އޭލިއަންއާ ގުޅޭ ސިއްރު ފައިލްތައް އާންމުކުރައްވަން ޓްރަމްޕް ނިންމަވައިފި

އެމެރިކާގެ ރައީސް ޑޮނަލްޑް ޓްރަމްޕް، އެ ގައުމުގެ ޑިފެންސް ޑިޕާޓްމަންޓް (ޕެންޓަގަން) ހިމެނޭހެން ސަރުކާރުގެ އެކި އިދާރާތަކަށް، ކާއިނާތުގެ މަޚްލޫގުން ނުވަތަ "އޭލިއަން" އިންނާ ގުޅޭ ސިއްރު ފައިލްތައް އާންމުކުރުމުގެ މަސައްކަތް ފެށުމަށް އަމުރުކުރައްވާނެ ކަމަށް ވިދާޅުވެއްޖެއެވެ.

ޓްރަމްޕް މިކަން އިއުލާން ކުރެއްވީ އޭނާގެ އަމިއްލަ ސޯޝަލް މީޑިއާ ޕްލެޓްފޯމް ކަމަށްވާ "ޓްރުތް ސޯޝަލް" ގައެވެ. މީގެ އިތުރުން، ކުރީގެ ރައީސް ބަރަކް އޮބާމާ މިދިޔަ ހަފުތާގައި ޕޮޑްކާސްޓެއްގައި ވާހަކަދައްކަވަމުން "އޭލިއަން އިންނަކީ ހަގީގަތެއް" ކަމަށް ވިދާޅުވުމާ ގުޅިގެން، އޮބާމާ ވަނީ ދައުލަތުގެ ސިއްރު މައުލޫމާތު ހާމަކުރައްވާފައި ކަމަށް ވިދާޅުވެ ޓްރަމްޕް ވަނީ އެކަމަށް ފާޑުވިދާޅުވެފައެވެ.

ރައީސްގެ ރަސްމީ މަތިންދާބޯޓު "އެއަރ ފޯސް ވަން" ގައި ނޫސްވެރިންނާ ވާހަކަދައްކަވަމުން ޓްރަމްޕް ވިދާޅުވީ، އޮބާމާ އެފަދަ ވާހަކައެއް ދައްކަވައިގެން ނުވާނެ ކަމަށާއި، އެއީ އޮބާމާ ހެއްދެވި ވަރަށް ބޮޑު ގޯހެއް ކަމަށެވެ.

އޭލިއަން އިންނަކީ ހަގީގަތެއް ކަމަށް ޓްރަމްޕް ގަބޫލުކުރައްވާތޯ ސުވާލުކުރުމުން އޭނާ ވިދާޅުވީ، އެއީ ހަގީގަތެއް ކަމެއް ނުވަތަ ނޫންކަމެއް އޭނާއަށް އެނގިވަޑައިނުގަންނަވާ ކަމަށެވެ. އެމެރިކާގެ ކުރީގެ ރައީސް ބަރަކް އޮބާމާ، މިދިޔަ ހޮނިހިރު ދުވަހު އާންމުކުރި ބްރަޔަން ޓައިލާ ކޯހެންގެ ޕޮޑްކާސްޓް އިންޓަވިއުއެއްގައި ވިދާޅުވީ އޭލިއަން އިންނަކީ ހަގީގަތެއް ކަމަށް ގަބޫލުކުރައްވާ ކަމަށެވެ.

އޮބާމާ ވިދާޅުވީ، އޭލިއަން އިންނަކީ ހަގީގަތެއް ކަމަށާއި، ނަމަވެސް އޭނާއަށް އެފަދަ މަޚްލޫގަކު ފެނިވަޑައިގެންފައި ނުވާ ކަމަށެވެ. އަދި އެފަދަ މަޚްލޫގުން "އޭރިއާ 51" ގައި ބަންދުކޮށްފައި ނުވާ ކަމަށްވެސް އޭނާ ވިދާޅުވިއެވެ.

މީގެ އިތުރުން އޮބާމާ ވިދާޅުވީ، އެމެރިކާގެ ރައީސަށް ސިއްރުން އެފަދަ ކަމެއް ފޮރުވައިގެން ބޮޑު ރޭވުމެއް ރާވާފައި ނުވާނަމަ، ބިމުގެ އަޑީގައި އެފަދަ އެއްވެސް މަރުކަޒެއް ނުހުންނާނެ ކަމަށެވެ.

އޮބާމާގެ މި ވާހަކަތައް މީޑިއާގެ ސަމާލުކަމަށް އައުމާ ގުޅިގެން، އޭނާ ފަހުން ވަނީ އެކަން ސާފުކޮށްދެއްވާފައެވެ. އޮބާމާ ވިދާޅުވީ، ކާއިނާތުގެ ބޮޑުމިނަށް ބަލާއިރު، ދުނިޔެއިން ބޭރުގައި ދިރުމެއް ހުރުމުގެ ފުރުސަތު ބޮޑު ކަމަށް އޭނާ ގަބޫލުކުރައްވާ ކަމަށެވެ.

އިންސްޓަގްރާމްގައި ކުރެއްވި ޕޯސްޓެއްގައި، 2009 އިން 2017 އަށް އެމެރިކާގެ ރައީސްކަން ކުރެއްވި އޮބާމާ ވިދާޅުވީ، އޭނާގެ ރައީސްކަމުގެ ދައުރުގައި ކާއިނާތުގެ މަޚްލޫގުން އިންސާނުންނާ މުއާމަލާތް ކުރި ކަމުގެ އެއްވެސް ހެއްކެއް ފެނިވަޑައިގެންފައި ނުވާ ކަމަށެވެ.

އޮބާމާ މި ވާހަކަތައް ފުރަތަމަ ދެއްކެވީ ޕޮޑްކާސްޓްގައި ކުރިމަތިވި އަވަސް ސުވާލުތަކަކަށް ޖަވާބު ދެއްވަމުންނެވެ.

އޮބާމާ އެ އިންޓަވިއު ދެއްވިއިރު، ދައުލަތުގެ ސިއްރު މައުލޫމާތެއްގެ މައްޗަށް ބިނާކޮށް ވާހަކަދެއްކެވި ކަމުގެ އެއްވެސް ހެތްކެއް ފެންނާކަށް ނެތެވެ.

ޑިމޮކްރެޓިކް ޕާޓީގެ އޮބާމާ އާއި ރިޕަބްލިކަން ޕާޓީގެ ޓްރަމްޕަކީ ސިޔާސީ ގޮތުން ޒަމާންވީ ދެ ހަތުރުންނެވެ.

މިދިޔަ ބުރާސްފަތި ދުވަހު އެއަރ ފޯސް ވަންގައި ވާހަކަދައްކަވަމުން ޓްރަމްޕް ވިދާޅުވީ، ގިނަ ބަޔަކު އޭލިއަން އިން އުޅޭ ކަމަށް ގަބޫލުކުރި ނަމަވެސް، އޭނާ ދުވަހަކުވެސް އެކަމާ ބެހޭގޮތުން ވާހަކަ ނުދައްކަވާ ކަމަށާއި، އެކަމުގައި ވަކި ގޮތެއް ނުނިންމަވާ ކަމަށެވެ.

ނަމަވެސް އޭގެ މަދު ގަޑިއިރުތަކެއް ފަހުން ޓްރަމްޕް "ޓްރުތް ސޯޝަލް" ގައި ކުރެއްވި ޕޯސްޓެއްގައި ވިދާޅުވީ، އާންމުންގެ ޝައުގުވެރިކަން މިކަމަށް ވަރަށް ބޮޑަށް ހުރުމާ ގުޅިގެން، އޭލިއަން އިންނާއި، ކާއިނާތުގެ މަޚްލޫގުންނާއި، ހޯދިފައިނުވާ އުދުހޭ ތަކެތި (ޔޫ.އޭ.ޕީ އަދި ޔޫ.އެފް.އޯ) އާ ގުޅޭ ހުރިހާ ސިއްރު ފައިލްތަކެއް ހާމަކުރަން މަސައްކަތް ކުރައްވާނެ ކަމަށެވެ.

އެމެރިކާގައި ޔޫ.އެފް.އޯ އާއި އޭލިއަން އިންނާ މެދު އާންމުންގެ ޝައުގުވެރިކަން އަލުން އުފެދުނީ 2017 ވަނަ އަހަރުއެވެ. އެއީ އުޑުމަތިން ފެނުނު އާދަޔާ ހިލާފު ތަކެއްޗާ ގުޅޭގޮތުން ޕައިލެޓުންނާއި ސިފައިން ދީފައިވާ މައުލޫމާތުތައް ތަހުގީގު ކުރުމަށް ޕެންޓަގަނުން ސިއްރު ޕްރޮގްރާމެއް ހިންގާކަމުގެ ރިޕޯޓްތައް ފެންމަތިވުމާ ގުޅިގެންނެވެ.

މީގެ އިތުރުން، 2022 ވަނަ އަހަރު އެމެރިކާގެ ކޮންގްރެސްއިން ވަނީ ވޭތުވެދިޔަ 50 އަހަރު ތެރޭގައި ފުރަތަމަ ފަހަރަށް ޔޫ.އެފް.އޯ އާ ގުޅޭ އަޑުއެހުންތަކެއް ބާއްވާފައެވެ. އަދި ޕެންޓަގަނުން ވަނީ މިކަމުގައި ދެފުށް ފެންނަ ސިޔާސަތެއް ގެންގުޅޭނެ ކަމަށް ވައުދުވެ، ސިފައިންނަށް ފެންނަ މިފަދަ ތަކެތީގެ ރިޕޯޓްތައް އެއްކުރުމަށް ހާއްސަ އޮފީހެއް ގާއިމުކޮށްފައެވެ.

ޖެހިގެން އައި އަހަރު އެމެރިކާގެ ހައުސް އޮފް ރެޕްރެޒެންޓެޓިވްސްގެ ޕެނަލަކުން މިކަން ދިރާސާކުރި ނަމަވެސް، އޭލިއަން އިން އުޅޭކަމުގެ އެއްވެސް ހެއްކެއް ނުވަތަ މުހިންމު އާ މައުލޫމާތެއް ހާމަވެފައެއް ނުވެއެވެ. އަދި 2024 ވަނަ އަހަރު ޕެންޓަގަނުން ނެރުނު ރިޕޯޓެއްގައި ބުނެފައިވަނީ، އެމެރިކާ ސަރުކާރަށް އޭލިއަން އިންނާ ދިމާވި ކަމުގެ އެއްވެސް ހެއްކެއް ނެތް ކަމަށާއި، އުޑުމަތިން ފެނުނު ގިނަ ތަކެއްޗަކީ އާދައިގެ ތަކެތި ކަމަށެވެ.