ފްރޯޑްއާ ދެކޮޅަށް ހަނގުރާމަ އިއުލާން ކުރައްވައި، ލީޑު ކުރައްވާނީ ނައިބު ރައީސް ކަމަށް ޓްރަމްޕް ވިދާޅުވެއްޖެ

ސަރުކާރުގެ ފައިދާތައް، ނުވަތަ ބެނެފިޓްސް ހޯދުމުގައި ހިންގާ ފްރޯޑް ހުއްޓުވުމަށް، ފްރޯޑްއާ ދެކޮޅަށް ހަނގުރާމައެއް ފަށްޓަވާނެ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ.

ޓްރަމްޕް މިހެން ވިދާޅުވެފައި ވަނީ، އަންގާރަ ދުވަހުގެ ރޭ އޭނާ ދެއްވި ސްޓޭޓް އޮފް ޔޫނިއަންގެ ތަޤުރީރުގަ އެވެ. އެ ތަޤުރީރުގައި ޓްރަމްޕް ވަނީ ފްރޯޑްއާ ދެކޮޅަށް ހަނގުރާމައެއް ފަށްޓަވާނެ ކަމަށް އިއުލާން ކުރައްވައި، އެ މަސައްކަތް ލީޑު ކުރައްވާނީ އޭނާގެ ނައިބު ރައީސް ޖޭޑީ ވޭންސް ކަމަށް ވެސް ވިދާޅުވެފަ އެވެ. 

އެ ތަޤުރީރުގައި ޓްރަމްޕް ވިދާޅުވީ، އިދިކޮޅު ޑިމޮކްރަޓިކް ޕާޓީ އިން ކޮންޓްރޯލް ކުރާ ސްޓޭޓް ތަކުގައި ސަރުކާރުގެ ބެނެފިޓްސް ހޯދުމުގައި ބޮޑެތި ފްރޯޑް ތަކެއް ހިންގަމުން އަންނަ ކަމަށެވެ. ޚާއްސަކޮށް މިނެސޯޓާގައި މި މައްސަލަ ވަރަށް ބޮޑުވެފައިވާ ކަމަށް ޓްރަމްޕް ވިދާޅުވި އެވެ. އަދި މިފަދަ މައްސަލަތައް ކެލިފޯނިއާ، މެސެޗުސެޓްސް އަދި މެއިން ފަދަ ސްޓޭޓް ތަކުގައި ވެސް ހިނގަމުންދާ ކަމަށް ޓްރަމްޕް ވިދާޅުވި އެވެ.

އެކަންކަމަކީ އަޅައި ނުލައި ދޫކޮށްލެވޭނެ ކަމެއް ނޫން ކަމަށް ފާހަގަ ކުރައްވައި ޓްރަމްޕް ވިދާޅުވީ، އެކަމާ ދެކޮޅަށް ރަސްމީކޮށް ހަނގުރާމަ އިއުލާން ކުރެއްވީ ކަމަށެވެ. އަދި އެކަން ލީޑު ކުރައްވާނީ، "އަހަރަމެންގެ އެންމެ މޮޅު ނައިބު ރައީސް ޖޭޑީ ވޭންސް" ކަމަށް ވެސް ޓްރަމްޕް ވިދާޅުވެފައިވެ އެވެ. އެއާ އެކު ޓްރަމްޕް ވިދާޅުވީ، އެ ފްރޯޑްތައް ސަރުކާރަށް ހޯދިއްޖެ ނަމަ، ޤައުމުގެ ބަޖެޓު ވަރަށް ބޮޑަށް ހަމަހަމަ ކުރެވޭނެ ކަމަށެވެ. 

ފެޑަރަލް އިންވެސްޓިގޭޓަރުން މިނެސޯޓާގައި ސަރުކާރުގެ ބެނެފިޓްސް ހޯދުމުގައި ހިނގާ ފްރޯޑް ތަޙުގީގު ކުރަމުންދާއިރު، ޓްރަމްޕްގެ ސަރުކާރުން ގެންދަނީ ސޯމާލީ އިމިގްްރަންޓުންނާ ދެކޮޅަށް ވާހަކަ ދައްކަވަމުންނެވެ. އެގޮތުން ސަރުކާރުން ބުނެފައި ވަނީ، އެ ސްކީމް ތަކުގައި ސޯމާލީ މީހުން ބައިވެރިވެފައިވާ ކަމަށެވެ. ޓްރަމްޕްގެ ސަރުކާާރުން ތުހުމަތު ކުރަނީ މިނެސޯޓާގެ ސޯމާލީ ކޮމިއުނިޓީގެ ތެރޭގައި މުޅިން ފެތުރިފައިވާ ގޮތަށް ބެނެފިޓްސް ފްރޯޑްކޮށް ހޯދުމުގެ މައްސަލަ ހުރި ކަމަށެވެ. 

މިނެސޯޓާ އަކީ އެމެރިކާގައި އެންމެ ގިނަ ސޯމާލީ އިމިގްރަންޓުން ދިރިއުޅެމުން އަންނަ ސްޓޭޓްއަށް ވާއިރު، އެ ސްޓޭޓްގައި ގާތް ގަނޑަކަށް 80،000 (އަށްޑިހާ ހާސް) ސޯމާލީ މީހުން ދިރިއުޅެ އެވެ.