އެމްޑީޕީ ޕިކަޕް ޖަލްސާ: "ރިޔާސީ އިންތިޚާބަށް ނުފޫޒު ފޯރުވާތީ އީސީ އަށް ހުށަހެޅި މައްސަލަ ނުބަލާނެ ކަމަށް އަންގައިފި"
ރިޔާސީ ދައުރު ދިގުދަންމާލުމަށް ސަރުކާރުން ރާވަމުންދާ ކަމަށް ތުހުމަތުކޮށް، ރައްޔިތުންގެ ބާރު ކަނޑުވާލުމަށް ކުރާ މަސައްކަތްތަކާ ދެކޮޅަށް އެމްޑީޕީން ވަނީ އަޑުއުފުލާފަ. އިންތިޚާބުތަކަށް ނުފޫޒު ފޯރުވުމަށް ވަޒީފާގެ ބިރުދައްކައި ރިޝުވަތު ދެމުންދާ ކަމަށް ބުނެ، މިފަދަ ކަންކަން ހުއްޓުވުމަށް މުއައްސަސާތަކުން އިހުމާލުވަމުންދާ ކަމުގެ ކަންބޮޑުވުން އެ ޕާޓީން ފާޅުކުރޭ.
މާޒް ސަލީމް އެމްޑީޕީގެ ޕިކަޕް ޖަލްސާގައި ވާހަކަދައްކަވަނީ | ރާއްޖެ އެމްވީ
ރައީސް ޑރ.މުހައްމަދު މުއިއްޒުގެ ސަރުކާރުން ރިޔާސީ އިންތިޚާބަށް ނުފޫޒު ފޯރުވާތީ އިލެކްޝަންސް ކޮމިޝަން (އީސީ) އަށް ހުށަހެޅި މައްސަލަ ނުބަލާނެ ކަމަށް އަންގާފައިވާ ކަމަށް އެ މައްސަލަ އީސީ އަށް ހުށަހެޅުއްވި، އެމްޑީޕީގެ ޤައުމީ މަޖިލީހުގެ މެމްބަރު އަހުމަދު ސަލީމް (މާޒް ސަލީމް) ވިދާޅުވެއްޖެ އެވެ.
އޭނާ އެފަދައިން ވިދާޅުވީ އެމްޑީޕީގެ ޕިކަޕް ޖަލްސާގައި އަންގާރަ ދުވަހު ހަވީރު ވާހަކަދައްކަވަމުންނެވެ.
މާޒް ސަލީމް ވިދާޅުވީ ރައްޔިތުންގެ ކުރިމައްޗަށް ފެންނަ ނުފެންނަ ވޯޓެއް ގެންނަނީ ރައްޔިތުން ލައްވާ ރައްޔިތުންގެ ބާރު ކަނޑުވާލަން ކަމަށެވެ. މާޒް ސަލީމް ވިދާޅުވީ ރައްޔިތުންގެ ވޯޓުލުމުގެ ހައްގު ގެއްލުވާލައިގެން ނުވާނެ ކަމަށެވެ. ރައްޔިތުންގެ މަޖިލީހުގެ ބާރު ކަނޑުވާލީ ވެސް ރައްޔިތުންގެ މަޖިލީހުގެ މެމްބަރުން މެދުވެރިކޮށް ކަމަށާއި އާއްމުންގެ ވޯޓުގެ ބާރު ކަނޑުވާލަން އުޅެނީ އާއްމުން މެދުވެރިވެގެން ކަމަށް އޭނާ ވިދާޅުވި އެވެ. މިއީ ވަރަށް މަކަރުވެރިކަމާއި އެކު ސަރުކާރުން ކުރަމުންދާ ކަމެއް ކަަމަށް ސަލީމް ވިދާޅުވި އެވެ. އަދި ނުފޫޒު ފޯރުވަމުންދާ އިރު އެކަންކަން ބަލާނެ މުއައްސަސާ އެއް ނެތް ކަމަށް މާޒް ސަލީމް ވިދާޅުވި އެވެ.
"މި ވޯޓުގެ ނަތީޖާ ރައީސް މުއިއްޒު ބޭނުންވާ ގޮތަށް ނެރެދިނުމަށް ރިޝުވަތުދީ ވަޒީފާގެ ބިރު ދައްކާ، ވަޒީފާ ދީ ވަޒީފާ އިން ކަނޑަމުން ދަނީ. މައްސަލަ ވެސް ހުށަހަޅައިފިން. ހުށަހެޅީމާ އީސީ އިން އެބަ އޮތް މިއަދު އަންގާފަ އެކަން ނުބަލާނެކަން. ތިމަންނަމެންނަކަށް ނުބެލޭނެ އޭ އޭސީސީ އަށް މައްސަލަ ހުށަހަޅާށޭ." އޭނާ ވިދާޅުވި އެވެ.
ސަލީމްގެ އިތުރުން ކެންދޫ ދާއިރާގެ މެމްބަރު މައުރޫފް ޒާކިރު ވެސް އެ ޖަލްސާގައި ވާހަކަދެއްކެވި އެވެ. މައުރޫފް ވަނީ ރިޔާސީ އިންތިޚާބުގެ ދައުރު ދިގުދަންމާލަން ސަރުކާރުން ރާވަމުންދާ ކަމަށް ވިދާޅުވެފަ އެވެ. ވެރިކަމަށް އަންނަންވީ ވައުދުތައް ނުފުއްދޭ މީހަކަށް އިތުރު ވައުދުތައް ވެގެން ފުރުސަތު ދޭން ޖެހޭ ސަބަބެއް ނެތް ކަމަށް އޭނާ ވިދާޅުވި އެވެ. މި ސަރުކާރަށް ރައްޔިތުންނަށް ރަނގަޅުވާ ގޮތަށް ކޮށްދެވުނު އެއްވެސް ކަމެއް ނެތް ކަމަށް އޭނާ ވަނީ ވިދާޅުވެފަ އެވެ. މި ސަރުކާރުން ދަނީ ރައްޔިތުން ބިކަކޮށް ނިކަމެތި ކުރަމުން ކަމަށް ވެސް މައުރޫފް ވިދާޅުވި އެވެ.
އެ ޕިކަޕް ޖަލްސާ ނިންމާލާފައި ވަނީ އަންގާރަ ދުވަހުގެ ރޭ ހަރުގެ ޖަލްސާ އެއް ބާއްވަން ހަމަޖެހިފައިވާ ކަން ފާހަގަކުރަމުންނެވެ. ރިޔާސީ އިންތިޚާބާއި ރައްޔިތުންގެ މަޖިލީހުގެ އިންތިޚާބު އެއް ތާރީޚެއްގައި ބޭއްވުމާ މެދު ގޮތެއް ނިންމުމަށް ރެފަރެންޑަމް ވޯޓު ނެގުމާއި ދެކޮޅަށް މާޗު މަހުގެ 21 ވަނަ ދުވަހު ބޮޑު މުޒާހަރާއެއް ކުރުމަށް އެމްޑީޕީ އިން ވަނީ ނިންމާފަ އެވެ.
