ހަތިޔާރާއެކު ޓްރަމްޕްގެ ގެކޮޅަށް ވަތް މީހަކު ސީކްރެޓް ސާވިސްއިން ބަޑިޖަހައި މަރާލައިފި

އެމެރިކާގެ ރައީސް ޑޮނަލްޑް ޓްރަމްޕް ފްލޮރިޑާގައި ދިރިއުޅުއްވާ މާރް-އަ-ލާގޯގެ ސަލާމަތީ ފިޔަވަޅުތައް ވަރުގަދަކޮށްފައިވާ ސަރަހައްދަށް ހަތިޔާރާއެކު ވަތް މީހަކަށް ސީކްރެޓް ސާވިސްގެ އެޖެންޓުން ބަޑިޖަހައި މަރާލާފައިވާ ކަމަށް އެ އިދާރާއިން ބުނެފިއެވެ.

ކަމާބެހޭ ފަރާތްތަކުން މައުލޫމާތު ދޭ ގޮތުގައި، އެ މީހާ ހުއްޓުވައި ބަޑިޖަހާފައިވަނީ ސީކްރެޓް ސާވިސްގެ އެޖެންޓުންނާއި ޝެރިފްގެ ޑެޕިއުޓީއެކެވެ. އޭނާގެ އަތުގައި ބަޑިއަކާއި ތެޔޮ ހަމެއް އޮތް ކަމަށް އޮފިޝަލުން ވިދާޅުވިއެވެ.

މި ހާދިސާ ހިނގާފައިވަނީ އާދީއްތަ ދުވަހުގެ ހެނދުނުގެ ވަގުތެއްގަ އެވެ. އެ ވަގުތު ރައީސް ޓްރަމްޕް ހުންނެވީ ވޮޝިންގޓަން ޑީސީގައެވެ.

ބީބީސީގެ އެމެރިކާގެ ޕާޓްނަރު ސީބީއެސްއިން ރިޕޯޓްކޮށްފައިވާ ގޮތުގައި، މަރާލި މީހަކީ ނޯތު ކެރޮލައިނާގެ ކެމަރަންއަށް ނިސްބަތްވާ އޮސްޓިން ޓީ މާޓިން ނަމަކަށް ކިޔާ މީހެކެވެ.

ސީބީއެސްއިން ބުނާ ގޮތުގައި، އޭނާ ގެއްލިގެން އުޅޭ ކަމަށް އާއިލާގެ ފަރާތުން ހޮނިހިރު ދުވަހު ވަނީ ރިޕޯޓްކޮށްފައެވެ.

އޭނާ ނޯތު ކެރޮލައިނާއިން ފްލޮރިޑާއަށް ދަތުރުކުރި މަގުމަތީގައި ބަޑި ގަނެފައިވޭތޯ އޮފިޝަލުން މިހާރު ދަނީ ތަހުގީގު ކުރަމުންނެވެ.

ސީކްރެޓް ސާވިސްގެ ތަރުޖަމާނު އެންތަނީ ގުގްލިއެލްމީ އެކްސްގައި ކުރެއްވި ޕޯސްޓެއްގައި ވިދާޅުވީ، މިއަދު ހެނދުނުގެ ވަގުތެއްގައި މާރް-އަ-ލާގޯގެ ސަލާމަތީ ފެންސް ފަހަނައަޅައި އޭނާ ވަންނަނިކޮށް ފެނުމުން، އެޖެންޓުން އޭނާއަށް ބަޑިޖެހީ ކަމަށެވެ.

އެ އިދާރާއިން ނެރުނު ބަޔާނެއްގައި ބުނެފައިވަނީ، މާރް-އަ-ލާގޯގެ އުތުރު ގޭޓު ކައިރިން އެ މީހާ ފެނުނުއިރު، އޭނާގެ އަތުގައި ބަޑިއަކާއި ތެޔޮ ހަމެއް އޮތް ކަމަށް ފާހަގަކުރެވުނު ކަމަށެވެ.

ޕާމް ބީޗް ކައުންޓީގެ ޝެރިފް ރިކް ބްރެޑްޝޯ ވިދާޅުވީ، އެ މީހާއަށް ކުރި އަމުރުތަކަށް ކިޔަމަންނުވުމުން އޭނާގެ ގަޔަށް ބަޑިޖެހީ ކަމަށެވެ.

ނޫސްވެރިންގެ ބައްދަލުވުމެއްގައި ބްރެޑްޝޯ ވިދާޅުވީ، އޭނާގެ އަތުގައި ހުރި ތެޔޮ ހަމާއި ބަޑި ބޭއްވުމަށް އެޖެންޓުން ތަކުރާރުކޮށް އެންގި ކަމަށެވެ.

އޭނާ ވިދާޅުވި ގޮތުގައި، އެ ވަގުތު އޭނާ ތެޔޮ ހަން ބެހެއްޓުމަށްފަހު، ބަޑި ނަގައި ހަމަލާދޭން ތައްޔާރުވާ ފަދަ ހަރަކާތްތައް ފެނުނެވެ.

އެހިސާބުން، ކުރިމަތިވެދާނެ ނުރައްކަލަކުން ސަލާމަތްވުމަށްޓަކައި އެޖެންޓުން އޭނާއަށް އަމާޒުކޮށް ބަޑިޖެހީ ކަމަށް ބްރެޑްޝޯ ވިދާޅުވިއެވެ.

މި ހާދިސާ ހިނގިއިރު އޮފިސަރުން ތިބީ ބޮޑީ ކެމެރާ އަޅައިގެން ކަމަށާއި، ގާނޫނު ތަންފީޒުކުރާ އެއްވެސް އޮފިސަރަކަށް އަނިޔާއެއް ލިބިފައިނުވާ ކަމަށްވެސް އޭނާ އިތުރަށް ވިދާޅުވިއެވެ.

ބްރެޑްޝޯ ވިދާޅުވީ އޭނާގެ ބަޑި އޮތީ ލޯޑުކޮށްފައި ކަމެއް އަދި ނޭނގޭ ކަމަށާއި، އެފްބީއައިގެ އެހީތެރިކަމާއެކު ކުރިއަށްދާ ތަހުގީގުގައި އެކަން ސާފުވާނެ ކަމަށެވެ.

މާރް-އަ-ލާގޯގެ ސަލާމަތީ ކަންކަން ބަލަހައްޓަނީ ވަރަށް ވަރުގަދަކޮށެވެ. އެގޮތުން ބޭރުގެ ސަލާމަތީ ކަންކަން ޕާމް ބީޗްގެ ޝެރިފުން ބަލަހައްޓާއިރު، އެތެރޭގެ ސަލާމަތީ ކަންކަން ބަލަހައްޓަނީ ސީކްރެޓް ސާވިސްއިންނެވެ. އެ ތަނަށް ވަންނަ މީހުން ބަލައި ފާސްކުރުމުގެ އިތުރުން، ކުއްތާއާއި މެޓަލް ޑިޓެކްޓަރު ބޭނުންކޮށްގެން އުޅަނދުފަހަރާއި ދަބަސްތައް ޗެކްކުރެއެވެ.

މީގެ ކުރިންވެސް ރައީސް ޓްރަމްޕް އަވަހާރަކޮށްލުމަށް އެކި ފަހަރުމަތިން ރޭވުންތައް ރާވައި، ހަމަލާދޭން މަސައްކަތް ކޮށްފައިވެއެވެ.

އެގޮތުން 2024 ވަނަ އަހަރުގެ ޖުލައި މަހު ޕެންސިލްވޭނިއާގެ ބަޓްލާގައި އާންމުންނާ މުޚާތަބު ކުރައްވަން ހުންނަވަނިކޮށް، ޓްރަމްޕްގެ ކަންފަތްޕުޅަށް ވަނީ ބަޑީގެ ހަމަލާއެއް އަމާޒުވެފައެވެ. އެ ހާދިސާގައި އެތަނުގައި ތިބި މީހުންގެ ތެރެއިން އެކަކު މަރުވެ، ދެ މީހަކަށް އަނިޔާވިއެވެ. ހަމަލާދިން އުމުރުން 20 އަހަރުގެ މެތިއު ކްރޫކްސް، ސަލާމަތީ ބާރުތަކުން ވަގުތުން ބަޑިޖަހައި މަރާލާފައިވާއިރު، އޭނާ އެ ހަމަލާދިން ސަބަބެއް އަދިވެސް ސާފެއް ނުވެއެވެ.

އޭގެ މަސްތަކެއް ފަހުން، ވެސްޓް ޕާމް ބީޗްގައި ހުންނަ ޓްރަމްޕް އިންޓަނޭޝަނަލް ގޮލްފް ކްލަބްގެ ފާރު ކައިރީގައި ހުރި ގަސްތަކެއްގެ ތެރެއިން ބަޑިއެއްގެ ހިފައިގެން މީހާކު ހުއްޓާ ސީކްރެޓް ސާވިސްގެ އެޖެންޓަކަށް ފެނުނެވެ. އެ ހަމަލާދޭން އުޅުނު ރަޔަން ރައުޓް ފިލަން މަސައްކަތް ކުރި ނަމަވެސް ފަހުން ވަނީ އަތުލައިގަނެފައެވެ. އުމުރުން 59 އަހަރުގެ ރައުތު، ރައީސް އަވަހާރަކޮށްލަން އުޅުނުކަން ސާބިތުވެ، މި މަހުގެ ކުރީކޮޅު އޭނާ ވަނީ އުމުރަށް ޖަލަށްލުމަށް ހުކުމްކޮށްފައެވެ.