިރު އެ އޯޑަރު ދީފައިވަނީ ގާބިލުކަން ނެތް ކުންފުންޏަކަށް އެމްޑީގެ އިރުޝާދުގެ މަތިން ކަމަށް ވަނީ ހާމަވެފައި.
މޯލްޑިވް ގޭސް ގެ މެނޭޖިންގް ޑިރެކްޓަރު އަބްދުﷲ މުހައްމަދު | ރާއްޖެ އެމްވީ
ސަރުކާރުގެ ގޭސް ކުންފުނިން ލުއި ގޭސް ހުސްވީ ކީއްވެކަން ނޭނގޭ ކަމަށާއި އެކަން ހިނގި ގޮތް އިނގޭނީ އެސްޓިއޯ އަށް ކަމަށް މޯލްޑިވް ގޭސް ގެ މެނޭޖިންގ ޑިރެކްޓަރ އަބްދުﷲ މުހައްމަދު ވިދާޅުވެއްޖެ އެވެ.
މޯލްޑިވްސް ގޭސް އިން ލުއި ފުޅި ހުސްވުމާއި ގުޅިގެން އެކަން ޔަގީން ކުރުމަށް ރާއްޖެ އެމްވީ އިން ގޭސް ދޫކުރާ ކައުންޓަރަށް ގޮސް ސުވާލު ކުރުމުން ބުނީ، ލުއި ގޭސް ހުސްވެފައިވާ ކަމަށާއި ލިބޭނެ ދުވަހެއް ވެސް ނޭނގޭ ކަމަށެވެ. އަދި މިވަގުތު ކޮންމެސް ވަރަކަށް ދަގަނޑު ފުޅި ލިބެން ހުރިކަމަށް ގޭސް ދޫކުރާ ކައުންޓަރުން ބުންޏެވެ.
މިކަމާއި ގުޅިގެން ރާއްޖެ އެމްވީ އިން ގޭސް ކުންފުނީގެ އެމްޑީ އަބްދުﷲ މުހައްމަދު އަށް ގުޅުމުން ވިދާޅުވީ، ލުއި ގޭސް ހުސްވެފައިވާކަން އެނގޭ ކަމަށާއި އެހެން ނަމަވެސް ހުސްވި ސަބަބު އެނގިވަޑައިނުގަންނަވާ ކަމަށެވެ. އަދި އެކަން އެގޮތަށް ދިމާވި ސަބަބު އޮޅުންފިލުވަން ގުޅަންޖެހޭނީ އެސްޓިއޯ އަށް ކަމަށް އަބްދުﷲ ވިދާޅުވި އެވެ.
އަޅުގަނޑުމެންނެއް ނޫން ގޭސް ގެންނަނީ އެސްޓީއޯ އަށް އެނގިވަޑައިގަންނަވާނީ. އެސްޓިއޯ އިން ގެންނަ ގޭސް އަޅުގަނޑުމެން ފުޅިތަކަށް އަޅާ ވިއްކަނީ. ތީގެ ތަފްސީލް އެނގިވަޑައިގަންނަވާނީ އެސްޓީއޯ އަށް.މޯލްޑިވް ގޭސް ގެ މެނޭޖިންގ ޑިރެކްޓަރ އަބްދުﷲ މުހައްމަދު
މީގެ އިތުރުން އަބްދުﷲ ވިދާޅުވީ، އެސްޓީއޯ އާއެކު މަޝްވަރާތައް ކުރެވެމުންދާ ކަމަށާއި ގޭހުގެ އަޕްޑޭޓެއް އެ ކުންފުންޏަށް ލިބިފައިނުވާ ކަމަށެވެ. އަދި އެސްޓީއޯ އިން ގޭސް ގަންނަނީ ކީއްވެތޯ ސުވާލުކުރުމުން އަބްދުﷲ ވިދާޅުވީ އެއްގޮތަކަށް ވެސް އެސްޓީއޯ އިން ގޭސް ގަންނަނީ ކިއްވެކަން ވެސް ނޭނގޭ ކަމަށެވެ.
މިކަމާއި ގުޅިގެން އެސްޓީއޯއަށް ގުޅުމުން ބުނީ، އެކަމުގައި ބުނާނެ އެއްޗެއް ނޭނގޭ ކަމަށާއި، ކޮންމެ ދުވަހަކު އެތައް ކަމަކާ ޑީލް ކުރާއިރު ތިކަންކަމާ ވެސް މަޝްވަރާތައް ކުރެވިފައިވާނެ ކަމަށެވެ. މިކަމާ ގުޅިގެން އެސްޓީއޯގެ ފަރާތުން އެންމެ އެދެވޭ ޖަވާބެއް ލިބިފައެއް ނުވެ އެވެ.
ފާހަގަކޮށްލެވޭ ގޮތުގައި މިފަހުން ގޭސް ޝިޕްމަންޓަށް ދެއްކި 2 ލައްކަ ޑޮލަރު ގެއްލިފައިވާ އިރު، ގާބިލުކަން ނެތް ކުންފުންޏަކަށް ގޭހުގެ އޯޑަރު ދިނީ އެމްޑީގެ އިރުޝާދުގެ މަތިން ކަން ވަނީ ހާމަވެފަ އެވެ. އެ ކުންފުންޏަށް އޯޑަރު ދިން އިރު ޖަކްސާ އެނަރޖީ ޓްރޭޑިންގ ކޮމްޕެނީ ވެންޑަރ އެއްގެ ގޮތުގައި މޯލްޑިވްސް ގޭސްގައި ރަޖިސްޓްރީ ކުރީ އެމްޑީގެ ހާއްސަ ހުއްދަ އަކާއި އެކުގަ އެވެ.
