ވެނެޒުއޭލާގެ އިންތިގާލީ ރައީސާ ޑެލްސީ ރޮޑްރިގޭޒްގެ ސަލާމަތީ ކަންކަން ބެލެހެއްޓުން އެ ގައުމުގެ ބޮޑީގާޑުންނާ ހަވާލުކުރައްވައިފި

ވެނެޒުއޭލާގެ އިންތިގާލީ ރައީސާ ޑެލްސީ ރޮޑްރިގޭޒްގެ ސަރުކާރަށް، ކިއުބާއާ އާ އެކު އޮތް އިއްތިހާދު ރޫޅާލުމަށް ވޮޝިންޓަނުން ބާރުބޮޑު ކުރަމުންދާ ދަނޑިވަޅެއްގައި، އެ ގައުމުގައި ތިބި ކިއުބާގެ ސެކިއުރިޓީ އެޑްވައިޒަރުންނާއި ޑޮކްޓަރުން ވެނެޒުއޭލާ ދޫކޮށް ދާން ފަށާފައިވާ ކަމަށް މިކަމާ ގުޅުންހުރި 11 މަސްދަރަކުން މައުލޫމާތު ދީފިއެވެ.

މަސްދަރުތަކުން ބުނާ ގޮތުގައި، މަގާމުން ދުރުކޮށްފައިވާ ނިކޮލަސް މަދޫރޯ އާއި އޭނާގެ ކުރިން ވެރިކަމުގައި ހުންނެވި އަވަހާރަވެފައިވާ ހޫގޯ ޗާވޭޒް، ކިއުބާގެ އެލީޓް ފޯސްތަކުގެ ހިމާޔަތް ހޯއްދެވި ނަމަވެސް، އިންތިގާލީ ރައީސާ ޑެލްސީ ރޮޑްރިގޭޒް މިހާރު ވަނީ އޭނާގެ ސަލާމަތީ ކަންކަން ވެނެޒުއޭލާގެ ބޮޑީގާޑުންނާ ހަވާލުކުރައްވާފައެވެ.

ޖެނުއަރީ މަހުގެ 3 ވަނަ ދުވަހު މަދޫރޯ ހައްޔަރުކުރުމަށް އެމެރިކާ ސިފައިން ދިން ހަމަލާގައި ކިއުބާގެ 32 މީހުން މަރުވެފައިވާ ކަމަށް ކިއުބާ ސަރުކާރުން ބުނެއެވެ. މި ސިފައިންނާއި ބޮޑީގާޑުންނަކީ 2000 ގެ އަހަރުތަކުގެ ފަހުކޮޅުން ފެށިގެން ކަރާކަސް އާއި ހަވާނާއާ ދެމެދު ގާއިމުކޮށްފައިވާ ސަލާމަތީ އެއްބަސްވުމުގެ ދަށުން ހަރަކާތްތެރިވި ބައެކެވެ. މި އެއްބަސްވުމުގެ ދަށުން ކިއުބާގެ އިންޓެލިޖެންސް އެޖެންޓުން ވަނީ ވެނެޒުއޭލާގެ އަސްކަރިއްޔާގެ ތެރެއަށާއި، އިދިކޮޅު ފަރާތްތައް ނައްތާލުމުގައި މުހިންމު ދައުރެއް އަދާކުރި އެ ގައުމުގެ ކައުންޓަރ އިންޓެލިޖެންސް ޔުނިޓް (ޑީ.ޖީ.ސީ.އައި.އެމް) ގެ ތެރެއަށް ވަދެފައެވެ.

ވެނެޒުއޭލާގެ އިންޓެލިޖެންސްގެ ކުރީގެ އޮފިޝަލަކު މައުލޫމާތު ދިން ގޮތުގައި، ޑީ.ޖީ.ސީ.އައި.އެމްގެ ތެރޭގައި ތިބި ކިއުބާގެ ބައެއް އެޑްވައިޒަރުން މިހާރު ވަނީ މަގާމުތަކުން ވަކިކޮށްފައެވެ. އަދި ފާއިތުވި ހަފުތާތަކުގައި ކިއުބާގެ ބައެއް ސިއްހީ މަސައްކަތްތެރިންނާއި ސަލާމަތީ އެޑްވައިޒަރުން ފްލައިޓްތަކުގައި ވެނެޒުއޭލާ ދޫކޮށް ކިއުބާއަށް ގޮސްފައިވާ ކަމަށް ދެ މަސްދަރަކުން ކަށަވަރުކޮށްދެއެވެ.

ވެނެޒުއޭލާގެ ވެރިކަން ކުރާ ޕާޓީއާ ގާތް ގުޅުމެއް އޮންނަ މަސްދަރަކުން ބުނި ގޮތުގައި، ކިއުބާ މީހުން އެ ގައުމުން ފުރަމުންދަނީ އެމެރިކާގެ ފިއްތުންތަކާ ހުރެ ރޮޑްރިގޭޒް އެންގެވި އެންގުމަކަށެވެ. 

ރައީސްގެ ގާޑުންގެ ތެރެއިންނާއި ކައުންޓަރ އިންޓެލިޖެންސް ޔުނިޓުން ކިއުބާ މީހުން އެއްފަރާތްކުރުމަށް ނިންމި ނިންމުން މީގެ ކުރިން މީޑިއާއަކުން ރިޕޯޓްކޮށްފައެއް ނުވެއެވެ.

ވެނެޒުއޭލާ އާއި ކިއުބާގެ ގުޅުން ކަނޑާލުމަށް ޓްރަމްޕް ބޭނުންފުޅުވޭ

މަދޫރޯ މަގާމުން ދުރުކުރުމުގެ އޮޕަރޭޝަންގެ ކުރިން، ޗާވޭޒްގެ ވެރިކަމުގައި ފެށި އިޖުތިމާއީ އެހީގެ ޕްރޮގްރާމްތަކުގެ ދަށުން ކިއުބާގެ އެތައް ހާސް ޑޮކްޓަރުންނާއި، ނަރުހުންނާއި، ކުޅިވަރު ކޯޗުން ވެނެޒުއޭލާގައި މަސައްކަތް ކުރަމުން ދިޔައެވެ. އޭގެ ބަދަލެއްގެ ގޮތުން ވެނެޒުއޭލާއިން ދިޔައީ ކިއުބާއަށް ނުހަނު ބޭނުންޖެހިފައިވާ ތެޔޮ ފޯރުކޮށްދެމުންނެވެ.

އެމެރިކާގެ ހަމަލާއަށްފަހު، ރައީސް ޑޮނަލްޑް ޓްރަމްޕް ވަނީ ވެނެޒުއޭލާ އާއި ކިއުބާއާ ދެމެދު އޮތް ސަލާމަތީ ގުޅުން ނިމުމަކަށް ގެންނާނެ ކަމަށް ވިދާޅުވެފައެވެ. "ކިއުބާ އިން ގިނަ އަހަރުތަކެއް ވަންދެން ވެނެޒުއޭލާގެ ތެލާއި ފައިސާގެ ބޭނުން ހިފި. އޭގެ ބަދަލުގައި ކިއުބާ އިން ވަނީ ވެނެޒުއޭލާގެ ފަހުގެ ދެ ޑިކްޓޭޓަރުންނަށް 'ސަލާމަތީ ޚިދުމަތް' ފޯރުކޮށްދީފައި. އެކަމަކު ދެން އެކަމެއް ނުވާނެ!" ޖެނުއަރީ 11 ވަނަ ދުވަހު ޓްރަމްޕް އޭނާގެ 'ޓްރުތް ސޯޝަލް' ގައި ލިޔުއްވާފައިވެއެވެ.