އޭލިއަން އަކީ ހަގީގަތެއް، އެކަމަކު އެފަދަ އެއްޗެއް ފެނިފައި ނުވޭ: އޮބާމާ

އޭލިއަން އަކީ އުޅޭ އެއްޗެއް ކަމަށް ވިދާޅުވެ، އެމެރިކާގެ ކުރީގެ ރައީސް ބަރަކް އޮބާމާ ވާހަކަ ދައްކަވައިފި އެވެ. 

ދާދި ފަހުން ބްރަޔަން ޓައިލާ ކޯހެންގެ ޕޮޑްކާސްޓުގައި ބައިވެރިވެ ވަޑައިގެން އޮބާމާ ވަނީ އެ ވާހަކަ ދައްކަވައިފަ އެވެ. އެގޮތުން އޭލިއަން އަކީ ހަގީގަތުގައި ވެސް އުޅޭ އެއްޗެއްތޯ ސުވާލު ކުރުމުން އޮބާމާ ވިދާޅުވީ، އެއީ ހަގީގަތެއް ކަމަށާއި ނަމަވެސް އޭނާ އަށް އެފަދަ އެއްޗެއް ފެނިފައި ނުވާ ކަމަށެވެ. 

އެއާ އެކު އޮބާމާ ވިދާޅުވީ އެމެރިކާގެ އަސްކަރީ ސަރަހައްދެއް ކަމަށްވާ "އޭރިޔާ51" ގައި އެފަދަ އެއްޗެއް ފޮރުވާފައި ނުވާ ކަމަށެވެ. އަދި މަަޒާޖީ ގޮތެއްގައި އޮބާމާ ވިދާޅުވީ، ސިއްރުން އެފަދަ ކަމެއް ހިންގާނެ ފަދަ ބޮޑު ރޭވުމެއް އެމެރިކާގެ ރައީސް އަށް ނޯންނާނެ ކަމަށެވެ. އޮބާމާގެ މި ވާހަކަ ތަކަށް ގިނަ ބައެއްގެ ސަމާލު ކަމެއް ލިބިގެން ގޮސްފައިވެ އެވެ. 

އެ ވާހަކަ އަށް ސޯޝަލް މީޑިއާގައި ބޮޑު ސަމާލު ކަމެއް ލިބުމާ ގުޅިގެން، އޮބާމާ އާންމު ކުރެއްވި ބަޔާނެއްގައި ވަނީ އެކަން އިތުރަށް ސާފު ކޮށްދެއްވައިފަ އެވެ. އޮބާމާ ވިދާޅުވީ އެ ޕޮޑްކާސްޓުގައި ވާހަކަ ދެއްކެވީ ވަރަށް އަވަސް އަވަހަށް ސުވާލާއި ޖަވާބު ދޭ، ލައިޓްނިން ރައުންޑެއްގެ ތެރެއިން ކަމަށެވެ. ނަމަވެސް އެކަމަށް ބައެއްގެ ސަމާލުކަން ހުއްޓުމުން، ހަގީގީ މާނަ ބަޔާން ކޮށްދެއްވަން ބޭނުންފުޅުވީ ކަމަށް އޮބާމާ ވިދާޅުވެފައިވެ އެވެ. 

އޮބާމާ ސާފު ކޮށްދެއްވި ގޮތުގައި ހިސާބު އިލްމުގެ ނަޒަރަކުން ބަލާއިރު، ކާއިނާތަކީ އިންތިހާ އަށް ތަނަވަސް ތަނަކަށް ވާތީ، ދުނިޔެ އިން ބޭރުގައި ވެސް ދިރުމެއް ހުރުމުގެ ފުރުސަތު ބޮޑު ކަމަށެވެ. އެހެން ނަމަވެސް، އިރުގެ ނިޒާމު ތަކުގެ މެދުގައި ހުރި ދުރުމިނަށް ބަލާއިރު، އޭލިއަން ދުނިޔެ އަށް ޒިޔާރަތް ކޮށްފައިވުމުގެ ފުރުސަތު ވަރަށް ކުޑަ ކަަމަށް އެ ބަޔާނުގައި އޮބާމާ ވިދާޅުވެފައިވެ އެވެ. 

އެކަން ފާހަގަ ކުރައްވައި އޮބާާމާ ވިދާޅުވީ 2009 ވަނަ އަހަރުން ފެށިގެން، 2017 ވަނަ އަހަރަށް އެމެރިކާގެ ރައީސް ކަމުގެ މަގާމުގައި އޭނާ ހުންނެވިއިރު، ބިމުން ބޭރުގެ މަޚުލޫގުން ދުނިޔެއާ ގުޅުން ޤާއިމު ކުރި ކަމުގެ އެއްވެސް ހެއްކެއް ފެނިވަޑައިގެންފައި ނުވާ ކަމަށެވެ. އޮބާމާ ވަނީ އެ ވާހަކަ ތަކުރާރުކޮށް ވިދާޅުވެފަ އެވެ. 

މީގެ ކުރިން 2021 ވަނަ އަހަރު ޖޭމްސް ކޯޑަންގެ ޓީވީ ޝޯއެއްގައި ވެސް އޮބާމާ ވަނީ އޭލިއަންއާ ގުޅޭ ގޮތުން ވާހަކަ ދައްކަވައިފަ އެވެ. އެފަހަރު އޮބާމާ ވިދާޅުވީ، ރައީސް ކަމުގެ މަގާމަށް ހަވާލުވެ ވަޑައިގެންނެވުމަށް ފަހު، އޭލިއަންގެ ހަޑިގަނޑުތަކާއި އުޅަނދުތައް ބަހައްޓާފައި ހުރި ލެބެއް ހުރިތޯ ސުވާލު ކުރެއްވި ކަމަށެވެ. 

އެކަމާ ގުޅޭ ގޮތުން ކުރި ދިރާސާ ތަކުން އެފަދަ ތަނެއް ނެތްކަން އެނގުނު ނަމަވެސް، އޭރު ސާފު ކޮށްދެވިފައި ނުވާ ބައެއް އުދުހޭ ތަކެތީގެ ރެކޯޑުތަކާއި، ފުޓޭޖުތައް ހުރި ކަމަށް އެ ފަހަރު އޮބާމާ ވަނީ ފާހަގަ ކުރައްވައިފަ އެވެ.