އެޕްސްޓީންގެ މައްސަލައިގައި އެމެރިކާގެ ކުރީގެ ރައީސް ބިލް ކްލިންޓަން އާއި އަނބިކަނބަލުން ހިލަރީ އާ ސުވާލު ކުރަން މަޖިލީހަށް ހާޒިރު ކުރަނީ
ޖެފްރީ އެޕްސްޓީންގެ މައްސަލައިގައި ބަޔާން ދެއްވުމަށް ކުރީގެ ރައީސް ބިލް ކްލިންޓަނާއި ހިލަރީ ކްލިންޓަން އެއްބަސްވެވަޑައިގަތީ، އެ ބޭފުޅުންނާ ދެކޮޅަށް މަޖިލީހުގެ އިހުތިރާމް ކުޑަކުރުމުގެ މައްސަލައެއް ކުރިއަށް ގެންގޮސްފާނެތީ އެކަމުން ސަލާމަތްވުމަށް. މި ތަހުގީގަކީ ސިޔާސީ މަގްސަދެއްގައި ކުރާ ކަމެއް ކަމަށް އެ ބޭފުޅުން ތުހުމަތު ކުރެއްވި ނަމަވެސް، މައުލޫމާތު އޮޅުވާލިޔަ ނުދިނުމަށްޓަކައި ބަޔާން ދިނުން އާންމުކޮށް ހުޅުވާލައިގެން ކުރިއަށް ގެންދިއުމަށް ވަނީ ނިންމާފައި. މިއީ 1983 ވަނަ އަހަރަށްފަހު އެމެރިކާގެ ކުރީގެ ރައީސަކު ކޮންގްރެސްގެ ކޮމިޓީއަކަށް ބަޔާން ދެއްވާ ފުރަތަމަ ފަހަރު.
އެމެރިކާގެ ސްޓޭޓް ޑިޕާޓްމަންޓުން އާންމުކޮށްފައިވާ ފޮޓޯތަކުގެ ތެރެއިން އެއް ފޮޓޯއަކުން، އިނގިރޭސިވިލާތުގެ ބޮޑުވަޒީރުގެ ރަސްމީގެ، ނަންބަރު 10 ޑައުނިންގް ސްޓްރީޓްގެ ބޭރުގައި ބިލް ކްލިންޓަން އަދި ޖެފްރީ އެޕްސްޓީން ތިއްބަވަނިކޮށް ފެނޭ. | ގެޓީ އިމޭޖަސް
ޖިންސީ ކުށްވެރިޔާ ޖެފްރީ އެޕްސްޓީން ހިންގާފައިވާ ޖަރީމާތައް ތަހުގީގު ކުރަމުންދާ އެމެރިކާގެ ހައުސް އޮފް ރެޕްރެޒެންޓެޓިވްސްގެ ކޮމިޓީއެއްގެ ކުރިމައްޗަށް، އެމެރިކާގެ ކުރީގެ ރައީސް ބިލް ކްލިންޓަން އާއި އޭނާގެ އަނބިކަނބަލުން ކުރީގެ ސެކްރެޓަރީ އޮފް ސްޓޭޓް ހިލަރީ ކްލިންޓަން ހާޒިރުކޮށް ސުވާލު ކުރަން ނިންމައިފި އެވެ.
ޑިމޮކްރެޓިކް ޕާޓީގެ ފަރާތުން ރިޔާސީ އިންތިޚާބުގައި ވާދަކުރެއްވި ހިލަރީ ކްލިންޓަނާއި، އެކަމަނާގެ ފިރިކަލުން ކުރީގެ ރައީސް ބިލް ކްލިންޓަން، ހައުސް އޯވަސައިޓް ކޮމިޓީއަށް ބަޔާން ދެއްވުމަށް އެއްބަސްވެވަޑައިގަތީ ދާދި ފަހުންނެވެ.
މީގެ ކުރިން މި ދެ ބޭފުޅުންވެސް ވަނީ ކޮމިޓީއަށް ހާޒިރުވުމަށް އިންކާރު ކުރައްވާފައެވެ. އަދި އެއީ ސިޔާސީ މަގްސަދެއްގައި ކުރާ ކަމެއްގެ ގޮތުގައި އޭރު ސިފަކުރެއްވިއެވެ. ނަމަވެސް، ކޮމިޓީއަށް ހާޒިރުވުމަށް އެއްބަސްވެވަޑައިގަތީ، އެ ބޭފުޅުންނާ ދެކޮޅަށް މަޖިލީހުގެ އަމުރަށް ނުކިޔަމަންތެރިވުމުގެ މައްސަލަ (ކޮންޓެމްޕްޓް އޮފް ކޮންގްރެސް) ކުރިއަށް ގެންގޮސްފާނެތީ އެކަމުން ސަލާމަތްވުމަށެވެ.
ހިލަރީ ކްލިންޓަން ވިދާޅުވެފައިވަނީ އެޕްސްޓީންއާ ބައްދަލުވި ކަމެއް ނުވަތަ ވާހަކަ ދެކެވުނު ކަމެއް ހަނދުމަފުޅު ނެތް ކަމަށެވެ. އެޕްސްޓީންއާ ގާތް ބޭފުޅެއް ކަމަށްވާ ބިލް ކްލިންޓަން ވަނީ، އެއްވެސް ގޯސް ކަމެއް ކުރެއްވިކަމަށް ނުވަތަ އެޕްސްޓީން ހިންގި ޖަރީމާތަކުގެ އެއްވެސް މައުލޫމާތެއް އެނގިވަޑައިގަންނަވާ ކަމަށް އިންކާރު ކުރައްވާފައެވެ.
މީގެ އިތުރުން، ބިލް ކްލިންޓަން ވިދާޅުވީ މީގެ ވިހި އަހަރު ކުރިން އެޕްސްޓީންއާ އޮތް ގުޅުން ކަނޑާލާފައިވާ ކަމަށެވެ. އަދި 2019 ވަނަ އަހަރު މަރުވި އެ މަހުޖަނާ ގުޅުމެއް ބޭއްވުނު ކަމަށްޓަކާ ހިތާމަކުރައްވާ ކަމެއް ކަމަށްވެސް އެމަނިކުފާނު ވިދާޅުވިއެވެ.
ބުރާސްފަތި ދުވަހު ހިލަރީ ބަޔާން ދެއްވުމަށް ހަމަޖެހިފައިވާއިރު ބިލް ކްލިންޓަންގެ ބަޔާން ދެއްވުން އޮންނާނީ މި ހުކުރު ދުވަހު ކަމަށް ބެލެވެއެވެ.
ކޮމިޓީއަށް ހާޒިރުވެ ބަޔާން ދެއްވާނެކަން މި ދެ ބޭފުޅުން ފާއިތުވި ހަފުތާތަކުގައި އިއުލާން ކުރެއްވީ، ކުރިން ގެންގުޅުއްވި ދޫނުދިނުމުގެ ސިޔާސަތު ބަދަލުކުރެއްވުމަށްފަހުއެވެ.
ކޮމިޓީގައި ހިމެނޭ ޑިމޮކްރެޓިކް ޕާޓީގެ ބައެއް މެންބަރުންވެސް ވަނީ މަޖިލީހުގެ އިމްތިޔާޒުތަކަށް އަރައިގަތުމުގެ މައްސަލަ ކުރިއަށް ގެންދިއުމަށް ތާއީދުކޮށް ވޯޓު ދެއްވާފައެވެ.
ކްލިންޓަންގެ ދެމަފިރިކަނބަލުން މީގެ ކުރިން ވަނީ، ކޮމިޓީގެ ރިޕަބްލިކަން ލީޑަރު ޖޭމްސް ކޯމާ މި ތަހުގީގު ކުރިއަށް ގެންދަވަނީ "ވަކި ފަރާތަކަށް ޖެހިފައިވާ ސިޔާސީ" މަގްސަދެއްގައި ކަމަށް ތުހުމަތު ކުރައްވާފައެވެ. އަދި ކޯޓު އަމުރުތަކަކީ ރައީސް ޓްރަމްޕް އަންގަވައިގެން ސިޔާސީ ވާދަވެރިން ލަދުގަންނަވާލުމަށް ހިންގާ އުކުޅެއްގެ ގޮތުގައި އެ ބޭފުޅުން ސިފަކުރެއްވިއެވެ.
އެ ބޭފުޅުން ބާރުއަޅުއްވައި ވިދާޅުވަމުން ގެންދެވީ، އެޕްސްޓީންއާ ގުޅޭގޮތުން އެ ބޭފުޅުންނަށް އެނގިވަޑައިގަންނަވާ "މަދު މައުލޫމާތުތައް" ހިމެނޭހެން ހުވާގެ މަތީގައި ބަޔާންތައް މިހާރުވެސް ހުށަހަޅާފައިވާނެ ކަމަށެވެ.
އެހެންނަމަވެސް، ބިލް ކްލިންޓަންގެ ތަރުޖަމާނު ވިދާޅުވީ އެ ބޭފުޅުން ކޮމިޓީއަށް ހާޒިރުވާނެ ކަމަށާއި، އެއީ "އެންމެންގެ މައްޗަށްވެސް ހަމަހަމަކޮށް ހިނގާނެ އުސޫލެއް ގާއިމުކުރުމަށް" ކުރައްވާ ކަމެއް ކަމަށެވެ.
ޖޭމްސް ކޯމާ ވިދާޅުވީ، ކްލިންޓަންގެ ދެމަފިރިކަނބަލުންގެ ބަޔާން ހޯދުމަށް ކުރާ މަސައްކަތަކީ "ގާނޫނުގެ ކުރިމަތީގައި އެއްވެސް މީހަކު ތަފާތު ނުވާނެ" ކަން ދެއްކުމަށް ދެ ޕާޓީ ގުޅިގެން ކުރާ މަސައްކަތެއް ކަމަށެވެ.
އެމެރިކާގެ ޑިޕާޓްމަންޓް އޮފް ޖަސްޓިސް (ޑީ.އޯ.ޖޭ) އިން އެޕްސްޓީންގެ މައްސަލައިގައި ހޯދާފައިވާ ލިޔެކިޔުންތައް މިހާރު މަރުހަލާތަކަކަށް ބަހާލައިގެން އާންމުކުރަމުންދާއިރު، އޭގެ ތެރޭގައި ހިމެނޭ ލިޔުންތަކާއި ފޮޓޯތަކުން ބިލް ކްލިންޓަން ފެނެ އެވެ.
މި ފައިލްތަކުން ހާމަވާ ގޮތުގައި، އެޕްސްޓީން ޖިންސީ ކުށްތަކަށް ކުށްވެރިވި ފަހުންވެސް، މުޖުތަމައުގެ އިސް ފަންތީގެ ގިނަ ބަޔަކާ އޭނާއާ ދެމެދު ގާތް ގުޅުންތަކެއް އޮތެވެ.
މި ފައިލްތަކުގައި ނަން ހިމެނޭ އެހެން ބޭފުޅުންނެކޭ އެއްފަދައިން، އޭގެ ތެރޭގައި މިހާރުގެ ރައީސް ޑޮނަލްޑް ޓްރަމްޕް ހިމެނިވަޑައިގަންނަވާއިރު، ލިޔެކިޔުންތަކުގައި ނަން އޮތުމަކީ އެ ބޭފުޅަކު ކުށެއް ކުރެއްވި ކަމުގެ ހެއްކެއް ނޫނެވެ. ޓްރަމްޕަކީވެސް މީގެ ކުރިން އެޕްސްޓީންއާ އެކު ގާތް އެކުވެރިކަމެއް ބޭއްވި ބޭފުޅެކެވެ.
އާންމުކޮށް މިފަދަ ބަޔާންތައް ނަގަނީ ސިއްރުކޮށްގެން ކަމަށްވިޔަސް، ކްލިންޓަންގެ ދެމަފިރިކަނބަލުން ބޭނުންފުޅުވީ ބަޔާން ދިނުން އާންމުކޮށް ހުޅުވާލައިގެން ކުރިއަށް ގެންދިއުމަށެވެ. އެއީ ބަޔާނުގެ ވަކި ބައިތަކެއް މީޑިއާއަށް ލީކުކޮށްލިޔަ ނުދިނުމަށެވެ.
މި ހުކުރު ދުވަހު ބިލް ކްލިންޓަން ކޮމިޓީއަށް ހާޒިރުވެވަޑައިގަތުމަކީ ގިނަ ބަޔަކު އިންތިޒާރު ކުރަމުންދާ ކަމެކެވެ. މިއީ 1983 ވަނަ އަހަރު ޖެރަލްޑް ފޯޑް ބަޔާން ދެއްވި ފަހުން، އެމެރިކާގެ ކުރީގެ ރައީސަކު ކޮންގްރެސްގެ ކޮމިޓީއަކަށް ބަޔާން ދެއްވާ ފުރަތަމަ ފަހަރެވެ.
މަސްދަރު: ބީބީސީ
