ހައްޔަރު ކުރިތާ ގިނައިރު ތަކެއް ނުވަނީސް، ކަފާލާތުގެ ދަށުން މެންޑެލްސަން ދޫކޮށްލައިފި

އެމެރިކާގެ ޖިންސީ ކުށްވެރިޔާ ޖެފްރީ އެޕްސްޓީންއާ ގުޅުން އޮތް ކަމުގެ ތުހުމަތު އަމާޒުވެފައި ވަނިކޮށް ހައްޔަރު ކުރި، އިނގިރޭސިވިލާތުގެ ކުރީގެ ސަފީރު ޕީޓް މެންޑެލްސަން ދޫކޮށްލައިފި އެވެ. 

ހޯމަ ދުވަހުގެ ވަގުތެއްގައި މެންޑެލްސަން ހައްޔަރު ކޮށްފައި ވަނީ، ދައުލަތުގެ މަގާމެއްގައި ހުންނަވައިގެން ކޮށްގެން ނުވާނެ ކަންތައް ތަކެއް ކޮށްފައިވާތީ އެވެ. ޖިންސީ ކުށްވެރިޔާ އެޕްސްޓީންއާ މެންޑެލްސަންއާ ދެމެދު އިންތިހާ އަށް ގާތް ގުޅުމެއް އޮތް ކަމަށް ވަނީ ހާމަވެފަ އެވެ. 

ލަންޑަންގެ މެޓްރޮޕޮލިޓަން ފުލުހުން ބުނެފައި ވަނީ، ސަރުކާރުގެ މަގާމެއްގައި ހުންނަވައިގެން އަމަލު ކޮށްފައިވާ ގޮތުގެ މައްސަލައެއްގައި 72 އަހަރުގެ މީހަކު ހައްޔަރު ކޮށްފައިވާ ކަމަށެވެ. އޭނާ ހައްޔަރު ކޮށްގެން ގެންދިޔަ މަންޒަރު މީޑިއާ ތަކަށް ފެނިފައިވާއިރު، މި މައްސަލަ އަކީ އިނގިރޭސި ސަރުކާރަށް ވެސް ޕްރެޝަރު ބޮޑުވެފައި އޮތް މައްސަލަ އެކެވެ. 

Raajje.mv

ދައުލަތުގެ މަގާމެއްގައި ހުރެ ހިންގި ނަހަމަ އަމަލުތަކެއްގެ ތުހުމަތުގައި، އިނގިރޭސިވިލާތުގެ ކުރީގެ ސަފީރު ޕީޓާ މަންޑެލްސަން ލަންޑަން ފުލުހުން ހައްޔަރުކޮށްފި

ހައްޔަރު ކުރިތާ މާ ގިނައިރު ތަކެއް ނުވަނީސް، އަންގާރަ ދުވަހު ވަނީ މެންޑެލްސަން ދޫކޮށްލައިފަ އެވެ. ފަހުން ފުލުހުން ނެރެފައިވާ ބަޔާނެއްގައި ބުނެފައި ވަނީ، އިތުރު ތަހުގީގު ކުރިއަށް ގެންދާނެ ކަމަށާއި، ކަފާލާތުގެ ދަށުން މެންޑެލްސަން ދޫކޮށްލާފައިވާ ކަމަށެވެ. އަދި ޖީއެމްޓީ އިން ދޭއް ޖެހިއިރު، އޭނާ އެނބުރި ގެޔަށް ގެނެސްފައިވާ ކަމަށް ބުނެފައިވެ އެވެ. 

މިކަމުގައި މެންޑެލްސަންގެ ޤާނޫނީ ވަކީލުން މިހާތަނަށް ވަކި އެއްޗެއް ބުނެފައި ނުވެ އެވެ. 

މެންޑެލްސަންގެ މައްސަލައިގައި އިނގިރޭސިވިލާތުގެ ބޮޑު ވަޒީރު ކިއާ ސްޓާމާ އަށް ވެސް ވަނީ އިންތިހާ އަށް ފާޑު ކިޔުން އަމާޒުވެފަ އެވެ. އެގޮތުން އެޕްސްޓީންއާ ގުޅުން އޮތްކަން އެނގިހުރެ، އެމެރިކާ އަށް ކަނޑައަޅުއްވާފައި ހުންނަވާ ސަފީރުގެ މަގާމަށް މެންޑެލްސަން އައްޔަން ކުރެއްވުމަކީ ބޮޑު ވަޒީރު ހެއްދެވި ގޯހެއް ކަމަށް ބުނެ، އޭނާގެ އިސްތިއުފާ އަށް ވެސް ގޮވާލާފައިވެ އެވެ.