އެމެރިކާ އާއެކު އެއްބަސްވުމަކަށް އާދެވޭނީ ޑިޕްލޮމަސީ އަށް އިސްކަން ދީފި ނަމަ: އަރާގްޗީ

އެމެރިކާާ އާއި އީރާން އާ ދެމެދު ކުރިއަށް ދާ މަޝްވަރާ ތަކުގައި، އެއްބަސްވުމަކަށް އާދެވޭނީ ހަމައެކަނި ޑިޕްލޮމަސީ އަށް އިސްކަން ދީފި ނަމަ ކަމަށް، އީރާންގެ ފޮރިން މިނިސްޓަރު އައްބާސް އަރާގްޗީ ވިދާޅުވެއްޖެ އެވެ.

އެކްސްގައި ކުރެއްވި ޕޯސްޓެއްގައި އަރާގްޗީ ވިދާޅުވެފައި ވަނީ، އެމެރިކާއާ އެކު އެއްބަސްވުމަކަށް ދިޔުމަކީ ވަރަށް ކައިރީގައި އޮތް ކަމެއް ކަމަށެވެ. ނަމަވެސް، އެކަން ޙާސިލު ކުރެވޭނީ ހަމައެކަނި ޑިޕްލޮމަސީ އަށް އިސްކަން ދީގެން ކަމަށް އަރާގްޗީ ވިދާޅުވެފައިވެ އެވެ. 

އަރާގްޗީ މިހެން ވިދާޅުވެފައި ވަނީ، އީރާނާއި އެމެރިކާއާ ދެމެދު ކުރިއަށް ގެންދާ މަޝްވަރާ ތަކުގެ ތިން ވަނަ ބައްދަލުވުން، ކުރިމަތީގައި އޮއްވަ އެވެ. އޮމާން މެދެވެރި ވެގެން ކުރިއަށް ގެންދާ މި މަޝްވަރާ ތަކުގެ ތިން ވަނަ ބައްދަލުވުން އޮތީ، ސްވިޒަލެންޑުގެ ޖެނީވާގައި ބުރާސްފަތި ދުވަހު އެވެ. 

އެ ޕޯސްޓުގައި އަރާގްޗީ ވިދާޅުވީ، އީރާން އިން އެމެރިކާ އާއެކު ޖެނީވާގައި އަލުން މަޝްވަރާތައް ފަށާނީ އިންސާފުވެރި އަދި ހަމަހަމަ އެއްބަސްވުމަކަށް އެންމެ އަވަސް މުއްދަތެއްގެ ތެރޭގައި ދިޔުމުގެ ނިންމުމާ އެކު ކަމަށެވެ. އީރާންގެ ޑެޕިއުޓީ ފޮރިން މިނިސްޓަރު މާޖިދު ތަޚްތު ރަވަންޗީ އަންގާރަ ދުވަހު ވިދާޅުވެފައި ވަނީ، އެމެރިކާ އާއެކު އެއްބަސްވުމަކަށް ބޭނުންވާ ހުރިހާ ފިޔަވަޅު ތަކެއް އަޅަން އީރާން އިން އޮތީ ތައްޔާރަށް ކަމަށެވެ. 

މީގެ އިތުރުން އީރާންގެ ފޮރިން މިނިސްޓަރު އަރާގްޗީ ވަނީ، ޑިޕްލޮމަސީ އަށް އިސަކަން ދިނުމުގެ މުހިންމުކަން ވެސް ފާހަގަ ކުރައްވައިފަ އެވެ. އެއްބަސްވުމަކަށް ދިޔުމަކީ ވަރަށް ކައިރީގައި އޮތް ކަމެއް ކަމަށް އަރާގްޗީ ވިދާޅުވެފައިވާއިރު، އެމެރިކާ އިން އަންނަނީ އީރާންއާ ދެކޮޅަށް ބާރުގެ ބޭނުން ކުރަން ޖެހިދާނެ ކަމުގެ އިންޒާރު ދެމުންނެވެ.