ޓްރަމްޕްގެ ބޯޑު އޮފް ޕީސްއާ މެދު ރަޝިޔާ އިން ސުވާލު އުފައްދައިފި

އެމެރިކާގެ ރައީސް ޑޮނަލްޑް ޓްރަމްޕް އުފައްދަވާފައިވާ ބޯޑު އޮފް ޕީސްއާ މެދު ރަޝިޔާ އިން ސުވާލު އުފައްދައިފި އެވެ.

ޓްރަމްޕް އުފައްދަވާފައިވާ ބޯޑު އޮފް ޕީސް ރަސްމީކޮށް އިފްތިތާހު ކޮށްފައިވާއިރު، އެ ބޯޑުގެ ފުރަތަމަ ބައްދަލުވުން ވެސް ވަނީ ބާއްވައިފަ އެވެ. ޓްރަމްޕް ވިދާޅުވީ، އެ ބޯޑަކީ ހަމައެކަނި ޣައްޒާ ހަނގުރާމަ އަށް އުފެއްދި ބޯޑެއް ނޫން ކަމަށާއި، އެ ބޯޑުން މުޅި ދުނިޔޭގެ ސުލްޙަ އަށް މަސައްކަތް ކުރާނެ ކަމަށެވެ. 

ނަމަވެސް، މި ބޯޑާ މެދު ބައިނަލްއަޤުވާމީ މުޖުތަމައުން ވެސް ސުވާލު އުފައްދާފައިވެ އެވެ. އެގޮތުން، އެ ބޯޑުގެ ސަބަބުން އދ. އިން ކުރަމުން އަންނަ މަސައްކަތް ތަކަށް ދެން ވެދާނެ ގޮތާ މެދު ގިނަ ބަޔަކު ކަންބޮޑުވުން ފާޅު ކޮށްފައިވެ އެވެ. އދ.ގެ ސަލާމަތީ މަޖިލީހުގެ ދާއިމީ މެމްބަރުންގެ ތެރެއިން މި ބޯޑުގައި ބައިވެރި ވެފައި ވަނީ އެމެރިކާ އެކަންޏެވެ. ސަލާމަތީ މަޖިލީހުގެ އެހެން ދާއިމީ މެމްބަރުންނަކީ ރަޝިޔާ އާއި، ޗައިނާ އާއި، އިނގިރޭސިވިލާތް އަދި ފްރާންސް އެވެ. 

ރަޝިޔާގެ ތާސް ނިއުސް އެޖެންސީ އަށް މައުލޫމާތު ދެއްވަމުން އެ ޤައުމުގެ ފޮރިން މިނިސްޓްރީގެ އޮފިޝަލެއް ކަމަށްވާ ކިރިލް ލޮގްވިނޯވް ވިދާޅުވީ، ސުލްޙައިގެ ބޯޑުގެ ނިޒާމުގައި އެއީ "ނަތީޖާ ނުނެރެވޭނެ ނިޒާމު ތަކުގެ" ބަދަލުގައި އުފައްދާފައިވާ ބައިނަލްއަޤުބާމީ އައު އޮނިގަނޑެއް ކަމަށެވެ. އަދި އެ ބޯޑުގެ މެންޑޭޓުގައި ޣައްޒާގެ ވާހަކަ އެއްވެސް ވަރަކަށް ބަޔާން ކޮށްފައި ނުވާ ކަމަށް އޭނާ ފާހަގަ ކުރެއްވި އެވެ. 

ލޮގްވިނޯވް އިތުރަށް ވިދާޅުވީ، ބައިނަލްއަޤުވާމީ ސުލްޙަ އާއި، ސަލާމަތް ދެމެހެއްޓުމަށް ދުނިޔެ ޤަބޫލު ކުރާ ހަމައެކަނި މުއައްސަސާ އަކީ އދ.ގެ ސަލާމަތީ މަޖިލިސް ކަމަށެވެ. އެހެން ކަމަށްވާއިރު، ޓްރަމްޕް އުފައްދަވާފައިވާ ބޯޑު އޮފް ޕީސް އިން އދ. އާއެކު މަސައްކަތް ކުރާނެ ގޮތަކާ މެދު ގިނަ ސުވާލު ތަކެއް އުފެދޭ ކަމަށް އޭނާ ވިދާޅުވި އެވެ. ހަމަ އެހެންމެ، މިހާތަނަށް ބޭއްވި މި ބޯޑުގެ އެއްވެސް ބައްދަލުވުމަކަށް އދ.ގެ ސެކްރެޓަރީ ޖެނަރަލް އެންޓޯނިއޯ ގުޓަރޭސް އަށް ދައުވަތު ދީފައި ނުވާ ކަމަށް ވެސް އޭނާ ފާހަގަ ކުރައްވާފައިވެ އެވެ. 

ސުލްޙައިގެ ބޯޑުގެ ޗާޓަރުގައި ބުނެފައިވާ ގޮތުން، އެ ބޯޑުން މަސައަކަތް ކުރާނީ ބައިނަލްއަޤުވާމީ ޤާނޫނުތަކާ އެއްގޮތްވާ ގޮތުގެ މަތިން ސުލްޙަ ޤާއިމު ކުރުމަށެވެ. މި ބޯޑުގެ ރިޔާސަތު ބަލަހައްޓަވާނީ އެމެރިކާގެ ރައީސް ޓްރަމްޕް އެވެ. މި ބޯޑުގެ ނިންމުންތައް ވީޓޯ ކުރުމާއި، މެމްބަރުން ވަކި ކުރުމުގެ ބާރުތައް ފުޅާ ދާއިރާއެއްގައި ޓްރަމްޕް އަށް ލިބިވަޑައިގެންފައިވެ އެވެ. 

އދ.ގެ ސަލާމަތީ މަޖިލީހުގެ އެންމެ އިސް ޒިންމާ އަކީ ބައިނަލްއަޤުވާމީ ސުލްޙަ އާއި، ސަލާމަތް ދެމެހެއްޓުމެވެ. އެ މަޖިލީހުގެ އެންމެ ފުރަތަމަ ބައްދަލުވުން 1946 ވަަނަ އަހަރު އިނގިރޭސިވިލާތުގެ ލަންޑަންގައި ބޭއްވި ނަމަވެސް، މިހާރު އެ މަޖިލީހުގެ މައި މަރުކަޒު ހުންނަނީ އެމެރިކާގެ ނިއު ޔޯކްގަ އެވެ.