މެކްސިކޯގެ ބާރުގަދަ މަސްތުވާތަކެތީގެ ކާޓެލް ލީޑަރަކު މަރުވުމާ ގުޅިގެން އުފެދުނު ހަމަ ނުޖެހުންތަކާ އެކު، ފްލައިޓުތައް ކެންސަލް ކޮށްފި

ސިފައިން ހިންގި އޮޕަރޭޝަނެއްގައި މެކްސިކޯގެ ބާރުގަދަ މަސްތުވާ ތަކެތީގެ ކާޓެލްއެއްގެ ލީޑަރަކު މަރުވުމާ ގުޅިގެން އާދީއްތަ ދުވަހު އެ ޤައުމުގެ ހުޅަނގުގައި ހިނގި ހިތާމަވެރި ހަމަލާތަކާ ގުޅިގެން އެއާލައިން ތަކުން ފްލައިޓުތައް ކެންސަލްކޮށް، އެމެރިކާގެ ސްޓޭޓް ޑިޕާޓްމަންޓް އިން އެމެރިކާގެ ރައްޔިތުން ގޭގައި ތިބުމަށް އިލްތިމާސްކޮށްފި އެވެ. 

ސައުތުވެސްޓް އަދި އަލާސްކާ އެއާލައިންސް އިން ބުނީ، ޕުއާޓޯ ވަލާޓާ އަށް ދަތުރު ކުރާ ފްލައިޓުތައް ކެންސަލް ކޮށްފައިވާ ކަަމަށެވެ. ޑެލްޓާ އެއާޕައިންސް އިން ޕުއާޓޯ ވެލާޓާ އާއި، ގުއަޑަލަޖާރާ އަށް ދަތުރު ކުރާ މީހުންނަށް ޓްރެވަލް އިންޒާރުތައް ނެރެފައިވެ އެވެ. އެއާ ކެނެޑާ އިން ވެސް ޕުއާޓޯ ވަލާޓާ އެއާޕޯޓުގައި ހިންގާ އޮޕަރޭޝަންތައް ވަގުތީ ގޮތުން ހުއްޓާލާފައި ވަނީ ސަލާމަތީ ޙާލަތަށް ބެލުމަށް ފަހު ކަމަށް ބުނެ އެވެ. 

އެމެރިކާގެ ސްޓޭޓް ޑިޕާޓްމަންޓް އިން ސަލާމަތީ އިންޒާރެއް ނެރެ، ޖަލިސްކޯ، ޓަމައުލިޕާސް، މިޗޯއަކާން، ގުއެރޭރޯ އަދި ނުއެވޯ ލިއޯން ފަދަ ސްޓޭޓް ތަކުގައި ތިބި އެމެރިކާގެ ރައްޔިތުންނަށް އިތުރު އެންގުމެއް އަންގަންދެން ގޭގައި ތިބުމަށް އިލްްތިމާސް ކޮށްފައިވެ އެވެ. 

މެކްސިކޯގެ ޑިފެންސް މިނިސްޓްރީ އިން ބުނީ، ޖަލިސްކޯ ނިއު ޖެނެރޭޝަން ކާޓެލްގެ ލީޑަރު، އެލް މެންޗޯގެ ނަމުން ނަން ދީފައިވާ ނެމެސިއޯ ރުބެން އޮސެގުއެރާ ސެރްވާންޓެސް މަރުވީ މެކްސިކޯގެ ސަލާމަތީ ބާރު ތަކުން ހިންގި އޮޕަރޭޝަނެއްގައި ކަމަށެވެ. އޭނާ ޖަލިސްކޯ ސްޓޭޓުގެ ޓަޕަލްޕާގައި ހިންގި ރޭޑެއްގައި ޒަޚަމުވެ، މެކްސިކޯ ސިޓީ އަށް ގެންދިޔުމަށް ދަތުރު ކުރަމުން ދަނިކޮށް މަރުވެފައިވާ ކަމަށް ބުނެފައިވެ އެވެ. 

އެމެރިކާގެ ޑެޕިއުޓީ ސްޓޭޓް ސެކްރެޓަރީ ކްރިސްޓޮފާ ލޭންޑައު ވަނީ މި ކާޓެލް ލީޑަރު މަރުވެފައިވާ ކަމަށް ކަށަވަރު ކޮށްދެއްވައިފަ އެވެ. އަދި އޭނާ ސިފަ ކުރެއްވީ، އެ ލީޑަރަކީ އެންމެ ގިނައިން ލޭއޮހޮރުވާ އަދި އެންމެ ނިކަމެތި މަސްތުވާ ތަކެތީގެ ވިޔަފާރިވެރިއެއްގެ ގޮތުގަ އެވެ. 

މި އޮޕަރޭޝަންގެ ސަބަބުން ޖަލިސްކޯ އާއި، އަވަށްޓެރި ސްޓޭޓް ތަކުގައި ގަޑިއިރު ތަކެއް ވަންދެން ގިނަ ސަރަހައްދު ތަކެއް ބްލޮކުކޮށް، އަލިފާން ރޯކުރުމުގެ ހާދިސާތައް ހިންގާފައިވެ އެވެ. އިސްވެރިން ބުނެފައި ވަނީ ރޭޑް ހިންގުމުގައި ސިފައިންނަށް ހަމަލާ ދީފައިވާ ކަމަށާއި، ހަތަރު މީހަކު މަރުވެފައިވާ ކަމަށެވެ. އެގޮތުން ކާޓެލްގެ ލީޑަރު ހިމެނޭހެން ތިން މީހަކު މަރުވީ ޒަޚަމު ތަކެއް ލިބުނު ފަހުން ކަމަށް ބުނެފައިވެ އެވެ. 

މި އޮޕަރޭޝަންގައި ދެ މީހަކު ހައްޔަރު ކޮށްފައިވާާއިރު، އާާމާޑް ވެހިކަލް ތަކާއި، ރޮކެޓު ލޯންޗަރު އަދި އެހެނިގެން ހަތިޔާރުތައް ހޯދާފައިވާ ކަމަށް ބުނެފައިވެ އެވެ. އެ އޮޕަރޭޝަން ކުރިއަށް ގެންދިޔުމުގެ ތެރޭގައި ސިފައިންގެ ތެރެއިން ތިން މީހަކަށް އެކިވަރުގެ އަނިޔާތައް ލިބިފައިވާ ކަަމަށް ވެސް ބުނެފައިވެ އެވެ. 

ޖަލިސްކޯގެ ގަވަރުނަރު ޕާބްލޯ ލެމަސް ނަވޯރާ ވަނީ ކޯޑު ރެޑް އިމަޖެންސީ އިއުލާންކޮށް، އާންމު ދަތުރު ފަތުރުގެ ޙަރަކާތްތައް ހުއްޓާލައި އަދި ރައްޔިތުން ގޭގައި ތިބުމަށް އިލްތިމާސް ކޮށްފަަ އެވެ. ޖަލިސްކޯ ނިއު ޖެނެރޭޝަން ކާޓެލް އަކީ މެކްސިކޯގެ އެންމެ ބާރުގަދަ ކްރިމިނަލް ޖަމާއަތް ތަކުގެ ތެރެއިން ޖަމާއަތެއް ކަމަށާއި، އެމެރިކާ އަށް ފެންޓަނިލް އަދި އެހެނިހެން މަސްތުވާ ތަކެތި އެތެރެ ކުރާ މައިގަނޑު ޖަމާއަތަކީ އެއީ ކަަމަށް ބެލެވިފައިވެ އެވެ.